យកថ្នាំកណ្តុរលាយក្នុងបាយចង់សម្លា.ប់ប្រពន្ធ ប្តីថា ៖ មកពីស្រឡាញ់ខ្លាំងពេក!
រាជធានីភ្នំពេញ ៖ បុរសម្នាក់ដោយសារតែប្រច័ណ្ឌប្រពន្ធរបស់ខ្លួនជាមួយអ្នកផ្សេង ហើយនៅក្នុងខណៈពេលដែលនាងជាប្រពន្ធរវល់ទៅធ្វើការនៅរោងចក្រកាត់ដេរ
រាជធានីភ្នំពេញ ៖ បុរសម្នាក់ដោយសារតែប្រច័ណ្ឌប្រពន្ធរបស់ខ្លួនជាមួយអ្នកផ្សេង ហើយនៅក្នុងខណៈពេលដែលនាងជាប្រពន្ធរវល់ទៅធ្វើការនៅរោងចក្រកាត់ដេរ បុរសជាប្តីបានលួចដាក់ថ្នាំបំពុលកណ្ដុរ២កញ្ចប់ នៅក្នុងអង្ករដាំ បាយនិងម្ហូប ដើម្បីសម្លាប់នាងចោល មកពីខ្លួនស្រឡាញ់នាងខ្លាំងពេក ។
បុរសជាប្តីដែលប៉ងសម្លាប់ប្រពន្ធបាននិយាយថា «ខ្លួនមានរឿងច្រើនណាស់រយៈពេល៣ឆ្នាំមកហើយ ប៉ុន្តែមិនចង់និយាយទេ ហើយក៏មិនបាច់និយាយដែរ ខ្លួនស្រឡាញ់ប្រពន្ធខ្លាំងណាស់ តែពួកយើងមានការរកាំរកូសនឹងគ្នារហូត ទើបពេលនេះខ្លួនចង់ស្លាប់ និងចង់ឲ្យប្រពន្ធស្លាប់ទៅជាមួយគ្នាដែរ» ។
ហេតុការណ៍នោះ បានបង្កឲ្យមានការភ្ញាក់ផ្អើលនៅវេលា១១និង៥៥នាទីព្រឹកថ្ងៃទី៣០ ធ្នូ នៅមន្ទីពហុព្យាបាលនិងសម្ភព ឡាំ ប៊ុនថន ដែលមានទីតាំងស្ថិតនៅតាមបណ្ដោយផ្លូវជាតិលេខ៤ ខាងលិចផ្សារជម្ពូវ័ន ភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។
ចំពោះនាងជាប្រពន្ធមិនបានដឹងថា នៅក្នុងបាយមានថ្នាំពុល ហើយក៏មិនបានដឹងថា ប្ដីមានគំនិតអាក្រក់ចង់សម្លាប់នាងចោលបែបនេះដែរ ពេលដែលត្រឡប់មកពីធ្វើការអស់កម្លាំងផង នាងបានហូបបាយដែលមានថ្នាំពុលនោះអស់ជាច្រើន បណ្ដាលឲ្យពុលរងរបួសធ្ងន់ធ្ងរប្រកាច់បែកពពុះមាត់ និងសន្លប់ស្ដូកស្ដឹង ។ បន្ទាប់មកត្រូវបានគេនាំទៅកាន់មន្ទីរពហុព្យាបាល និងសម្ភព ឡាំ ប៊ុនថន ដើម្បីសង្គ្រោះបន្ទាន់ ។ ប៉ុន្តែដោយសារមានលក្ខណៈធ្ងន់ធ្ងរពេក គ្រូពេទ្យនៅទីនោះមិនហ៊ានមើលទេ និងបានឲ្យបញ្ជូនបន្តទៅកាន់មន្ទីរពេទ្យព្រះកុសុមៈ ។
ខណៈនោះអ្វីដែលធ្វើឲ្យមានការភ្ញាក់ផ្អើល និងហួសចិត្តនោះ គឺនៅក្នុងពេលដែលគេយកម៉ូតូរ៉ឺម៉កកង់បី និងរថយន្តពេទ្យទៅដឹកប្រពន្ធ យកទៅកាន់មន្ទីរពេទ្យព្រះកុសុមៈ ជននោះបានរារាំងយ៉ាងក្រាញននៀល មិនព្រមឲ្យយកទៅឡើយ ។ រហូតដល់កម្លាំងនគរបាលចុះទៅ ឃាត់ខ្លួនបុរសនោះ ទើបគេអាចយកនាងជា ប្រពន្ធទៅកាន់មន្ទីរពេទ្យបាន ។ សម្រាប់បុរសជាប្តីនេះក៏បានហូបបាយជាមួយប្រពន្ធដែរ ប៉ុន្តែហូបតិចទើបពុលស្រាលជាង ។
បុរសដែលប្រច័ណ្ឌប្រពន្ធ ឈ្មោះ ទូច សំអឿន អាយុ២២ឆ្នាំ មានស្រុកកំណើតនៅផ្ទះលេខអា៦៥ ក្នុងភូមិស្វាយតាអុក សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ។ ចំណែកស្ត្រីជាប្រពន្ធឈ្មោះ ធុង ស្រីកា អាយុ២២ឆ្នាំ ជាកម្មការិនីរោងចក្រកាត់ដេរ និងមានផ្ទៃពោះ៧ខែហើយ មានស្រុកកំណើតនៅក្នុងឃុំស្រែស្ដុក ស្រុកកណ្ដៀង ខេត្តពោធិ៍សាត់ សព្វថ្ងៃពួកគេទាំងពីរនាក់ ស្នាក់នៅផ្ទះជួលនៅក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ ។
ការចង់ធ្វើអត្តឃាតសម្លាប់ខ្លួន និងសម្លាប់ប្រពន្ធមានផ្ទៃពោះនេះ នៅមិនទាន់ដឹងថា ផ្ទៃក្នុងគ្រួសារមួយនេះមានរឿងធំប៉ុណ្ណានោះឡើយ ។ បន្ទាប់មក លោកអធិការបានឲ្យនគរបាលប៉ុស្ដិ៍ត្រពាំងក្រសាំងនាំជននោះទៅធ្វើការសួរនាំ និងស៊ើបអង្កេត ព្រមទាំងពិនិត្យបាយនៅផ្ទះជួលដែលពួកគេស្នាក់នៅដើម្បីកសាងសំណុំរឿង ៕
ចែករំលែកព័តមាននេះ