លោកពូមៀន មេន ជាកសិកររស់នៅភូមិអូរតាប៉ោង ឃុំអូរតាប៉ោង ស្រុកបាកាន ខេត្តពោធិ៍សាត់ ។ គាត់មានបទពិសោធន៍ដាំម្នាស់បានយ៉ាងល្អ ម្នាស់របស់គាត់មានផ្លែធំៗ និងរសជាតិផ្អែមឆ្ងាញ់ ព្រោះគាត់ដាំដោយប្រើតែជីធម្មជាតិ (ជីអាចម៍ប្រចៀវ) ។ បទពិសោធន៍នេះ ជាគំនិតច្នៃប្រឌិតរបស់គាត់ផ្ទាល់ ។
១-ការរៀបចំកូនដាំ
ការដាំដំបូង គាត់បានទទួលពូជមកពីភូមិជិតខាង បន្ទាប់មកគាត់បានជ្រើសរើសខ្នែងម្នាស់
(កូនម្នាស់តូចៗដែលដុះនៅក្បែរផ្លែ) និងក្បាលដែលកាច់ចេញពីផ្លែ (ផ្លែទុំ) យកទៅដាំ ។ កាច់ភ្លាមកប់ដីដាំភ្លាម ។ លោកពូបានមានប្រសាសន៍ថា ការដាំក្បាល និងខ្នែងមានការដុះលូតលាស់ល្អដូចគ្នា ។
២-ការជ្រើសរើសទីកន្លែងដាំ និងការដាំ
ដោយដំណាំម្នាស់អាចធន់នឹងម្លប់បាន គាត់បានជ្រើសរើសកន្លែងដាំ ក្រោមឈើហូបផ្លែ ដូចជា ដាំក្រោមដើមល្មុត ក្រូច ទាបបារាំង ដូង និងតាមជាយរបង។ល។ ចំពោះពេលវេលាដាំដុះអាចដាំបានគ្រប់រដូវកាលឱ្យតែមានកូនដាំ ប៉ុន្តែរដូវដែលដាំដុះល្អ គឺរដូវភ្លៀង ព្រោះមានទឹក និងសន្សើមដែលអាចធ្វើឱ្យការលូតលាស់បាន
ល្អ ។
ក្នុងការដាំ គាត់បានយកខ្នែង ឬក្បាល ជីកកប់ដាំដោយទុកចំងាយពីដើម មួយទៅមួយ០,៥ម៉ែត្រ ។
៣-ការថែទាំ
លោកពូបានមានប្រសាសន៍ថា ដំណាំម្នាស់របស់គាត់ ពុំមានសត្វល្អិត ឬជំងឺបំផ្លាញទេ ។ នៅពេលសង្កេតឃើញមានស្មៅដុះ គាត់ធ្វើការជំរះស្មៅ និងបំផុសដី ព្រមទាំងកប់ជីលាមកប្រចៀវ និងលាមកគោបន្ថែមតាមជុំវិញគល់ ។ គាត់មិនសូវធ្វើការដាក់ជីច្រើនសាទេ ព្រោះដីមានជីជាតិ ម្យ៉ាងទៀត ដាំនៅក្រោមឈើហូបផ្លែ ធ្វើឱ្យជីជាតិដែលគាត់បានដាក់ក្នុងឈើហូបផ្លែ បានផ្តល់ទៅឱ្យដំណាំម្នាស់ដែរ ។ ចំពោះការស្រោចទឹក នៅរដូវប្រាំង គាត់ស្រោចក្រោយពីកប់កូនដាំហើយ១-២ដងប៉ុណ្ណោះ បើដាំនៅដើមរដូវវស្សា គាត់ពុំបានធ្វើការស្រោចទឹកទេ ។
៤-ការប្រមូលផល
ដំណាំម្នាស់ចាប់ពីដាំ រហូតដល់ពេលប្រមូលផលមានរយៈពេល៥ខែ ប៉ុន្តែចាប់ពីចេញផ្លែរហូតដល់ទុំមានរយៈពេលប្រហែល៣ខែ ។ គាត់បានសំគាល់ទៅលើផ្លែទុំអាចប្រមូលផលបាននៅពេលម្នាស់រីកក្រឡា និងមានពណ៌លឿង ឬលឿងទុំ ។ គាត់បានបញ្ជាក់ថា ម្នាស់ដែលបេះភ្លាមមានរសជាតិជូរអែម ។ ប៉ុន្តែបើយើងបេះទុករយៈពេល១-២យប់ ម្នាស់នឹងមានរសជាតិផ្អែមឆ្ងាញ់៕ (ដកស្រង់ចេញពីទស្សនាវដ្តីកសិករ)
ចែករំលែកព័តមាននេះ