អ្នកបើករថយន្តកុងតឺន័រផែស្ងួត តេងឡាយ បុកគោគេងាប់ហើយលើកដាក់លើឡានបើករត់ទៀត
ខេត្តកំពង់ឆ្នាំង ៖ សមត្ថកិច្ចនគរបាលចរាចរណ៍ក្រុងកំពង់ឆ្នាំង បានចាប់ឃាត់រថយន្តកុងតឺន័រមួយគ្រឿង នៅវេលាម៉ោង ៦និង៣០នាទីយប់ ថ្ងៃទី២៩ ខែធ្នូ ឆ្នាំ២០១៦
ខេត្តកំពង់ឆ្នាំង ៖ សមត្ថកិច្ចនគរបាលចរាចរណ៍ក្រុងកំពង់ឆ្នាំង បានចាប់ឃាត់រថយន្តកុងតឺន័រមួយគ្រឿង នៅវេលាម៉ោង ៦និង៣០នាទីយប់ ថ្ងៃទី២៩ ខែធ្នូ ឆ្នាំ២០១៦ នៅចំណុចនិមិត្តសញ្ញាឆ្នាំងមាស របស់ខេត្តកំពង់ឆ្នាំង ស្ថិតក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង។ ការឃាត់ចាប់រថយន្តខាងលើគឺតាមបណ្តឹងរបស់ម្ចាស់គោ ដែលប្តឹងថា រថយន្តខាងលើបានបុកគោគាត់ងាប់ហើយ លើកដាក់លើរថយន្តបំណងលួចយកតែម្តង។
ក្រោយការចាប់ឃាត់រថយន្តខាងលើ អ្នកបើកបររថយន្តមានភាពច្រងេងច្រងាង ទម្រាំយករថយន្ត និងគោ១ក្បាល មកដាក់ការិយាល័យចរាចរណ៍ផ្លូវគោក នៃស្នងការនគរបាលខេត្ត ត្រូវប្រើពេលយូរ។ លោក ឈឹម សារុន ប្រធានការិយាល័យចរាចរណ៍ផ្លូវគោក របស់ស្នងការដ្ឋាននគរបាលខេត្តបានឲ្យថា ក្រោយពីម្ចាស់ចាប់ឃាត់រថយន្ត ជាមួយមន្ត្រីនគរបាលក្រុងកំពង់ឆ្នាំង ហើយធ្វើការសម្របសម្រួលមិនត្រូវគ្នារួចមក លោកស្នងការបានឲ្យយករថយន្ត និងគោងាប់មួយក្បាលនោះ មកស្នងការដ្ឋាន ដើម្បីដោះស្រាយ។
លោកបានបញ្ជាក់ថា នៅវេលាម៉ោង៣រសៀល ថ្ងៃទី២៩ ខែធ្នូ ឆ្នាំ២០១៦ រថយន្តកុងតឺន័រ១គ្រឿង របស់ក្រុមហ៊ុនផែស្ងួត តេងឡាយ បានបុកគោរបស់មន្ត្រីយោធាមួយរូប នៅចំណុចម្ដុំផ្លូវចូលបន្ទាយរបស់យោធាអង្គភាពអភិវឌ្ឍន៍ព្រៃខៀវ ស្ថិតនៅភូមិស្រះកែវ ឃុំមេលំ ស្រុកបរិបូរណ៍ ពេលបុកហើយ អ្នកបើកបរ និងព្រូ២-៣នាក់បានចងជើងគោ ហើយលើកដាក់លើឡាន ដឹកចេញមកតែម្តង។ ភ្លាមៗនោះម្ចាស់គោ បានប្តឹងដល់សមត្ថកិច្ចទើបចាប់ឃាត់រថយន្ត កុងតឺន័រ ជាមួយនឹងវត្ថុតាង គោងាប់មួយក្បាលលើរថយន្តផងដែរ។
នៅព្រឹកថ្ងៃទី៣០ ខែធ្នូ ឆ្នាំ២០១៦នេះ លោកប្រធានការិយាល័យចរាចរណ៍ផ្លូវគោកបានឲ្យដឹងថា នៅយប់ម៉ិញនេះ ការចចារសម្របសម្រួល មិនត្រូវគ្នានោះទេ ដោយម្ចាស់គោទារសំណង១លានរៀល បន្ថែមលើតម្លៃយកគោងាប់១ក្បាលនេះទៅលក់ឡៃឡុង។ តែភាគីអ្នកបើកបររថយន្តមិនព្រម នៅតែថាចាំថៅកែមកដោះស្រាយ។ ដោយហេតុនេះហើយ ខ្លាចសត្វគោនោះងាប់ស្អុយទើបសម្រេចបង្កើតគណៈកម្មការ មួយ លក់គោនោះឡៃឡុងឲ្យអ្នកកាប់គោ បានថ្លៃ៦០ម៉ឺនរៀល យកមកតម្កល់ទុកជាបណ្តោះអាសន្ន ដើម្បីរង់ចាំការដោះស្រាយបន្តនៅព្រឹកនេះទៀត។
ចំណែកអ្នកបើកបររថយន្តមិនព្រមផ្តិតមេដៃលើកំណត់ហេតុអ្វីទាំងអស់ សូម្បីកំណត់ហេតុលក់គោឡាយឡុង។ បើទោះបីបែបនេះក្តី សមត្ថកិច្ចនគរបាលបាននិយាយថា បើអ្នកបើបររថយន្តមិនព្រមដោះស្រាយ សម្របសម្រួលជាមួយម្ចាស់គោទេ វានឹងអាចក្លាយពីរឿងចរាចរណ៍មកបទល្មើសព្រហ្មទណ្ឌវិញ ព្រោះបានលើកគោគេដាក់លើរថយន្តចេញពីកន្លែងកើតហេតុ មិនប្រាប់ម្ចាស់គេ មានទោសស្មើលួច ព្រោះចំណុចកើតហេតុមានស្លាកសញ្ញា គោឆ្លងកាត់ទៀតផង៕
ចែករំលែកព័តមាននេះ