រាជធានីភ្នំពេញ ៖ រថយន្តកុងតឺន័រមួយគ្រឿង កំពុងឈប់រង់ចាំស្តុប ស្រាប់តែរថយន្តកុងតឺន័រមួយគ្រឿងទៀតមកពីក្រោយជាន់ហ្វ្រាំងមិនស៊ី បានជ្រុលទៅបុកពេញទំហឹង បណ្តាលឱ្យរថយន្តដែលបង្កនោះ ខូចខាតកាប៊ីនទាំងស្រុង ដែលហេតុការណ៍នេះកើតឡើង កាលពីវេលាម៉ោង០៨ និង១៥នាទីយប់ ស្ថិតតាមបណ្តោយផ្លូវហាណូយ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
នៅមុនពេលកើហេតុ គេឃើញរថយន្តកុងតឺន័ររងគ្រោះម៉ាក MITSUBISHI ពាក់ស្លាកលេខព្រះសីហនុ 4D-1970 បើកបរដោយតៃកុងម្នាក់ ព្រូម្នាក់ តាមបណ្តោយផ្លូវហាណូយទិសដៅពីត្បូងទៅជើង ខណៈមកដល់ចំណុចកើតភ្លើងស្តុបលោតពណ៌ក្រហមរថយន្តបានឈប់រង់ចាំស្តុប ឯរថយន្តបង្កម៉ាក HYUNDAI ពាក់ស្លាកលេខ3A-0371 ជាប្រភេទកុងតឺន័រដូចគ្នា បើកបរដោយតៃកុងម្នាក់ និងព្រូម្នាក់ដូចគ្នាមកពីក្រោយស្របគ្នាក្នុងល្បឿនលឿន មិនបានមើលភ្លើងស្តុបបានជ្រុលទៅបុកបញ្ឆិតខាងស្តាំផ្នែកខាងព្រូរថយន្តជាមួយនឹងទ្រុងរថយន្ត MITSUBISHI ដោយព្រូរថយន្ត HYUNDAI មើលឃើញទាន់ពេលបានលោតចេញផុត ទើបមិនបណ្តាលនរណាម្នាក់រងរបួសនោះឡើយ គ្រាន់តែខូតខាតកាប៊ីនរថយន្ត HYUNDAI ទាំងស្រុងតែប៉ុណ្ណោះ។
ក្រោយពេលកើតហេតុ សមត្ថកិច្ចជំនាញមកវាស់វែង តែដោយថៅកែរថយន្តទាំងសងខាងស្គាល់គ្នា ចុងបញ្ចប់ខាងរថយន្ត HYUNDAI ព្រមជួសជុលជូនខាងរថយន្តរងគ្រោះ MITSUBISHI ដើម្បីបញ្ចប់រឿង ៕
ចែករំលែកព័តមាននេះ