លោករដ្ឋមន្ត្រីសន្យាជិះយន្តហោះពិនិត្យមើលបទល្មើសនេសាទ និងចុះបង្ក្រាបក្នុង1ខែម្តង
ខេត្តកំពង់ឆ្នាំង ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វ៉េង សាខុន បានប្រកាសថា លោកនឹងធ្វើការត្រួតពិនិត្យមើលទីតាំងបទល្មើស
ខេត្តកំពង់ឆ្នាំង ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វ៉េង សាខុន បានប្រកាសថា លោកនឹងធ្វើការត្រួតពិនិត្យមើលទីតាំងបទល្មើសនេសាទជុំវិញបឹងទន្លេសាប ហើយនឹងដឹកនាំក្រុមចម្រុះថ្នាក់ជាតិចុះបង្ក្រាបក្នុង១ខែម្តង នៅតំបន់ណាមានបទល្មើសនេសាទមិនទាន់អស់ ។
លោករដ្ឋមន្ត្រីបានថ្លែងបែបនេះ ក្រោយពីបានដឹកនាំក្រុមការងារចម្រុះថ្នាក់ជាតិចុះបង្ក្រាបបទល្មើសនេសាទ កាលពីថ្ងៃទី២៨ ខែធ្នូ នៅខេត្តពោធិ៍សាត់ និងខេត្តកំពង់ឆ្នាំង ។
លោករដ្ឋមន្ត្រី វ៉េង សាខុន មានប្រសាសន៍ទៀតថា ក្រុមការងារចម្រុះបង្ក្រាបបទល្មើសនេសាទនេះ គឺប្រមុខរាជរដ្ឋាភិបាលបានរៀបចំជាគណៈកម្មការអន្តរក្រសួងដើម្បីចុះបង្ក្រាបបទល្មើសនេសាទ ជាពិសេសបទល្មើសនេសាទដែលកើតមាននៅបឹងទន្លេសាប និងជុំវិញបឹងទន្លេសាប ។
កាលពីថ្ងៃទី២២ ខែធ្នូ កន្លងមក គណៈកម្មការអន្តរក្រសួងបានជិះឧទ្ធម្ភាគចក្រហោះ ត្រួតពិនិត្យសាជាថ្មីម្តងទៀតពីលើខេត្តកំពង់ឆ្នាំង ពោធិ៍សាត់ បាត់ដំបង សៀមរាប បន្ទាយមានជ័យ និងកំពង់ធំ ក្រោយពីសម្តេចក្រឡាហោម ស ខេង បានធ្វើដំណើរឆ្លងកាត់ទន្លេសាបនេះ គឺសម្តេចបានប្រទះឃើញភាពអនាធិបតេយ្យនៃបទល្មើសនេសាទកើតច្រើន ដូចនេះសម្តេចក្រឡាហោមបានស្នើសុំទៅប្រមុខរាជរដ្ឋាភិបាល ដើម្បីបង្កើតគណៈកម្មការអន្តរក្រសួងមួយនេះជាបន្ទាន់ដើម្បីចេញបង្ក្រាបបទល្មើសនេសាទ ។
នៅក្នុងការហោះពិនិត្យពីលើអាកាសឃើញថា បណ្តាខេត្តមួយចំនួនចេញប្រតិបត្តិការបង្ក្រាបបានល្អប្រសើរ ឯខេត្តមួយចំនួនទៀតនៅមានបទល្មើសនៅឡើយ ។
នៅថ្ងៃទី២៨ ខែធ្នូនោះដែរ ក្រុមការងារអន្តរក្រសួង ក៏ដូចជាអាជ្ញាធរដែនដីដែលមានគណៈបញ្ជាការឯកភាពខេត្ត ធ្វើការបង្ក្រាបរបាំងលបសាច់អួនបានជាង៣០របាំង ប៉ុន្តែទោះបីជាយ៉ាងណាក៏ដោយ តាមបទបញ្ជារបស់សម្តេចក្រឡាហោម គឺក្រុមការងារទាំងអស់ត្រូវធ្វើប្រតិបត្តិការបង្ក្រាបបទល្មើសឲ្យដូចភ្លៀងរលឹម៕
ចែករំលែកព័តមាននេះ