ខេត្តបាត់ដំបង ៖ សមត្ថកិច្ចបានរាយការណ៍ថា អគ្គិភ័យដែលម្ចាស់ផ្ទះអះអាងថា បណ្ដាលមកពីការទុស្សេខ្សែភ្លើង បានលេបត្របាក់លំនៅឋានមួយខ្នងអស់ទាំងព្រឹក នៅភូមិអំពិល
ខេត្តបាត់ដំបង ៖ សមត្ថកិច្ចបានរាយការណ៍ថា អគ្គិភ័យដែលម្ចាស់ផ្ទះអះអាងថា បណ្ដាលមកពីការទុស្សេខ្សែភ្លើង បានលេបត្របាក់លំនៅឋានមួយខ្នងអស់ទាំងព្រឹក នៅភូមិអំពិល ឃុំអំពិលប្រាំដើម ស្រុកបវេល កាលពីវេលាម៉ោង៧និង៣០នាទីព្រឹក ថ្ងៃទី២៩ ធ្នូ ខណៈម្ចាស់ផ្ទះកំពុងអង្គុយខាងក្រោមផ្ទះ។ លោកអឿម ទិត្យ អធិការស្រុកបវេល បានឲ្យដឹងថា លំនៅឋានដែលត្រូវអគ្គិភ័យឆាបឆេះអស់ទាំងព្រឹកនោះធ្វើពីឈើប្រក់ស័ង្កសី ទំហំ៨ម៉ែត្រ គុណនឹង៩ម៉ែត្រ មានបន្ទប់ថ្មតូចមួយនៅខាងក្រោម រីឯម្ចាស់ផ្ទះឈ្មោះ ដាង ឌួន អាយុ៦១ឆ្នាំ និងប្រពន្ធឈ្មោះ គី ហេង អាយុ៥៦ឆ្នាំ។
លោកអធិការបានបញ្ជាក់ថា អគ្គិភ័យនោះបានចាប់ផ្ដើមឆេះពីលើមកមុន ខណៈម្ចាស់ផ្ទះកំពុងអង្គុយនៅខាងក្រោម ហើយក្នុងរយៈពេលដ៏ខ្លីបំផុត ដែលរថយន្តពន្លត់អគ្គីភ័យរបស់សមត្ថកិច្ចមិនអាចជួយអន្តរាគមន៍ទាន់ពេលវេលា ស្របពេលចម្ងាយផ្លូវវែងឆ្ងាយផង តែមិនបង្កគ្រោះថ្នាក់ដល់មនុស្សទេ។ បើតាមការបំភ្លឺពីម្ចាស់ផ្ទះឈ្មោះ ដាង ឌួន បានប្រាប់សមត្ថកិច្ចថា អគ្គិភ័យនោះអាចបណ្ដាលពីការទុស្សេខ្សែភ្លើង នៅម្ដុំហឹងកុងម៉ានៅលើផ្ទះ។
គាត់និយាយថា ពេលដែលអគ្គិភ័យឆាបឆេះឡើង គឺគ្រួសារគាត់កំពុងអង្គុយនៅខាងក្រោមផ្ទះទាំងអស់ លុះអ្នកភូមិស្រែកឆោឡោឡើង ឃើញផ្សែងឃ្មួលខ្មាញ់ខាងលើផ្ទះគាត់ ទើបមានការភ្ញាក់ផ្អើលតែម្ដង។ លោក ដាង ឌួន បាននិយាយទៀតថា អគ្គិភ័យបានឆេះបំផ្លាញផ្ទះ និងសម្ភារៈអស់គ្មានសល់ រួមមានលុយខ្មែរចំនួន៥០ម៉ឺនរៀល និងលុយថៃចំនួន២៦,០០០បាត។ រីឯទ្រព្យសម្បត្តិ និងសម្ភារផ្សេងទៀតក៏ក្លាយជាចំណីភ្លើងដែរ លើកលែងតែស្រូវនៅក្រោមផ្ទះប៉ុន្មានបាវប៉ុណ្ណោះដែលសង្គ្រោះបាន ដោយសារសមត្ថកិច្ចទៅជួយអន្តរាគមន៍ទាន់ពេល។
លោក អឿម ទិត្យ អធិការស្រុកបវេល ក៏បានបញ្ជាក់ដែរថា អគ្គិភ័យនោះបំផ្លាញទ្រព្យសម្បត្តិគ្មានសល់ តែមិនបង្កគ្រោះថ្នាក់ដល់មនុស្សទេ។ លោកបានបញ្ជាក់បន្ថែមថា រថយន្តពន្លត់អគ្គិភ័យរបស់សមត្ថកិច្ចបានចេញអន្តរាគមន៍ភ្លាមៗដែរ តែដោយសារផ្លូវឆ្ងាយ ហើយលំនៅឋាននោះធ្វើពីឈើ ដែននាំឲ្យអគ្គីភ័យឆេះលឿនបំផុត ដូច្នេះហើយទើបមិនអាចជួយអន្តរាគមន៍ទាន់ពេលបាន តែបានបាញ់ទឹកជួយសង្គ្រោះស្រូវបានជាច្រើនបាវ ដែលម្ចាស់ទុកនៅខាងក្រោមផ្ទះ៕
ចែករំលែកព័តមាននេះ