ADផ្ទាំងផ្សព្វផ្សាយពាណិជ្ជកម្ម

Picture

ការ​ឆ្លើយ​តប​ជាមួយ​អតិថិជន​បង្ហាញ​ពី​អាកប្បកិរិយា និង​សេវាកម្ម

7 ឆ្នាំ មុន

តើ​ឆ្លើយ​តប​នឹង​សំណួរ​អតិថិជន​បែប​ណា​ដើម្បី​ឱ្យ​ពួក​គេ​ចាប់អារម្មណ៍ ?
អ្នកលក់​ជា​ច្រើន​រូប​នឹង​ជួប​បញ្ហា​ក្នុង​ការ​ឆ្លើយ​តប ឬ Comment របស់​អតិថិជន មិន​ច្រើន​ក៏​តិច​ដែរ ព្រោះថា

តើ​ឆ្លើយ​តប​នឹង​សំណួរ​អតិថិជន​បែប​ណា​ដើម្បី​ឱ្យ​ពួក​គេ​ចាប់អារម្មណ៍ ?
អ្នកលក់​ជា​ច្រើន​រូប​នឹង​ជួប​បញ្ហា​ក្នុង​ការ​ឆ្លើយ​តប ឬ Comment របស់​អតិថិជន មិន​ច្រើន​ក៏​តិច​ដែរ ព្រោះថា​អតិថិជន​ម្នាក់​ៗ​មានមុខ​របរ និង​ការ​រស់នៅ​ខុស​គ្នា ហើយ​ទម្លាប់​ក៏​ខុស​ៗ​គ្នា​ដែរ ។ ចំណុច​នេះ យើង​បន្ទោស​អតិថិជន​មិន​បាន​ទេ ហើយ​ក៏​មិន​អាច​ផ្លាស់​ប្តូរ​អ្វី​សម្រាប់​ពួក​គេ​ដែរ ប៉ុន្តែ​អ្វី​ដែល​យើង​ធ្វើ​បាន គឺ​ត្រូវ​រឹង​បុ​ឹ​ង និង​ឈរ​លើ​គោលការណ៍​របស់​ខ្លួន ។ យើង​ត្រូវ​មាន​គោល​គំនិត​ដូច​ជា បើ​ឆ្លើយ​តប​នឹង​អតិថិជន​នេះ​បែប​ណា ក៏​ត្រូវ​ឆ្លើយ​តប​ទៅ​កាន់​អតិថិជន​ដទៃ​ទៀត​ដូច​គ្នា​ដែរ ។ នេះ​ជា​អ្វី​ដែល​គួរ​មាន​ទុកជា​មូលដ្ឋាន ៖

១-​ពេលវេលា ៖
ពេលវេលា​សំខាន់​ណាស់​ក្នុង​ការ​ឆ្លើយ​តប បើសិនជា​អតិថិជន​សួរនាំ គឺ​បង្ហាញ​ថា ពួក​គេ​មាន​បញ្ហា ឬ​មានរឿង​សង្ស័យ​ចង់​សួរ​យើង និង​ត្រូវការ​ចម្លើយ​ភ្លាម​ៗ ។ ហេតុនេះ​ហើយ យើង​មិន​ត្រូវ​បោះបង់​នូវ​សំណួរ​តូចតាច​ឡើយ ។

ជា​ការ​ល្អ គួរតែ​ឆ្លើយ​តប​ឱ្យ​លឿន​កាន់តែ​ល្អ ប៉ុន្តែ​បើ​យឺត ក៏​ព្យាយាម​កុំឱ្យ​លើស​ពី​កន្លះ​ម៉ោង ព្រោះ​នៅ​ពេល​អតិថិជន​រង់ចាំ​យូរ គេ​នឹង​មាន​អារម្មណ៍មិនល្អ​ជា​មួ​ួ​យ​យើង ឬ​និយាយ​ថា យើង​មិន​ទុកចិត្ត​ពួក​គេ ។ ការ​ឆ្លើយ​តប​យឺត និង​មិន​ចាប់អារម្មណ៍​នឹង​សំណួរ​ខ្លះ គឺជា​គុណវិបត្តិ​របស់​អ្នកលក់ ។

២-​ហៅ​ឈ្មោះ​អតិថិជន ៖
ការ​ហៅ​ឈ្មោះ​អតិថិជន គឺ​ធ្វើ​ឱ្យ​ពួក​គេ​មាន​ទំនុកចិត្ត ហើយ​មាន​អារម្មណ៍ល្អ​ទាំង​អ្នកលក់ និង​អ្នកទិញ ។ ប៉ុន្តែ​តើ​អាច​ស្គាល់ឈ្មោះ​អតិថិជន​បាន​ដោយ​របៀប​ណា ? ចំណុច​នេះ គឺ​ចាប់ផ្តើម​ងាយ​ៗ​ពី​ការ​ណែនាំ​ខ្លួន​យើង​ជា​មុន បន្ទាប់​មក​សួរ​ឈ្មោះ​អតិថិជន ។ បើសិនជា​គេ​នៅ​ស្ងៀម ឬ​មិន​ប្រាប់ ក៏​ចាប់ផ្តើម​សួរ​បញ្ជាក់​ជា​ថ្មី​ម្តងទៀត ឬ​ហៅ​ថា បង​ៗ​ក៏​បាន ។ ប៉ុន្តែ​ត្រូវ​ញញិម​ជា​និច្ច​ក្នុង​ពេល​ជជែក​គ្នា ។

៣-​ហាម​ទិតៀន​អតិថិជន ៖
អ្វី​ដែល​អ្នកលក់​កាន់តែ​មិន​គួរ​ធ្វើ​នោះ គឺ​ការ​និយាយ​អាក្រក់​ពី​អតិថិជន ព្រោះ​វា​នឹង​បង្ហាញ​នូវ​អាកប្បកិរិយា​មិនល្អ​ជាមួយ​ពួក​គេ ព្រមទាំង​បង្ហាញ​ពី​សេវាកម្ម​អន់​ថយ​ផង​ដែរ ដែល​ធ្វើ​ឲ្យ​អតិថិជន​របស់​យើង​បាត់បង់​ទៅ ។

៤-​បញ្ចប់​ការ​សន្ទនា ឬ​ជជែក ៖
ការ​ជជែក​ជាមួយ​អតិថិជន​អាច​នឹង​ពេញចិត្ត​ខ្លះ និង​មិន​ពេញចិត្ត​ខ្លះ គឺជា​រឿង  ធម្មតា ។ ប៉ុន្តែ​រាល់​ការ​បញ្ចប់​សន្ទនា យើង​ត្រូវ​បញ្ចប់​ដោយ​ធ្វើ​ឱ្យ​អតិថិជន​ពេញចិត្ត​នឹង​សេវាកម្ម​របស់​យើង ទោះបីជា​ពួក​គេ​ទិញ ឬ​មិន​ទិញ​ទំនិញ​ក៏​ដោយ​។ ការ​អរគុណ ឬ​សួរ​ទៅ​កាន់​ពួក​គេ​ថា នឹង​ឲ្យ​ជួយ​អ្វី​ទៀត​ទេ ? គឺជា​ការ​បញ្ចប់​ដ៏​ល្អ ដែល​ធ្វើ​ឱ្យ​អតិថិជន​មាន​អារម្មណ៍​ជា​មិត្ត​ជាមួយ​យើង ឬ​ក្រុមហ៊ុន ។

អ្នកលក់​ទាំងឡាយ គួរតែ​មាន​វិធីសាស្ត្រ​ទាំង​៤​ខាងលើ​នេះ​ធ្វើ​ជា​ផ្លូវ ប៉ុន្តែ​ត្រូវ​មានចិត្ត​ស្រឡាញ់​សេវាកម្ម​ផង​ដែរ​ដើម្បី​ទទួលផល​ល្អ​ទាំង​អ្នកលក់ និង​អ្នកទិញ ។ បើសិនជា​យើង​ធ្វើ​គ្រប់យ៉ាង​ចេញពី​ចិត្ត​នោះ នឹង​អាច​បង្កើន​ទំនាក់ទំនង​កាន់តែ​ល្អជា​មួយ​អតិថិជន ៕