ខេត្តត្បូងឃ្មុំ ៖ សំឡេងគ្រាប់បែក១គ្រាប់បានផ្ទុះឡើងកក្រើកភូមិ ដោយសារតែបុរសម្នាក់បានផឹកស្រាស្រវឹងយកមកបំផ្ទុះនៅផ្ទះក្មួយរបស់ខ្លួននៅភូមិត្របែក
ខេត្តត្បូងឃ្មុំ ៖ សំឡេងគ្រាប់បែក១គ្រាប់បានផ្ទុះឡើងកក្រើកភូមិ ដោយសារតែបុរសម្នាក់បានផឹកស្រាស្រវឹងយកមកបំផ្ទុះនៅផ្ទះក្មួយរបស់ខ្លួននៅភូមិត្របែក ឃុំមេមត់ ស្រុកមេមត់ព្រោះតែស្រវឹងហើយបាត់ទូរស័ព្ទ ។ ហេតុការណ៍នេះបានកើតឡើងនៅវេលាម៉ោង២និង២០នាទីរសៀលថ្ងៃទី១ មករា ២០១៧ បណ្តាលឲ្យបុរស២នាក់ស្លាប់ក្នុងថ្លុកឈាមគួរឲ្យរន្ធត់ ត្រូវបានលោកស្នងការនគរបាលខេត្ត ចាត់ឲ្យកម្លាំងជំនាញទៅកាន់កន្លែងកើតហេតុជាបន្ទាន់ ដើម្បីធ្វើការស្រាវជ្រាវជុំវិញករណីនេះ ។
លោកវរសេនីយ៍ត្រី ហុង គឹមហឿន អធិការនគរបាលស្រុកមេមត់ បានប្រាប់ឲ្យដឹងថា មុនពេលកើតហេតុនោះគេបានឃើញមនុស្សជាច្រើននាក់ បាននាំគ្នាផឹកស៊ីនៅលើគ្រែក្រោមផ្ទះរបស់ស្ត្រីអ្នកភូមិម្នាក់រហូតស្រវឹងធ្លាក់ភ្នែក ។ ពេលនោះបុរសឈ្មោះ សំ សារ៉ាត់ ហៅជា អាយុ៥៥ឆ្នាំ មានទីលំនៅភូមិ-ឃុំកើតហេតុ បានជិះម៉ូតូម៉ាកស៊ីរុសពណ៌ក្រហមលាយខ្មៅ ចេញទៅផ្ទះរៀងៗខ្លួនអស់ ។
លោកអធិការនគរបាលស្រុកមេមត់បានប្រាប់បន្តថា ក្រោយពីបានចេញទៅមួយសន្ទុះធំនោះ ក៏បានជិះម៉ូតូត្រឡប់មកវិញហើយបានសួរនាំបុរសឈ្មោះ ខុញ ខា អាយុ៤៣ឆ្នាំ ដែលជាម្ចាស់ផ្ទះ ព្រោះខ្លួនបាត់ទូរស័ព្ទ១គ្រឿងម៉ាកណូគៀអិចចុចពិល ? ក្រោយពីម្ចាស់ផ្ទះថាមិនបានឃើញ ឈ្មោះ សំ សារ៉ាត់ ក៏ជិះចេញទៅវិញបាត់ បន្ទាប់មកបានជិះត្រឡប់មកវិញ ដោយមានគ្រាប់បែក១គ្រាប់ ប្រឡាក់សុទ្ធតែដីមកជាមួយផងបានមកជួបបុរសម្ចាស់ផ្ទះម្តងទៀត និងបានយកគ្រាប់បែកនោះញាត់ចូលក្នុងដើមទ្រូង ។
មុននឹងបំផ្ទុះគ្រាប់បែកឈ្មោះ សំ សារ៉ាត់ បាននិយាយថា «បើឯងស្រឡាញ់គ្នាងាប់ទាំងអស់គ្នាតែម្តងទៅ» ពេលនោះស្ត្រីជាប្រពន្ធរបស់ឈ្មោះ ខា ដែលបានឃើញសភាពការណ៍ផ្ទាល់ភ្នែកក៏ប្រញាប់ស្ទុះរត់ចេញពីគ្រែបានប្រហែលជា៤ម៉ែត្រប៉ុណ្ណោះ គ្រាប់បែកក៏បានផ្ទុះឡើងបណ្តាលឲ្យស្លាប់ទាំង២នាក់ក្នុងថ្លុកឈាមធ្លាយចេញពោះវៀនមកក្រៅដូចគ្នាគួរឱ្យញាក់សាច់ ។
លោកវរសេនីយ៍ត្រី ហុង គឹមហឿន អធិការនគរបាលស្រុកមេមត់ បានបញ្ជាក់ថា ក្រោយពីមានហេតុការណ៍បំផ្ទុះគ្រាប់បែក លោកឧត្តមសេនីយ៍ទោ បែន រ័ត្ន ស្នងការនគរបាលខេត្ត បានបញ្ជាឲ្យកម្លាំងព្រហ្មទណ្ឌខេត្តនិងការិយាល័យបច្ចេកទេសវិទ្យាសាស្ត្រខេត្តចុះទៅពិនិត្យកន្លែងកើតហេតុ និងស្រាវជ្រាវជុំវិញបុរសឈ្មោះ សំ សារ៉ាត់ ដែលជាម្ចាស់គ្រាប់បែក តើគ្រាប់បែកនោះគាត់បានមកពីណាបើជាកសិករនេះ។ សពបុរសទាំង២នាក់នោះត្រូវបានសមត្ថកិច្ចប្រគល់ឲ្យទៅសាច់ញាតិដើម្បីរៀបចំធ្វើបុណ្យតាមប្រពៃណី ។ សូមបញ្ជាក់ថារវាងអ្នកស្លាប់ទាំង២ គឺជាឪពុកមានិងក្មួយ ៕
ចែករំលែកព័តមាននេះ