សម្រែករកយុត្តិធម៌ រឿងក្តីរថយន្តបុកប៉ូលិស ក្រុមអ្នកគាំទ្រទាមទារឱ្យដោះលែងអ្នកបើកបរ
ខេត្តបន្ទាយមានជ័យ ៖ ប្រពន្ធកូន ប្អូនប្រុសបង្កើត និងសាច់ញាតិ ព្រមទាំងអ្នកគាំទ្រលោក ឌិន ពុទ្ធី ជាអ្នកបើកបររថយន្ត ដំបូងមានប្រមាណ២០នាក់ បាន
ខេត្តបន្ទាយមានជ័យ ៖ ប្រពន្ធកូន ប្អូនប្រុសបង្កើត និងសាច់ញាតិ ព្រមទាំងអ្នកគាំទ្រលោក ឌិន ពុទ្ធី ជាអ្នកបើកបររថយន្ត ដំបូងមានប្រមាណ២០នាក់ បាន
ខេត្តបន្ទាយមានជ័យ ៖ ប្រពន្ធកូន ប្អូនប្រុសបង្កើត និងសាច់ញាតិ ព្រមទាំងអ្នកគាំទ្រលោក ឌិន ពុទ្ធី ជាអ្នកបើកបររថយន្ត ដំបូងមានប្រមាណ២០នាក់ បានប្រមូលផ្តុំគ្នាធ្វើបាតុកម្មនិងសំឡេងស្រែកទ្រហោយំដង្ហោយរកយុត្តិធម៌នៅមាត់ច្រកនៅមាត់ច្រកទ្វារអន្តរជាតិប៉ោយប៉ែតព្រឹកថ្ងៃទី២៩ ធ្នូ ។
ការតវ៉ាដ៏កក្រើកនេះបានកើតឡើងក្រោយពីលោក ឌិន ពុទ្ធី ត្រូវបានតុលាការខេត្តបន្ទាយមានជ័យសម្រេចឃុំខ្លួនបណ្តោះអាសន្នក្នុងរឿងក្តីគ្រោះថ្នាក់ចរាចរណ៍មួយកាលពីព្រឹកថ្ងៃទី២២ ធ្នូ កន្លងទៅថ្មីៗលើស្ពានព្រំដែនមិត្តភាពកម្ពុជា-ថៃនៃច្រកទ្វារអន្តរជាតិប៉ោយប៉ែត និងបន្ទាប់ពីស្ថាប័នអយ្យកាអមសាលាដំបូងបានចេញសេចក្តីប្រកាសព័ត៌មាន ដែលបង្ហាញចំណុចមន្ត្រីប៉ូលិសដោយចោទថា រថយន្តលោក ឌិន ពុទ្ធី បានបុកឱ្យរបួសមែន ។ ទោះជាមានការប្រកាសអះអាងបែបណាក៏ដោយតាមរយៈឃ្លីបវីដេអូ នៅតែត្រូវបានអ្នកតាមដានផ្តោតការយកចិត្តទុកដាក់ដដែលថា មន្ត្រីប៉ូលិសអន្តោប្រវេសន៍រូបនោះបានធ្វើជាដួលគួរឱ្យហួសចិត្ត ។
ភរិយាលោក ឌិន ពុទ្ធី គឺអ្នកស្រី ហ៊ុំ ច្រៀន អាយុ៣៥ឆ្នាំ បានពរកូនប្រុសនៅនឹងចង្កេះបានស្រែកទ្រហោយំទាមទារសុំឪ្យតុលាការដោះលែងប្តីរបស់អ្នកស្រី ខណៈលោក ឌិន ធីរិទ្ធ ប្អូនប្រុសបង្កើតលោក ឌិន ពុទ្ធី និងសាច់ញាតិមួយចំនួនទៀតក៏ស្រែកទ្រហោយំដូចគ្នា ដោយឈរកាន់រូបថតលោក ឌិន ពុទ្ធី និងមានសរសេរបដាឈ្មោះជាអក្សរធំៗផងដែរ ។
ការតវ៉ានេះដំបូងគេឃើញមានមនុស្សមិនដល់២០នាក់ទេ ហើយសមត្ថកិច្ចជំនាញពាក់ព័ន្ធបាននាំគ្នារុញច្រានឪ្យទៅធ្វើលើចិញ្ចើមផ្លូវមុខអតីតក្លោងទ្វារកាស៊ីណូហ្គោលដឹនក្រោននៅខាងកើតខ្លោងទ្វារប្រាសាទកំពូល៣ច្រកទ្វារព្រំដែនប្រហែន៧០ម៉ែត្រ ។ ក្រោយមកចំនួនអ្នកចូលរួមក៏កាន់តែមានចំនួនច្រើនឡើងៗដល់រាប់រយនាក់ និងស្រែកទាមទាររកយុត្តិធម៌យ៉ាងកងរំពង ។ មិនតែប៉ុណ្ណោះក្រុមអ្នកតវ៉ាបានព្យាយាមសម្រុកទៅធ្វើការតវ៉ានៅលើស្ពានព្រំដែនម្តងហើយម្តងទៀត ទើបសមត្ថកិច្ចបន្ថែមកម្លាំងជាច្រើននាក់មានទាំងនគរបាលការពារព្រំដែនគោកខាងជើង និងខាងត្បូងផ្លូវជាតិលេខ៥ (វរ៨៩១និង៩១១) ដើម្បីទប់ស្កាត់រុញច្រានមិនឪ្យក្រុមអ្នកតវ៉ាបិទស្ពានព្រំដែន ព្រោះអាចធ្វើឪ្យប៉ះពាល់ដល់ទំនិញសេដ្ឋកិច្ចពាណិជ្ជកម្មនិងភ្ញៀវទេសចរណ៍បរទេសដែលធ្វើដំណើរឆ្លងកាត់ ។
នៅម៉ោងជាង១១ព្រឹកថ្ងៃដដែលក្រុមអ្នកតវ៉ាបានរុលជិតដល់ខ្លោងទ្វារប្រាសាទកំពូល៣នៃច្រកទ្វារ ភ្លាមនោះដោយខ្លាចទប់ទល់ស្ថានការណ៍មិនបាន សមត្ថកិច្ចបានសម្រេចចិត្តយករបាំងដែកចែកទ្រូងផ្លូវយកទៅដាក់កាត់ទទឹងផ្លូវហើយកម្លាំងសមត្ថកិច្ច និងក្រុមអ្នកតវ៉ាបានរុញច្រានគ្នាទៅវិញទៅមកដូចគេលេងល្បែងទាញព្រ័ត្រ ។
ដោយសារការចរចាម្តងហើយម្តងទៀតនៅតែមិនត្រូវគ្នា ហើយក្រុមអ្នកតវ៉ានៅតែមានបំណងរុលទៅស្ពានព្រំដែនសមត្ថកិច្ចសម្រេចចិត្តចាប់ស្ត្រី២នាក់ដែលម្នាក់ជាប្អូនស្រីបង្កើតលោក ឌិន ពុទ្ធី ឈ្មោះ ឌិន រ៉ាវ៉ាន់ អាយុ២៥ឆ្នាំ និងម្នាក់ជាបងថ្លៃលោក ឌិន ពុទ្ធី ឈ្មោះ ហ៊ុំ ច្រើក ភេទស្រី អាយុ៣៧ឆ្នាំ (បងស្រីបង្កើតរបស់ភរិយាលោក ឌិន ពុទ្ធី) យកដាក់រថយន្តដឹកចេញទៅ ។ បន្ទាប់មកក្រុមអ្នកតវ៉ាក៏ព្រមស្តាប់តាមការចរចារកដំណោះស្រាយពីសំណាក់លោកវរសេនីយ៍ឯក សិទ្ធ ឡោះ ស្នងការរងនគរបាលខេត្ត និងអភិបាលក្រុងប៉ោយប៉ែត ដោយទាំងសមត្ថកិច្ច និងក្រុមអ្នកតវ៉ាបាននាំគ្នាចាកចេញពីច្រកទ្វារព្រំដែនដើរតាមផ្លូវជាតិលេខ៥ទៅទិសខាងកើត រហូតដល់បរិវេណវត្តបាលិលេយ្យ ភូមិក្បានស្ពាន២ សង្កាត់ប៉ោយប៉ែត ទើបបើកការសម្រុះសម្រួលគ្នា ។
ការជួបចរចានៅក្នុងវត្តបាលិលេយ្យជាមួយក្រុមអ្នកតវ៉ាគេឃើញមានវត្តមានលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត លោក អាត់ ខែម ស្នងការដ្ឋាននគរបាលខេត្តមេបញ្ជាការ មេបញ្ជាការរងមកពីអង្គភាពក្នុងខេត្តផងដែរ ។ ក្រោយជំនួបផ្ទាល់មាត់ក្រុមអ្នកតវ៉ាបានរើសតំណាង៥នាក់ឡើងរថយន្តទៅកាន់សាលាក្រុងប៉ោយប៉ែតដើម្បីរកដំណោះស្រាយបន្ត ។
គួររំលឹកថា លោក ឌិន ពុទ្ធី ឬ ម៉ង់ ពុទ្ធី ជាប្រធានសមាគមពង្រឹងសេដ្ឋកិច្ចក្រៅប្រព័ន្ធហៅកាត់ថា CIERA មានទីស្នាក់ការ និងលំនៅឋាននៅភូមិសាមគ្គីមានជ័យ សង្កាត់ប៉ោយប៉ែត ។
ប្រធានសមាគមរូបនេះ រងការចោទប្រកាន់ថា បានបើករថយន្តបុកលោកវរសេនីយ៍ត្រី ឈាន ពិសិដ្ឋ នាយរងប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត កាលពីព្រឹកថ្ងៃទី២២ ធ្នូ កន្លងទៅថ្មីៗនេះដែលករណីខាងលើ បានធ្វើឪ្យមជ្ឈដ្ឋានមួយចំនួនយកទៅបង្ហោះក្នុងបណ្តាញសង្គមហ្វ៊េសប៊ុកចោទថា នាយរងប៉ុស្តិ៍រូបនោះធ្វើពុត ខណៈហ្វេសប៊ុកមួយចំនួនទៀតបង្ហោះថា លោក ឈាន ពិសិដ្ឋ រងរបួសធ្ងន់ និងកំពុងសម្រាកព្យាបាលនៅឯមន្ទីរពេទ្យប្រទេសថៃ ។
ភរិយា និងសាច់ញាតិលោក ឌិន ពុទ្ធី អះអាងថា ការតវ៉ាថ្ងៃនេះក្នុងគោលបំណងឪ្យតុលាការដោះស្រាយរឿងក្តីខាងលើឪ្យបានត្រឹមត្រូវ និងមានយុត្តិធម៌ ម្យ៉ាងដោយសារពេលទិញចំណីអាហារ និងថ្នាំពេទ្យទៅឪ្យលោក ឌិន ពុទ្ធី បែរជាគេមិនអនុញ្ញាតិ ។ លោកវរសេនីយ៍ឯកសិទ្ធ ឡោះ ស្នងការរងនគរបាលខេត្តប្រាប់ក្រុមអ្នកតវ៉ាថា ដរាបណាក្រោយ១៥ថ្ងៃដែលជនសង្ស័យត្រូវតុលាការសម្រេចឃុំខ្លួនបណ្តោះអាសន្នទើបអាចចូលជួបបាន ។
មិនដឹងថា មានដំណោះស្រាយបែបណានោះទេជុំវិញបាតុភាពដែលបានកើតឡើងនេះ ព្រោះអ្នកតាមដានខ្លះកំពុងតែចែកប៉ូលគ្នាសម្រាប់ការវិភាគលើបាតុភាពនេះ ដោយជំហរគាំទ្ររៀងៗខ្លួន ហើយវីដេអូប្លែកៗក៏ត្រូវបានគេបង្ហោះហាក់ចំអកដល់និតិវិធីរបស់តុលាការដែរ ។
យោងតាមការសម្ភាសតាមទូរស័ព្ទលោក ង៉ោ ម៉េងជ្រួន ប្រាប់ថា លទ្ធផលគ្មានអ្វីក្រៅពីការសម្របសម្រួលឪ្យពួកគេ(ក្រុមអ្នកតវ៉ា)ធ្វើតាមការស៊ើបអង្កេតរកយុត្តិធម៌របស់តុលាការនោះទេ និងឪ្យពួកគេធ្វើកិច្ចសន្យាបញ្ឈប់ការធ្វើបាតុកម្ម ។ លោកបន្តថា បើចង់តវ៉ាត្រូវធ្វើតាមប្រព័ន្ធច្បាប់ ព្រោះបាតុកម្មត្រូវសុំច្បាប់ មិនត្រូវទៅធ្វើបិទផ្លូវអន្តរជាតិនោះទេ បើបាតុកម្មបិទផ្លូវវាផ្ទុយនឹងច្បាប់ ។
លោកថា តំណាងក្រុមអ្នកតវ៉ាក៏បានឯកភាពធ្វើកិច្ចសន្យាហើយដែរ ។ ដោយឡែកលោក ឌិន ធីរិទ្ធ តំណាងក្រុមអ្នកតវ៉ាមិនអាចទាក់ទងសុំការអធិប្បាយបានទេ ព្រោះទូរស័ព្ទហៅចូលជាច្រើនដងតែគ្មានអ្នកទទួល ៕
ចែករំលែកព័តមាននេះ