រាជធានីភ្នំពេញ ៖ ករណីតារាសម្តែង ពេជ្រ អាវីហ្សា ដែលត្រូវអតីតសង្សាររបស់ខ្លួនវាយឱ្យរបួសនោះបានឈានដល់ដំណាក់កាលសាកសួរជនរងគ្រោះហើយនៅចុងសប្តាហ៍នេះ។ តារាសម្តែងពេជ្រ អាវីហ្សា នឹងចេញដំណើរទៅ
រាជធានីភ្នំពេញ ៖ ករណីតារាសម្តែង ពេជ្រ អាវីហ្សា ដែលត្រូវអតីតសង្សាររបស់ខ្លួនវាយឱ្យរបួសនោះបានឈានដល់ដំណាក់កាលសាកសួរជនរងគ្រោះហើយនៅចុងសប្តាហ៍នេះ។ តារាសម្តែងពេជ្រ អាវីហ្សា នឹងចេញដំណើរទៅកាន់ខេត្តព្រះសីហនុដែលជាទីតាំងនៃកន្លែងកើតហេតុដើម្បីឆ្លើយបំភ្លឺនៅមុខមន្ត្រីតុលាការ ។
ពេជ្រ អាវីហ្សា បញ្ជាក់ថា «ថ្ងៃទី៣១ខែធ្នូ ២០១៦ តុលាការហៅនាងខ្ញុំទៅចូលបំភ្លឺ ជុំវិញករណីប្រើហិង្សាលើនាងខ្ញុំ ។ នាងខ្ញុំនៅតែរក្សាជំហរមិនប្តឹងអតីតសង្សារទេ ព្រោះនាងខ្ញុំពិត ជាចង់អហោសិកម្មឲ្យអតីតគូស្នេហ៍អ្វីគ្រប់យ៉ាងដែលធ្លាប់មានជាមួយគ្នាឲ្យចប់ទាំងអស់ កុំឲ្យមានកម្មពៀរជាមួយគ្នាតទៅទៀត ។
ថ្ងៃក្រោយបើសង្សាររបស់ខ្ញុំទទួលទោស រួច មកសុំជានាជាមួយវិញ ក៏នាងខ្ញុំមិនព្រមដែរ គឺសុំបញ្ចប់ត្រឹមនេះតែម្ដង ប៉ុន្តែការចូលទៅឆ្លើយបំភ្លឺនៅពេលនេះគឺដើម្បីបញ្ចប់បណ្តឹងព្រហ្មទណ្ឌប៉ុណ្ណោះ ។ ខ្ញុំមិនចង់ទទួលបានសំណងអ្វីពីអតីតគូស្នេហ៍ ក្រៅតែពីការចង់បញ្ចប់បញ្ហានោះ ដោយសន្តិវិធី បើទោះបីជាកន្លងមកនាងខ្ញុំធ្លាប់រងអំពើហិង្សាពីគូស្នេហ៍មិនតិចជាង៣ដងក្តី» ។
ពេជ្រ អាវីហ្សា ត្រូវអតីតគូស្នេហ៍របស់ខ្លួនវាយរបួសធ្ងន់កាលពីថ្ងៃទី១៣ វិច្ឆិកានៅខេត្តព្រះសីហនុ ។ តារាស្រីសាច់សខ្ចីរូបនេះបញ្ជាក់ថា នាងមិនប្ដឹងទេ ទាំងបណ្ដឹងព្រហ្មទណ្ឌ ក៏ដូចជាបណ្ដឹងរដ្ឋប្បវេណី ចំពោះអតីតសង្សាររបស់នាង ។ ទោះយ៉ាងណាក្តី ដោយវាជាបទល្មើសព្រហ្មទណ្ឌ ដូចនេះ តាមផ្លូវច្បាប់ទោះបីជាជនរងគ្រោះមិនប្ដឹង ក៏ព្រះរាជអាជ្ញាចោទប្រកាន់ជនល្មើសដែរ។ រក្សាជំហរមិនប្តឹង ប៉ុន្តែអាវីហ្សាស្នើឲ្យមន្ត្រីតុលាការចាត់ការតាមនីតិវិធី ។
ពេជ្រ អាវីហ្សាបញ្ជាក់ថា នាងធ្លាប់រងការវាយដំពីអតីតគូស្នេហ៍មិនតិចជាង៣លើកទេ ប៉ុន្តែនាងស៊ូទ្រាំ ។ រហូតមកដល់ពេលនេះអារម្មណ៍ភ័យខ្លាចនៅមិនទាន់បាត់ទាំងស្រុងនៅឡើយ ឯរបួសរបស់នាងក៏មិនទាន់ជាសះស្បើយនៅឡើយដែរ ។
សាលាដំបូងខេត្តព្រះសីហនុ ចេញដីកាសម្រេចឃុំខ្លួនលោកគៀង ហេង ជាអតីតសង្សាររបស់នាងពេជ្រ អាវីហ្សា ដាក់ពន្ធនាគារជាបណ្តោះអាសន្ន កាលពីថ្ងៃទី១៦ ខែវិច្ឆិកា បន្ទាប់ពីមានការរិះគន់ខ្លាំងពីមហាជន ។ជននោះត្រូវដាក់ឲ្យស្ថិតក្រោមការពិនិត្យពីបទប្រព្រឹត្តហិង្សាដោយចេតនាកាលពីរាត្រីថ្ងៃទី១៣ ខែវិច្ឆិកាក្នុងក្លឹបកម្សាន្តមួយនៅខេត្តព្រះសីហនុ ៕
ចែករំលែកព័តមាននេះ