រាជធានីភ្នំពេញ ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ថ្លែងថា ក្រសួងនឹងប្រើប្រាស់ម៉ាស៊ីនវាស់កម្រិតស្រុតស្រទាប់ផ្លូវ
រាជធានីភ្នំពេញ ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ថ្លែងថា ក្រសួងនឹងប្រើប្រាស់ម៉ាស៊ីនវាស់កម្រិតស្រុតស្រទាប់ផ្លូវ ដើម្បីត្រួតពិនិត្យគុណភាពផ្លូវមុននឹងផ្តល់ឲ្យក្រុមហ៊ុនស្ថាបនា ។
លោកទេសរដ្ឋមន្ត្រី បានថ្លែងបែបនេះក្នុងសន្និបាតបូកសរុបលទ្ធផលការងារប្រចាំឆ្នាំ២០១៦ និងលើកទិសដៅអនុវត្តការងារឆ្នាំ២០១៧ កាលពីថ្ងៃទី២៨ ខែធ្នូ នៅទីស្តីការក្រសួង ដោយមានការអញ្ជើញចូលរួមពីថ្នាក់នាំក្រសួង ប្រធានមន្ទីរសាធារណការនិងដឹកជញ្ជូនក្រោមឱវាទ តំណាងក្រសួង និងស្ថាប័នពាក់ព័ន្ធមួយចំនួន ។
លោកទេសរដ្ឋមន្ត្រី ស៊ុន ចាន់ថុល បានលើកឡើងអំពីសមិទ្ធផលការងារដែលសម្រេចបាន និងកំពុងបន្តអនុវត្ត ពាក់ព័ន្ធនឹងកំណែទម្រង់ របស់ក្រសួងសាធារណការ និងដឹកជញ្ជូន ក្នុងនោះរួមមាន កំពង់ផែស្វយ័តក្រុងព្រះសីហនុ ឯកភាពបញ្ចុះតម្លៃ១០%នៃតម្លៃសេវាលើកដាក់ កុងតឺន័រនៅទីលានកុងតឺន័រ កំពង់ផែស្វយ័តភ្នំពេញ យល់ព្រមបញ្ចុះតម្លៃ៥%នៃតម្លៃសេវាលើកដាក់កុងតឺន័រនៅទីលានកុងតឺន័រ ភ្នាក់ងារកម្ពុជានាវាចរ«កាំសាប»យល់ព្រមបញ្ចុះថ្លៃ១០%នៃតម្លៃសេវាកត់ត្រាកុងតឺន័រលើសម៉ោង និងបញ្ចុះតម្លៃ១០%នៃតម្លៃត្រួតពិនិត្យកុងតឺន័រនៅពេលលើកដាក់នាវា និងសមាគមរថយន្តដឹកជញ្ជូនទំនិញកម្ពុជាយល់ព្រមកាត់បន្ថយកម្រៃសេវា១០ដុល្លារក្នុងមួយកុងតឺន័រសម្រាប់បណ្តោយ៤០ហ្វ៊ីត និង៥ដុល្លារក្នុងមួយកុងតឺន័រសម្រាប់បណ្តោយ២០ហ្វ៊ីត ។
លោកទេសរដ្ឋមន្ត្រីបន្តថា ក្រសួងក៏បានធ្វើកំណែទម្រង់សំខាន់ៗមួយចំនួនទៀតរួមមាន ការដាក់ឱ្យដំណើរការមណ្ឌលប្តូរនិងពន្យារប័ណ្ណបើកបរនៅផ្សារទំនើបអុីអនម៉ល ការកាត់បន្ថយសេវាក្រៅផ្លូវការ យុទ្ធនាការចុះបង្ក្រាបរថយន្តដឹកជញ្ជូនលើសទម្ងន់កម្រិតកំណត់ ការផ្សព្វផ្សាយអំពីបច្ចេកទេសនៃការជួសជុលកែច្នៃយានយន្ត ការពង្រីកការផ្តល់សេវាត្រួតពិនិត្យលក្ខណៈបច្ចេកទេសយានយន្ត ដោយក្រសួងបានចុះកិច្ចសន្យានាំយករថយន្តចល័តបំពាក់ដោយបច្ចេកវិទ្យាទំនើបចំនួនពីរគ្រឿង ដើម្បីបង្ខិតសេវាត្រួតពិនិត្យយានយន្តឱ្យកាន់តែជិតប្រជាពលរដ្ឋ ជាពិសេសសម្រាប់ម្ចាស់យានយន្តនៅតាមបណ្តាខេត្ត និងការផ្តល់និងបិទចំណាំងប្លាតសុវត្ថិភាពជូនប្រជាពលរដ្ឋ ។
ជាមួយគ្នានេះ លោកទេសរដ្ឋមន្ត្រីក៏បានលើកឡើងអំពីគម្រោងចេញផ្លាកលេខពិសេស សម្គាល់ម្ចាស់យានយន្ត គម្រោងបង្កើតប្រព័ន្ធស្វយ័តប្រវត្តិកម្ម ដើម្បីផ្តល់សេវាសាធារណៈលើការចុះបញ្ជីប័ណ្ណបើកបរ ការចុះបញ្ជីយានយន្ត ការត្រួតពិនិត្យលក្ខណៈបច្ចេកទេសយានយន្ត ការផ្ទេរកម្មសិទ្ធិយានយន្ត ការសិក្សាលើគម្រោងរៀបចំស្វយ័តប្រវត្តិកម្មសម្រាប់សម្រួលបែបបទនាវា និងនាវិកចេញចូលនៅកំពង់ផែ ។
ទាក់ទងនឹងបញ្ហាសាធារណការវិញ លោកទេសរដ្ឋមន្ត្រីគូសបញ្ជាក់ថា ក្រសួងបានជំរុញលើកទឹកចិត្តការស្ថាបនា ជួសជុល ថែទាំផ្លូវ នៅទីប្រជុំជនពីពេលថ្ងៃមកពេលយប់វិញ ដើម្បីកាត់បន្ថយការកកស្ទះចរាចរណ៍នៅពេលថ្ងៃ បានគូសគំនូសទួលបន្ថយល្បឿន គំនូសថ្មើរជើងឆ្លងកាត់ផ្លូវ និងការជួសជុលសម្បុកមាន់ តាមចំណុចផ្លូវសំខាន់ៗដោយប្រើបេទីមត្រជាក់ ដែលអាចប្រើបានគ្រប់រដូវកាល បានគូសគំនូសចរាចរណ៍នៅមហាវិថីសំខាន់ៗ ដើម្បីធ្វើឲ្យប្រសើរឡើងដល់សុវត្ថិភាពចរាចរណ៍នៅក្នុងរាជធានីភ្នំពេញ ។
បន្ថែមពីលើនេះ ក្រសួងបានប្រើប្រាស់ម៉ាស៊ីនវាស់កម្រិតស្រុតស្រទាប់ផ្លូវដើម្បីត្រួតពិនិត្យគុណភាពផ្លូវ មុននឹងធ្វើការប្រគល់-ទទួលពីក្រុមហ៊ុនស្ថាបនា ៕
ចែករំលែកព័តមាននេះ