ខេត្តកណ្តាល ៖ ក្រោមការបញ្ជាយ៉ាងម៉ឺងម៉ាត់ពីលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានឱ្យលោកវរសេនីយ៍ លន ចន្ថារ អធិការរងនគរបាលស្រុកស្អាង បានដឹកនាំកម្លាំងព្រហ្មទណ្ឌ សហការជាមួយកម្លាំងនគរបាលក្រុងតាខ្មៅ កម្លាំងនគរបាលខេត្តតាកែវ និងមានការចូលរួមពីកម្លាំងព្រហ្មទណ្ឌកំរិតធ្ងន់នៃស្នងការនគរបាលខេត្តកណ្តាល បើកប្រតិបត្តិការបង្ក្រាបបំបែកសំបុកក្រុមចោរ ធាក់ប្លន់យកម៉ូតូពីពលរដ្ឋ ដោយឃាត់ខ្លួនបាន០៥នាក់ តែគេចខ្លួនបាត់០៨នាក់ រួមនិងវត្ថុតាងមួយចំនួនធំ ។
ហេតុការណ៍ចុះឃាត់ ធ្វើឡើងកាលពីថ្ងៃទី២៤ កក្កដា ឆ្នាំ២០២២ វេលាម៉ោង០៥ និង៥០នាទីល្ងាច ស្ថិតនៅចំនុចលើផ្លូវជាតិលេខ២១ភូមិផ្លូវបំបែក ឃុំទឹកវិល ស្រុកស្អាង ខេត្តកណ្តាល ។
លោកវរសេនីយ៌ លន ចន្ថារ អធិការរងនគរបាលស្រុកស្អាងបានប្រាប់អោយដឹងថា ជនសង្ស័យមានចំនួន១៣នាក់ ។ លោកបានបញ្ជាក់ថា កាលពីថ្ងៃទី២៤ ខែកក្កដា ឆ្នាំ២០២២ វេលាម៉ោងកើតហេតុខាងលើ ខាងជនរងគ្រោះបានជិះម៉ូតូមកពីភ្នំពេញ ទៅផ្ទះនៅឃុំព្រែកអំបិល ។ លុះពេលជិះម៉ូតូមកដល់ចំនុចកើតហេតុ ស្រាប់តែមានជនសង្ស័យចំនួន០៣នាក់ ទី១ឈ្មោះ បុរី គឹមហំ ហៅ ហុង ទី២ឈ្មោះ ឡុង ច័ន្ទបូរឬទ្ធិ និងទី៣មិនស្គាល់អត្តសញ្ញាណ បានជិះម៉ូតូ០១គ្រឿងម៉ាកសង់ ដេញតាមជនរងគ្រោះ ហើយធាក់ម៉ូតូជនរងគ្រោះបណ្ដាលឱ្យដួល រួចជនសង្សយ័ឈ្មោះ បុរី គឹមហំ ហៅ ហុង ព្យាយាមលើកម៉ូតូរបស់ជនរងគ្រោះជិះគេចខ្លួន ។
ភ្លាមនោះ ជនរងគ្រោះបានស្រែកថាចោរៗ ក៏ត្រូវបានឈ្មោះ ហ៊ សុខម៉ិញ នៅក្បែរនោះរត់ជួយដេញចាប់ឃាត់ខ្លួនបានជនសង្យ័យឈ្មោះ ឡុង ចន្ទ័បូរឬទ្ធិ ចំណែកជនសង្សយ័ឈ្មោះ បុរី គឹមហំ ហៅ ហុង រត់គេចខ្លួនចេញពីកន្លែងកើតហេតុ ក៏ត្រូវបានសមត្ថកិច្ចនគរបាលស្រុកស្អាងឃាត់ខ្លួនបាន រីឯជនសង្ស័យម្នាក់ទៀតបានជិះម៉ូតូគេចខ្លួនបាត់ ។
ក្រោយពេលធ្វើការឃាត់ខ្លួនជនសង្ស័យឈ្មោះ បុរី គឹមហំ ហៅ ហុង និងឈ្មោះ ឡុង ច័ន្ទបូរឬទ្ធិ រួចមក នៅថ្ងៃទី២៥ ខែកក្កដា ឆ្នាំ២០២២ កម្លាំងសមត្ថកិច្ចផ្នែកនគរបាលយុត្តិធម៌នៃអធិការដ្ឋាននគរបាលស្រុកស្អាង សហការជាមួយកម្លាំងផ្នែកព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកណ្ដាល បានធ្វើការសាកសួរ រហូតបន្តធ្វើការឃាត់ខ្លួនជនសង្ស័យ ចំនួន០៣នាក់បន្ថែមទៀត ដែលជាបក្សពួក មានទី១ឈ្មោះ ខុន សឹងហាក់ ទី២ឈ្មោះ នី សុខឡៃ ទី៣ឈ្មោះ ធឿន លីន មកធ្វើការសាកសួរ ។
នៅចំពោះមុខសមត្ថកិច្ចនគរបាលជនសង្ស័យ បានឆ្លើយសារភាពថា ខ្លួននិងបក្សពួកខាងលើ ធ្លាប់ធ្វើសកម្មភាពធាក់ វ៉ៃប្លន់យកម៉ូតូនៅតាមផ្លូវ ចំនួន២៥លើកមកហើយ ៖នៅស្រុកស្អាង ស្រុកកោះធំ ស្រុកគៀនស្វាយក្រុងតាខ្មៅ និងស្រុកខ្លះក្នុងខេត្តតាកែវ ។ ចុងក្រោយនៅថ្ងៃទី២៤ ខែ០៧ ឆ្នាំ២០២២ ធ្វើសកម្មភាពនៅឃុំព្រែកគយនិងឃុំទឹកវិល ក៏ត្រូវសមត្ថកិច្ចចាប់ខ្លួនបានតែម្ដង។ នៅពេលធ្វើសកម្មភាពបានយកម៉ូតូទាំងនោះទៅលក់ឲ្យបុរសមិនស្គាល់អត្តសញ្ញាណនៅខេត្តតាកែវ និង ជួនកាលយកទៅលក់នៅរាជធានីភ្នំពេញ ។
បច្ចុប្បន្ន ជនសង្ស័យរួមទាំងវត្ថុតាងត្រូវបានឃាត់ខ្លួន និងចាប់យក បញ្ជូនមកអធិការដ្ឋាននគរបាលស្រុកស្អាង ដើម្បីចាត់ការទៅតាមនីតិវិធី ។
ចែករំលែកព័តមាននេះ