កីឡាទូកក្តោងទាក់ទាញមហាជនថ្ងៃដាច់ឆ្នាំ
រាជធានីភ្នំពេញ ៖ បើទោះជាប្រភេទកីឡាទូកក្តោង ឬហៅថា Sailing ទើបតែមានវត្តមានក្នុងប្រទេសកម្ពុជា ក្នុងរយៈពេល២ឆ្នាំចុងក្រោយ តែគេកត់សម្គាល់ថា កីឡាប្រភេទនេះទាក់ទាញយ៉ាងខ្លាំងពីសំណាក់មហាជន
រាជធានីភ្នំពេញ ៖ បើទោះជាប្រភេទកីឡាទូកក្តោង ឬហៅថា Sailing ទើបតែមានវត្តមានក្នុងប្រទេសកម្ពុជា ក្នុងរយៈពេល២ឆ្នាំចុងក្រោយ តែគេកត់សម្គាល់ថា កីឡាប្រភេទនេះទាក់ទាញយ៉ាងខ្លាំងពីសំណាក់មហាជន និងយុវជនដែលចង់ក្លាយខ្លួនជាកីឡាករ ។ ក្រោយពីជិះលេងកម្សាន្ត កីឡាទូកក្ដោង ក៏ត្រូវគេឃើញលេចធ្លោមិនធម្មតា ក្នុងព្រឹត្តិការណ៍បុណ្យសមុទ្រ ដែលរុញឱ្យមានការចាប់អារម្មណ៍ខ្ពស់សម្រាប់ចុងឆ្នាំ២០១៦ ដែលនឹងដាច់ឆ្នាំជាផ្លូវការនៅថ្ងៃនេះផងដែរ ។
លោក ថោង រដ្ឋាស័ក្ត ប្រធានសហព័ន្ធកីឡាទូកក្តោងកម្ពុជា បានឱ្យដឹងថា សម្រាប់បុណ្យសមុទ្រនៅខេត្តព្រះសីហនុដែលទើបតែបញ្ចប់មុននេះ គឺជាព្រឹត្តិការណ៍ទី២ហើយដែលសហព័ន្ធកីឡាទូកក្តោងកម្ពុជាបានបង្ហាញកីឡាករមួយនេះ តែសម្រាប់ចំណាប់អារម្មណ៍គឺមានកម្រិតខុសគ្នា ។ លោកថា ទាំងយុវជន និងមហាជនមានការចុះឈ្មោះចូលលេងកីឡាទូកក្ដោងយ៉ាងច្រើនកុះករ ដែលធ្វើឱ្យលោកមើលឃើញពីចលនាឈានឡើងរបស់កីឡាថ្មីនេះជាសាធារណៈ ។
លោកថា ក្រោយការបញ្ជ្រាបជាលើកទី១នេះកីឡាករទូកក្ដោងហាក់សស្រាក់សស្រាំជាមួយកីឡាថ្មីនេះ ដោយលោកបានចាត់ទុកថាមានការចាប់អារម្មណ៍មិនធ្លាប់មានពីស្រទាប់យុវជន ពិសេសពីភ្ញៀវទេសចរជាតិ និងអន្តរជាតិ ដែលបានមកចូលរួមក្នុងពិធីបុណ្យសមុទ្រ ។ លោកថា បណ្ដាភ្ញៀវ និងយុវជនកុះករបានលេងកម្សាន្តជាមួយទូកក្ដោង និងបានទទួលការបង្ហាត់បង្រៀនស្របគ្នាពីក្រុមអ្នកជំនាញបរទេស មកពីប្រទេសសិង្ហបុរី និងក្លិបរុស្ស៊ី (លោកខែបាំងឆត្រ) ដោយឥតគិតថ្លៃនៅក្នុងប៉ុន្មានថ្ងៃនោះ ។
លោកបន្តថា មកដល់ពេលនេះ សហព័ន្ធមានគ្រូបង្គោលមកពីកងទ័ពជើងទឹកកម្ពុជាចំនួន១០នាក់ និងមានក្រុមអ្នកជំនាញ មកពីបរទេសមួយចំនួនទៀត ដើម្បីជួយបង្ហាត់បង្រៀនដល់អ្នកស្ម័គ្រចិត្ត ឬអ្នកមានចំណាប់អារម្មណ៍លេងកីឡាទូកក្ដោង ។ ក្រៅពីនេះ សហព័ន្ធកីឡាទូកក្តោង បានបង្ហាត់បង្រៀនយុវជនកម្ពុជាដែលមានសមត្ថភាព និងទេពកោសល្យបានចំនួន៦រូបបន្ថែមទៀត បន្ថែមពីលើសមាសភាពអ្នកជំនាញដែលមានស្រាប់។ កីឡាករទាំងនោះត្រូវបានបង្ហាត់បង្រៀនយ៉ាងយកចិត្តទុកដាក់ពីក្រុមអ្នកជំនាញ និងបានសាកល្បងឱ្យចូលរួមប្រកួតប្រជែងជារបៀបមិត្តភាព ជាមួយកីឡាករមកពីប្រទេសថៃ ដោយទទួលបានការចាប់អារម្មណ៍យ៉ាងខ្លាំង និងមានការកោតសរសើរថាកីឡាករកម្ពុជាក៏មិនធម្មតា ថ្វីដ្បិតថាកីឡាទូកក្ដោងកម្ពុជាទើបតែលេចមុខមាត់ ។
លោកបញ្ជាក់ថា នៅឆ្នាំ២០១៧ សហព័ន្ធនឹងស្នើដាក់ប្រភេទកីឡានេះ ទៅក្នុងកម្មវិធីកីឡារបស់ក្រសួងអប់រំ យុវជន និងកីឡា ឱ្យទៅជាជម្រើសសម្រាប់កីឡាទូកក្តោង ឬ Sailing ដោយកំណត់យក២ប្រភេទ គឺប្រភេទ Leser 470 និងClass: RS one ។ លោកថា កីឡាទូកក្តោងធ្លាប់មានវត្តមាននៅកម្ពុជា ក្នុងទសវត្សឆ្នាំ៦០ជាង ប៉ុន្តែបន្ទាប់មកក៏ត្រូវបាត់បង់ទៅវិញ រហូតមកដល់ពេលនេះ ។ អ៊ីចឹងហើយទើបលោកនឹងធ្វើឱ្យប្រភេទកីឡាមួយនេះរស់ឡើងវិញ ដោយលោកមើលឃើញថា កីឡាទូកក្ដោងក៏ជាកីឡារបស់ស៊ីហ្គេម កីឡាអូឡាំពិក និងជាកីឡាអាស៊ីផងដែរ ដែលមិនពិបាកទាក់ទាញយុវជនឱ្យចូលហ្វឹកហាត់ ។ លោកថា សហព័ន្ធបានស្តារឡើងវិញដោយនាំមកនូវប្រភេទកីឡានេះជាថ្មី ហើយមានការគាំទ្រពេញទំហឹងពីប្រទេសសិង្ហបុរី និងមានកិច្ចសហការពីប្រទេសរុស្ស៊ីដែលជាអ្នកជ្រោមជ្រែង ។ ក្នុងនោះក៏មានការជួយឧបត្ថម្ភពីមន្ទីរពេទ្យបំរ៉ុងរ៉ាត់ ប្រទេសថៃ ដើម្បីឱ្យមានកីឡា Sailing ចូលរួមប្រកួតជាមួយបណ្តាប្រទេសក្នុងតំបន់ និងពិភពលោកផងដែរ ទើបកីឡាករទាំងអស់មានកម្លាំងចិត្ត ។
លោក ថោង រដ្ឋាស័ក្ត បានអំពាវនាវឱ្យមានការចូលលេងដោយសេរី និងឥតគិតថ្លៃនៅរាល់ពេលមានវត្តមានសហព័ន្ធទូកក្តោងទៅដល់តំបន់ដែលបងប្អូនរស់នៅដូចជាក្នុងព្រឹត្តិការណ៍បុណ្យសមុទ្រមុននេះ ។ ប៉ុន្តែបើចង់ចូលជាសមាជិកក្លិបក៏ត្រូវបំពេញកាតព្វកិច្ច និងស្ថិតនៅក្រោមការគ្រប់គ្រងរបស់សហព័ន្ធទូកក្តោងកម្ពុជាផងដែរ ដើម្បីចេញជាអាជ្ញាប័ណ្ណជូន។
យុវជន សូត្រ មេសា និង ហៀង ស៊ុនហេង បានបង្ហាញពីចំណង់ចំណូលចិត្តរបស់ពួកគេ ក្នុងការលេងកីឡាទូកក្តោងនេះ ។ ពួកគេបានអំពាវនាវឱ្យយុវជន ពិសេសអ្នករស់នៅជាប់នឹងសមុទ្រ ចូលរួមលេងឱ្យបានច្រើន ព្រោះកីឡានេះមានភាពល្បីល្បាញនៅលើសាកលលោក ហើយកម្ពុជាក៏អាចមានលទ្ធភាព បង្ហាញសមត្ថភាពនៅលើឆាកអន្តរជាតិបាន និងដណ្តើមយកភាពល្បីល្បាញលើប្រភេទកីឡា Sailing នេះផងដែរ ៕
ចែករំលែកព័តមាននេះ