សាសនិកអ៊ិស្លាមរាប់រយនាក់ជំទាស់ការធ្វើផ្លូវក្បែរវិហារ
រាជធានីភ្នំពេញ ៖ បើទោះជាគណៈដឹកនាំនៃសាសនាអ៊ិស្លាមកម្ពុជា បានធ្វើការអនុម័តឯកភាពឲ្យសាលារាជធានីបន្តគម្រោងអភិវឌ្ឍន៍ដាក់ប្រព័ន្ធលូ
រាជធានីភ្នំពេញ ៖ បើទោះជាគណៈដឹកនាំនៃសាសនាអ៊ិស្លាមកម្ពុជា បានធ្វើការអនុម័តឯកភាពឲ្យសាលារាជធានីបន្តគម្រោងអភិវឌ្ឍន៍ដាក់ប្រព័ន្ធលូ និងបើកការដ្ឋានធ្វើផ្លូវសាធារណៈកាត់ដីវិហារអ៊ិស្លាមបឹងកក់ កាលពីថ្ងៃទី២៦ ធ្នូ កន្លងមកនេះក្តី ក៏មិនមែនជាឆន្ទៈរួមរបស់សាសនិកអ៊ិស្លាមទាំងមូលនោះទេ ។ ជាក់ស្ដែងនៅវេលាម៉ោង១២និង៣៥នាទីនាថ្ងៃទី៣០ ធ្នូ មានពលរដ្ឋអ៊ិស្លាមមកពីបណ្តាខេត្តនានាប្រមាណជា៦០០នាក់ ក្រោយពីបញ្ចប់ការសូត្រធម៌បាននាំគ្នាលុតជង្គង់មុខវិហារធ្វើការស្មឹងស្មាធរួច ក៏បាននាំគ្នាលើកបដាធ្វើការប្រឆាំងដាច់ខាតមិនឲ្យសាលារាជធានីធ្វើផ្លូវR4 កាត់ដីវិហារឡើយ ។ ពួកគេក៏បានអំពាវនាវដល់សម្តេចអគ្គមហាសេនាបតីតេជោហ៊ុន សែន មេត្តាជួយអន្តរាគមន៍ឲ្យសាលារាជធានីភ្នំពេញ ធ្វើផ្លូវវាងចេញពីដីវិហារវិញ ។
លោក អះម៉ាត់ យះយ៉ា បានប្រាប់អ្នកកាសែតថា លោកសុំឲ្យសាលារាជធានី ធ្វើផ្លូវតាមរបងវិហារគឺអស់បញ្ហា ហើយបងប្អូនខ្មែរគោរពបងប្អូនខ្មែរអ៊ិស្លាម រួចបងប្អូនសាសនិកអ៊ិស្លាមទាំងអស់ក៏គោរពព្រះពុទ្ធសាសនា យើងគោរពគ្នាទៅវិញទៅមក ដើម្បីកុំឲ្យមានបញ្ហានៅស្រុកខ្មែរ ។
លោកបន្ដថា តាំងពីជីដូនជីតាយើងមកមិនដែលមានបញ្ហាជាមួយបងប្អូនសាសនិកខ្មែរអ៊ិស្លាមនោះទេ យើងចង់រក្សាប្រពៃណី វប្បធម៌នេះតទៅទៀត ដូច្នេះមិនអាចធ្វើអ្វីស្រេចតែចិត្តនោះទេ ។ លោកបានសុំសាលារាជធានីភ្នំពេញសិក្សាឡើងវិញ ហើយយកប្លង់ដែលក្រុងចុះហត្ថលេខាហើយនោះមកពិភាក្សាគ្នា ។ លោក អះម៉ាត់ យះយ៉ា បានចោទថា ការឯកភាពគ្នាកាលពីថ្ងៃទី២៦ ធ្នូកន្លងមកនេះ មិនមែនជាការឯកភាពរបស់ប្រជាពលរដ្ឋតំណាងរបស់វិហារនោះទេ ហើយការធ្វើផ្លូវនេះដែរលោកឯកភាពឲ្យសាលារាជធានីភ្នំពេញធ្វើក្នុងរបងក៏បានដែរ មិនបាច់សងទេ តែធ្វើឲ្យឆ្ងាយបន្តិច ។ លោកបានចាក់បណ្ដោយថា បើយើងអត់មានឆន្ទៈដោះស្រាយទេ ហើយនៅចចេះរឹងរួសធ្វើកាត់របងគឺនាំគ្នាធ្វើទៅ ។
គួររំលឹកថា កាលពីរសៀលថ្ងៃទី២៦ ធ្នូ ក្នុងកិច្ចប្រជុំគណៈអ៊ីម៉ាំ គ្រប់លំដាប់ថ្នាក់តំណាងសាសនិកអ៊ិស្លាមទូទាំងប្រទេសរបស់គណៈដឹកនាំជាន់ខ្ពស់ នៃសាសនាអ៊ិស្លាមកម្ពុជា ក្រោមអធិបតីភាពលោក សុះ កំរី ចាងហ្វាង នៃ គណៈដឹកនាំជាន់ខ្ពស់ នៃសាសនាអ៊ិស្លាមកម្ពុជា, លោក ឃួង ស្រេង អភិបាលរងរាជធានីភ្នំពេញ ព្រមទាំងថ្នាក់ដឹកនាំឥស្សរជនអ៊ិស្លាមសំខាន់ៗប្រមាណជិត៧០០០នាក់ តំណាងឲ្យសាសនិកអ៊ិស្លាមទូទាំងប្រទេសជាង៧០ម៉ឺននាក់ បានប្រកាសថា ការធ្វើផ្លូវនេះ សំដៅឱ្យមានការអភិវឌ្ឍនៅអនាគត ។
លោកឧកញ៉ា អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា បានប្រកាសជំហររបស់សហគមន៍អ៊ិស្លាមថា សហគមន៍អ៊ិស្លាមនៅតែបន្ដគាំទ្រគម្រោងអភិវឌ្ឍន៍ឲ្យសាលារាជធានីភ្នំពេញដាក់ប្រព័ន្ធលូ និងបើកផ្លូវសាធារណៈនៅក្បែរវិហារអ៊ិស្លាមបឹងកក់នេះដើម្បីងាយស្រួលដល់ប្រជាពលរដ្ឋធ្វើដំណើរ ហើយការបើកផ្លូវនិងដាក់ប្រព័ន្ធលូនេះមិនមានផលប៉ះពាល់ណាមួយដល់វិហារនោះទេ ទោះបីជាមានការវាយកំទេចរបងខណ្ឌចែកដីសម្រាប់ស្ថាបនាផ្លូវរបស់រាជធានីភ្នំពេញ កាលពីថ្ងៃ២៣ ធ្នូកន្លងទៅក្តី ។
ដោយឡែកលោក ឃួង ស្រេង អភិបាលរងរាជធានីភ្នំពេញ បានបញ្ជាក់ដែរថា បើទោះបីសាសនិកអ៊ិស្លាមប្រមាណ៩០ភាគរយ បានគាំទ្រឲ្យសាលារាជធានីភ្នំពេញ ដាក់ប្រព័ន្ធលូ និងបើកផ្លូវR4 ដែលនៅក្បែវិហារអ៊ិស្លាមបឹងកក់នេះក៏ដោយ លោកនិងក្រុមការងារបច្ចេកទេស របស់រដ្ឋបាលរាជធានីភ្នំពេញ នៅតែរង់ចាំទទួលនូវពាក្យបណ្ដឹងជំទាស់រឿងគម្រោងការអភិវឌ្ឍបើកផ្លូវR4 នេះជានិច្ច តែជំហរសាលារាជធានី នៅតែបន្ដគម្រោងនេះទៅមុខដដែល បើទោះបីមានក្រុមបងប្អូនសាសនិកអ៊ិស្លាមមួយចំនួនមករារាំងមិនគាំទ្រគម្រោងនេះក្ដី ។
បញ្ហាហាក់ដូចជាកាន់តែសាំញ៉ាំទៅហើយជុំវិញការសាងសង់ផ្លូវកាត់ដីវិហារបឹងកក់នេះ ដែលតាមមើលទៅបងប្អូនខ្មែរអ៊ិស្លាមហាក់បានចែកជា២ក្រុមទៅហើយ ដែល១ក្រុមជាថ្នាក់ដឹកនាំ និងបានសំអាងថាជាតំណាងឱ្យបងប្អូនខ្មែរអ៊ិស្លាមទូទាំងប្រទេស ។ ឯមួយក្រុមទៀតហាក់ផ្ដើមចេញពីសាសនិកអ៊ិស្លាមតែម្ដង បានចេញមុខជំទាស់ម្សិលមិញនេះ ៕
ចែករំលែកព័តមាននេះ