ខេត្តត្បូងឃ្មុំ ៖ ប្រជាពលរដ្ឋដែលមានផ្ទះនៅតាមសងខាងផ្លូវជាតិលេខ៧ ក្នុងភូមិយាយស ឃុំទន្លេបិទ ស្រុកត្បូងឃ្មុំ បាននាំគ្នាត្អូញត្អែថា រាល់ថ្ងៃនេះមានរថយន្តដឹកខ្សាច់-គ្រួសតូចធំ ចេញពីមាត់ទន្លេដឹកឡើងហៀរកំពប់លើថ្នល់រាប់ខែឆ្នាំមកហើយ។ កត្តានេះបង្កឲ្យមានផលប៉ះពាល់ដល់ការរស់នៅ សូម្បីតែការទទួលទានបាយ ត្រូវបាចទឹកលើផ្លូវ ឬចងកៅស៊ូតង់ជាដើម បើពុំនោះទេនឹងត្រូវឈ្លក់ ហើយថែមទាំងពិបាកនឹងដកដង្ហើមផងដែរ។
ស្ត្រីចំណាស់ម្នាក់ឈ្មោះ ស៊ឹម វណ្ណី អាយុ៥៩ឆ្នាំ នៅភូមិយាយស ប្រាប់ឲ្យដឹងនៅព្រឹកថ្ងៃទី៣០ ខែធ្នូ ឆ្នាំ២០១៦ថា ផ្ទះរបស់គាត់ដែលនៅជាប់នឹងផ្លូវជាតិ ហើយខាងមុខបានលក់ដូររបស់របរ ដើម្បីដោះស្រាយជីវភាពគ្រួសារ បានរងផលប៉ះពាល់ ដោយហុយមកចូលផ្ទះរបស់គាត់ជាច្រើនឆ្នាំមកហើយ ទោះបីខិតខំប្រាប់ដល់អាជ្ញាធរយ៉ាងណាក្តី ក៏នូវតែមិនមានប្រសិទ្ធិដដែល សូម្បីតែទូកញ្ចក់ដាក់លក់របស់របរនោះត្រូវបានរថយន្តបើកនៅលើថ្នល់ កិនក្រួសខ្ទាតផ្លាតមកត្រូវកញ្ចក់បែកថែមទៀត។ ស្ត្រីចំណាស់ ស៊ឹម វណ្ណី បានប្រាប់បន្តថា ក្នុង១ថ្ងៃៗខាងមុខផ្ទះត្រូវតែបោសសម្អាត៣ទៅ៤ដង ប្រមូលគ្រួសខ្សាច់ធ្លាក់មកលើផ្លូវចាក់ចោល បើមិនបោសឲ្យស្អាតទេស្រួលមិនស្រួល នៅពេលដែលមានរថយន្តបើកឆ្លងកាត់ទៅវិញទៅមក កិនគ្រួសនឹងខ្ទាតមកត្រូវសមាជិក ក្រុមគ្រួសាររបស់គាត់មិនខាន។
ដោយឡែកផ្ទះរបស់ស្ត្រីម្នាក់ទៀតដែលប្រកបរបរលក់មួក ក៏បានទទួលរងផលប៉ះពាល់ពីរថយន្តដឹកគ្រួសខ្សាច់ចេញពីទន្លេបិទនោះដែរ ច្រកចូលក្នុងផ្ទះត្រូវបានចងកៅស៊ូតង់បិទ ដើម្បីកុំឲ្យនៅពេលដែលនាំគ្នាហូបបាយទៅលំអងធូលី ហុយចូលចានបាយ ពួកគាត់សំណូមពរដល់លោកអភិបាលខេត្តមេត្តាជួយធ្វើយ៉ាងណា មានវិធានការក្តៅចំពោះរថយន្តដឹកគ្រួស-ខ្សាច់ ទាំងនោះផង។ កុំឲ្យជីវិតរស់នៅហឹតតែលំអងធូលី និងនាំឲ្យកើតមានរោគផ្លូវដង្ហើមផងដែរ។
យោងតាមកំណត់ហេតុប្រជុំនៅថ្ងៃទី២៣ ធ្នូ ២០១៦កន្លងទៅនោះ ត្រូវបានលោក គង់ សីហុង អធិការរងនគរបាលស្រុកត្បូងឃ្មុំ បានលើកឡើងថា សូមឲ្យប្រជាពលរដ្ឋ និងអ្នកដែលមានមធ្យោបាយធ្វើដំណើរឲ្យចេះគោរពច្បាប់ចរាចរណ៍ និងបញ្ហាមួយទៀតនៅក្នុងឃុំទន្លេបិទ ដោយសូមឲ្យម្ចាស់អាជីវកម្មខ្សាច់គ្រួសធ្វើការជួសជុលរថយន្ត ដែលធ្លុះធ្លាយ ដើម្បីកុំឲ្យជ្រុះខ្សាច់លើផ្លូវ និងធ្វើការគ្របបិទបាំងខ្សាច់គ្រួសនៅពេលដឹកចេញ ។
លោកអធិការរងនគរបាលស្រុកត្បូងឃ្មុំ ទទួលផែនសណ្តាប់ធ្នាប់បានបន្ថែមទៀតថា សុំឲ្យដេប៉ូខ្សាច់ជួយផ្សព្វផ្សាយដល់រថយន្តដឹកខ្សាច់ គ្រួសឲ្យចូលរួមអនុវត្តន៍សហការ ហើយក្រោយពីការផ្សព្វផ្សាយហើយ កងកម្លាំងនឹងធ្វើការចល័តមើលរថយន្តណាដែលមិនអនុវត្តន៍បិទបាំងធ្វើឲ្យហុយ នោះកងកម្លាំងចរាចរណ៍នឹងចាប់ផាកពិន័យរថយន្តនោះ។ ក្នុងកំណត់ហេតុក៏មានម្ចាស់អាជីវកម្មលក់ខ្សាច់គ្រួស ក្នុងនោះមាន១-ឈ្មោះ ថូ សុភ័ក្រ ២-ឈ្មោះ សេង សានិត ៣-ឈ្មោះ ឆេង ហ៊ួរ ៤-ឈ្មោះ វង់ ស្រីនាថ បានចុះហត្ថលេខាយល់ព្រមអនុវត្តន៍តាមការណែនាំរបស់សមត្ថកិច្ចក៏ដូចជាអាជ្ញាធរឃុំផងដែរ។
ចំណែកលោក ភិន ឈុន មេឃុំទន្លេបិទ មានប្រសាសន៍ឲ្យដឹងដែរថារូបលោកបានបើកកិច្ចប្រជុំបន្តទៀត នៅព្រឹកថ្ងៃទី៣០ ធ្នូ ដល់ក្រុមប្រឹក្សាឃុំ និងមេភូមិ ដើម្បីឲ្យបានដឹង និងមានមានវិធានការ ចំពោះរថយន្តដឹកខ្សាច់គ្រួស ដែលមិនព្រមគោរពតាមការណែនាំ ក្នុងកិច្ចប្រជុំកាលពីថ្ងៃទី២៣ ធ្នូកន្លងទៅនោះគឺក្នុងករណីដែលដឹកមិនគ្រប បណ្តាលឲ្យជ្រុះរាយប៉ាយតាមផ្លូវ នឹងត្រូវផាកពិន័យតាមច្បាប់។
សូមបញ្ជាក់ថា ទោះបីជាមានកិច្ចប្រជុំកាលពីថ្ងៃទី២៣ ធ្នូ កន្លងទៅ ទំនងជាម្ចាស់អាជីវកម្មលក់ខ្សាច់គ្រួសមិនបានផ្សព្វផ្សាយដល់អ្នកបើកបររថយន្តនោះទេ ព្រោះថានៅព្រឹកថ្ងៃទី៣០ ធ្នូ ស្រាប់តែមានរថយន្តដឹកខ្សាច់១គ្រឿងមិនខ្ចីគ្រប បើកមកឈប់មុខសាលាឃុំទន្លេបិទ ធ្វើយ៉ាងព្រងើយដោយមិនខ្វល់៕
ចែករំលែកព័តមាននេះ