ប្រទេសថៃ ៖ ទោះជាមានការបង្អាក់ពន្ធដី និងអគារ១ឆ្នាំក្តី ប៉ុន្តែតម្លៃដីសរុបរបស់ទីក្រុងបាងកក ត្រូវបានគេព្យាករណ៍ថា នឹងកើនឡើងពី១០%ទៅ៣០%ឯណោះក្នុងឆ្នាំ២០១៧ ហើយតម្លៃខុនដូនៅ Greater Bangkok នឹងកើនឡើងប្រមាណ៦%-៧% ផងដែរ ។
លោកស្រី Nalinrat Chareonsuphong ប្រធានគ្រប់គ្រងក្រុមហ៊ុនប្រឹក្សាយោបល់ផ្នែកអចលនទ្រព្យ Property Marketing Co និយាយថា ៖ « ការកើនឡើងនៃតម្លៃដីជាមធ្យមក្នុងឆ្នាំ២០១៧ នឹងខ្ពស់ជាងឆ្នាំ២០១៥ និង២០១៦ ដែលស្មើនឹង៥%-១០% » ។
ការលក់ក្នុងតម្លៃដ៏ខ្ពស់អាចនឹងកើតមានឡើងនៅឆ្នាំក្រោយ ប្រសិនបើដីជាកម្មសិទ្ធិរបស់ស្ថានទូតអង់គ្លេសត្រូវបានលក់ចេញ ។
លោកស្រី Nalinrat បន្តថា កង្វះខាតដី និងការកើនឡើងនៃតម្លៃដី នឹងធ្វើឲ្យតម្លៃខុនដូនៅតំបន់ក្នុងក្រុងកើនឡើងប្រមាណ៩%-១០%ផងដែរនៅឆ្នាំក្រោយ ។ ប៉ុន្តែក្រុមហ៊ុនអចលនទ្រព្យ គួរប្រុងប្រយ័ត្នផងដែរក្នុងការវិនិយោគលើដីនៅក្រៅក្រុងបាងកក ព្រោះអតិថិជនប្រហែលជាគ្មានសមត្ថភាពទិញវាឡើយ ។
យោងតាមការស្រាវជ្រាវរបស់ក្រុមហ៊ុនខាងលើ ខុនដូថ្មីៗដែលបានដាក់លក់នៅបាងកកនាឆ្នាំនេះ សរុបមានចំនួន៤ម៉ឺនយូនីតពីគម្រោង៩៤ ដែលតិចជាង២៥%នៃខុនដូ៥៣ពាន់យូនីតបានដាក់លក់កាលពីឆ្នាំមុន ។
ក្រុមហ៊ុនអចលនទ្រព្យមានគម្រោងលក់ខុនដូប្រមាណ៥ពាន់យូនីតនាត្រីមាសទី៤នេះ ប៉ុន្តែត្រូវបានពន្យារពេលវិញ ព្រោះតែជារយៈពេលកាន់ទុក្ខ ។
ទោះយ៉ាងណា លោកស្រីបន្ថែមថា ទោះជាមានការពន្យារពេលក៏ពិតមែន ប៉ុន្តែមានខុនដូថ្មី៧០%បានដាក់លក់ក្នុងឆមាសទី១ ដែលបង្ហាញថា ក្រុមហ៊ុនអចលនទ្រព្យពិតជាមានជំនឿទុកចិត្តលើការលូតលាស់នៃទីផ្សារអចលនទ្រព្យក្នុងក្រុងបាងកក ។
តំបន់ដាក់លក់ខុនដូថ្មីៗជាច្រើនរួមមាន Phra Khanong និង Suan Luang បានដាក់លក់១០.៧០០យូនីត, Phaya Thai និង Ratchadaphisek លក់៩.២០០យូនីត និង Ngamwongwan និង Tiwanon លក់៦.៩០០យូនីត ។ ចំណែកខុនដូលក់មិនចេញសរុបមានប្រមាណ៤៨ពាន់យូនីត គឺតិចជាងឆ្នាំមុន ដែលស្មើរហូតដល់៥៤ពាន់យូនីត ៕
ចែករំលែកព័តមាននេះ