រាជធានីភ្នំពេញ ៖ ឡុង ជិន មកពីក្លិបខ្លារខិនមានរិទ្ធ និងពេជ្រ ប៊ុនឆេន មកពីសមាគមកីឡាប្រដាល់ក្រសួងការពារជាតិ ត្រូវបានគេរៀបចំឱ្យជួបប្រកួតជាលក្ខណៈមិត្តភាពអន្តរជាតិជាមួយកីឡាករថៃនៅលើសង្វៀនស៊ីអិនស៊ី
រាជធានីភ្នំពេញ ៖ ឡុង ជិន មកពីក្លិបខ្លារខិនមានរិទ្ធ និងពេជ្រ ប៊ុនឆេន មកពីសមាគមកីឡាប្រដាល់ក្រសួងការពារជាតិ ត្រូវបានគេរៀបចំឱ្យជួបប្រកួតជាលក្ខណៈមិត្តភាពអន្តរជាតិជាមួយកីឡាករថៃនៅលើសង្វៀនស៊ីអិនស៊ី ថ្ងៃអាទិត្យ ទី១ មករា ខានស្អែកនេះ ។ ឡុង ជិន ត្រូវជួបប្រកួតជាមួយកីឡាករថៃឈ្មោះ រុងរឿងឡេក ស.ច.បួសាយ ក្នុងប្រភេទទម្ងន់៥៧គីឡូក្រាម ខណៈពេជ្រ ប៊ុនឆេន ជួបប្រកួតជាមួយកីឡាករថៃឈ្មោះ សងឃុំ ស.ច សាយបួរ ក្នុងប្រភេទទម្ងន់៥៤គីឡូក្រាម ។
ឡុង ជិន ធ្លាប់ប្រកួត៣៦ដង ឈ្នះ២៧ដង ចាញ់៦ដង ស្មើ៣ដង និងផ្ដួលគូប្រកួតឱ្យសន្លប់បាន៧ដង ក្នុងពេលកីឡាករថៃធ្លាប់ប្រកួត៨៣ដង ឈ្នះ៦០ដង ចាញ់២០ដង និងស្មើ៣ដង ។ គូនេះមិនធ្លាប់ជួបគ្នាពីមុនមកទេ ដូច្នេះគេរង់ចាំមើលថាតើឡុង ជិន ដែលមានប្រវត្តិប្រកួតតិចជាងកីឡាករថៃដាច់ឆ្ងាយយ៉ាងនេះអាចតស៊ូប្រកួតបានប៉ុន្មានទឹក។
រីឯពេជ្រ ប៊ុនឆេន ធ្លាប់ប្រកួត៣៨ដង ឈ្នះ៣៥ដង ចាញ់៣ដង និងផ្ដួលគូប្រកួតឱ្យសន្លប់២១ដង ក្នុងពេលកីឡាករថៃធ្លាប់ប្រកួតបាន៤៩ដង ឈ្នះ៣៥ដង ចាញ់១១ដង ស្មើ៣ដង ។
គូនេះថ្វីដ្បិតតែមានប្រវត្តិប្រកួតលើសខ្វះគ្នាបន្តិចមែនតែកុំមើលស្រាលលើពេជ្រ ប៊ុនឆេន ឱ្យសោះ ព្រោះអ្នកប្រដាល់មកពីសមាគមកីឡាប្រដាល់ក្រសួងការពារជាតិរូបនេះ មានល្បិចប្រយុទ្ធនៅលើសង្វៀនខ្ពស់គ្រាន់បើ ។
ចំណែកគូប្រកួតមិត្តភាពធម្មតាវិញមាន កីឡាករ ប្រោង រតនា មកពីក្លិបសាលវ័ន្តកីឡា ប្រកួតជាមួយកីឡាករ កេត ចាន់ឌី មកពីសមាគមកីឡាប្រដាល់ក្រសួងការពារជាតិ ។ កីឡាករ ឡុង ខេត្ត មកពីក្លិបខ្លារខិនមានរិទ្ធប្រកួតជាមួយកីឡាករ ធន់ មករា មកពីសមាគមកីឡាប្រដាល់ក្រសួងការពារជាតិ ។ កីឡាករភិន សុទី មកពីក្លិបបញ្ជាការដ្ឋានកងទ័ពជើងទឹក ប្រកួតជាមួយកីឡាករ ហាក់ ប៉ាន់ធី មកពីក្លិបរ៉ាហាប់ស្វាយប៉ាក និងគូចុងក្រោយកីឡាករ ជា កំសត់ មកពីក្លិបកងពលតូចលេខ៧០ ប្រកួតជាមួយកីឡាករ ម៉េង សុខសាន្ត មកពីក្លិបកុលបុត្រគុនខ្មែរ ៕
ចែករំលែកព័តមាននេះ