រាជធានីភ្នំពេញ ៖ នៅថ្ងៃសៅរ៍ ទី៣១ ធ្នូ ខានស្អែកនេះ ស្ថានីយទូរទស្សន៍អប្សរានឹងរៀបចំឱ្យមានព្រឹត្តិការណ៍ប្រកួតដណ្ដើមខ្សែក្រវាត់Naga Worldក្នុងប្រភេទទម្ងន់៦២គីឡូក្រាមរវាងកីឡាករកម្ពុជា និងកីឡាករថៃ ។ កីឡាករកម្ពុជាយ៉េន ឌីណា មកពីសមាគមកីឡាប្រដាល់ក្រសួងកសិកម្ម ប្រកួតជាមួយកីឡាករថៃឈ្មោះYorth Sith និងស៊ឹម វ៉ាន់ដេត មកពីក្លិបឬទ្ធិពោធិសែនជ័យ ប្រកួតជាមួយកីឡាករថៃឈ្មោះ Kolab Damm ។
តាមការឱ្យដឹងពីអ្នករៀបចំព្រឹត្តិការណ៍នេះថា ការប្រកួតនេះធ្វើឡើងជាលក្ខណៈជម្រុះវិលជុំដើម្បីស្វែងរកអ្នកមានពិន្ទុច្រើនជាងគេឡើងមកប្រកួតនៅវគ្គផ្ដាច់ព្រ័ត្រដណ្ដើមខ្សែក្រវាត់ដែលនៅទំនេរ ។ គួររំលឹកថា ព្រឹត្តិការណ៍នេះ មិនមែនទើបតែរៀបចំឡើងជាលើកទី១នោះទេ គឺស្ថានីយទូរទស្សន៍អប្សរាក្រោមកិច្ចសហការឧបត្ថម្ភរបស់ Naga World បានរៀបចំឱ្យមានជាច្រើនលើករួចមកហើយ ។
គេមិនទាន់ដឹងថា តើកីឡាករកម្ពុជាទាំង២រូបនេះអាចទៅរួចអត់ពេលជួបកីឡាករថៃលើកនេះទេ ព្រោះកីឡាករថៃទាំង២រូបនេះសុទ្ធតែជាអ្នកដែលមានបទពិសោធន៍ប្រកួតនៅលើសង្វៀនយ៉ាងជោកជាំ ថែមទាំងធ្លាប់មកប្រកួតនៅលើសង្វៀនស្រុកខ្មែរជាញឹកញាប់ទៀតផង ។
ចំណែកយ៉េន ឌីណា អ្នកធ្លាប់តាមដានការប្រកួតភាគច្រើនពិតជាបានដឹងច្បាស់ណាស់ថា កីឡាករកម្ពុជារូបនេះមានថ្វីដៃប្រកួតល្អគួរសម ទាំងផ្លែកែងនិងជង្គង់អាចប្រើការបានយ៉ាងស្ទាត់ជំនាញ ឯចិត្តក៏សឿងថែមទៀត ។
ស៊ឹម វ៉ាន់ដេត ជួបកីឡាករថៃលើកនេះពិបាកវាយតម្លៃទុកមុនពីការចាញ់ឈ្នះណាស់ព្រោះរូបគេជាអ្នកប្រដាល់មិនសូវល្បីឈ្មោះហើយ យូរៗម្ដងទើបគេឃើញលេចមុខនៅលើសង្វៀន។
ដូច្នេះថ្វីដៃប្រកួតរបស់គេមិនដឹងថានៅខ្លាំងដូចមុនឬយ៉ាងណានោះទេ ខណៈកីឡាករថៃអត់មានអ្នកណាដឹងពីប្រវត្តិប្រកួតច្បាស់លាស់ដូចគ្នា ។ ទោះបីយ៉ាងណាអ្នករៀបចំការប្រកួតបានឱ្យដឹងថា គូនេះអាចស៊ីសងគ្នាបាន ។
សូមបញ្ជាក់ថា សម្រាប់ការប្រកួតជាលក្ខណៈម៉ារ៉ាតុងបែបនេះគឺវគ្គ១ប្រកួតតែ៣ទឹកប៉ុណ្ណោះក្នុងមួយទឹកមាន៣នាទីសម្រាក២នាទី ដល់វគ្គផ្ដាច់ព្រ័ត្រប្រកួត៥ទឹកពេញ ក្នុងមួយទឹកមាន២នាទីសម្រាក១នាទី ។
ដោយឡែកគូប្រកួតមិត្តភាពធម្មតាវិញមានកីឡាករ លីន វាសនា មកពីក្លិបបូរីរាជសីហ៍មានរិទ្ធ ប្រកួតជាមួយកីឡាករ ធឿន ធារ៉ា មកពីសមាគមកីឡាប្រដាល់ក្រសួងកសិកម្ម និងគូចុងក្រោយកីឡាករ កំពែង ខ្មៅ មកពីក្លិបអប្សរាគុនខ្មែរ ប្រកួតជាមួយកីឡាករ គឿម សុវណ្ណឌឿត មកពីក្លិបឃ្លាំងមឿងកីឡា ៕
ចែករំលែកព័តមាននេះ