រាជធានីភ្នំពេញ ៖ កម្ពុជានឹងសាងសង់កំពង់ផែសមុទ្រទឹកជ្រៅ ស្ថិតនៅខេត្តព្រះសីហនុ មានជម្រៅជាង១៤ម៉ែត្រនាឆ្នាំខាងមុខ ដែលអាចឱ្យកប៉ាល់៩៣% កំពុងធ្វើដំណើរជុំវិញពិភពលោកអាចចូលសំចតបាន
រាជធានីភ្នំពេញ ៖ កម្ពុជានឹងសាងសង់កំពង់ផែសមុទ្រទឹកជ្រៅ ស្ថិតនៅខេត្តព្រះសីហនុ មានជម្រៅជាង១៤ម៉ែត្រនាឆ្នាំខាងមុខ ដែលអាចឱ្យកប៉ាល់៩៣% កំពុងធ្វើដំណើរជុំវិញពិភពលោកអាចចូលសំចតបានយ៉ាងងាយស្រួល។ នេះបើតាមការលើកឡើងរបស់មន្ត្រីជាន់ខ្ពស់ក្រសួងសាធារណការ និងដឹកជញ្ជូន ។
ថ្លែងក្នុងពិធីបើកសន្និបាតបូកសរុបការងារប្រចាំឆ្នាំ២០១៦ និងទិសដៅការងារឆ្នាំ២០១៧ កាលពីថ្ងៃទី២៨ ធ្នូ ម្សិលមិញ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា គម្រោងស្ថាបនាកំពង់ផែសមុទ្រទឹកជ្រៅនេះ បាននិងកំពុងសិក្សាដោយអង្គការ JICA ដែលមានបណ្តោយប្រហែល៣០០ម៉ែត្រ គ្រោងនឹងចំណាយជាង២០០លានដុល្លារអាមេរិក ជាថវិកាកម្ចីពីរដ្ឋាភិបាលជប៉ុន ក្នុងអត្រាការប្រាក់ទាប តាមរយៈអង្គការ JICA ។
ពាក់ព័ន្ធនឹងការសាងសង់កំពង់ផែទឹកជ្រៅនេះ បើតាមប្រធានអគ្គនាយកកំពង់ផែស្វយ័តក្រុងព្រះសីហនុ លោក លូ គឹមឈន់ បានឱ្យដឹងថា កន្លងមក កំពង់ផែស្វយ័តក្រុងព្រះសីហនុ ទទួលបានមុខទំនិញឆ្លងកាត់ភាគច្រើនមជា ផលិតផលកាត់ដេរ និងផលិតផលកសិកម្ម ។ កំពង់ផែសមុទ្រទឹកជ្រៅនេះ គ្រោងនឹងចាប់ផ្តើមធ្វើនៅចុងឆ្នាំ២០១៧ ឬដើមឆ្នាំ២០១៨ ហើយគ្រោងនឹងបញ្ចប់ការសាងសង់នៅឆ្នាំ២០២២ ។
លោក លូ គឹមឈន់ បន្តថា ៖ « នៅពេលយើងធ្វើផែថ្មីនោះហើយ កប៉ាល់ប្រហែល៩៣%នៅក្នុងតំបន់អាចចូលបាន ហើយនឹងធ្វើឱ្យថ្លៃដឹកជញ្ជូនតាមសមុទ្រមានតម្លៃថោក ។ ឥឡូវនេះយើងគិតថា ៦០ទៅ៧០%នៃថ្លៃដឹកជញ្ជូន គឺដឹកជញ្ជូនតាមសមុទ្រ ហើយប្រហែល៣០%ក្នុងប្រទេស » ។
លោកបន្ថែមថា ៖ « បើសិនផែថ្មីនោះធ្វើហើយ មុខទំនិញជាកុងតឺន័រយើងនឹងកើនដល់ជិត១លានតោន ហើយថ្លៃដឹកជញ្ជូនមួយកុងតឺន័រអាចចុះពី៣០០ទៅ៤០០ដុល្លារ បើប្រៀបធៀបពេលសព្វថ្ងៃ ។ ថ្លៃដឹកជញ្ជូនចុះថោក នឹងធ្វើឱ្យចំណេញទៅលើការប្រកួតប្រជែងរាល់មុខទំនិញនាំចេញ ការប្រកួតប្រជែងល្អ នឹងធ្វើឱ្យតម្លៃនាំចូលចុះថោក » ។
តាមប្រសាសន៍របស់លោក ថៃ រិទ្ធី អគ្គនាយករងផ្នែកអាជីវកម្មនៃកំពង់ផែស្វយ័តក្រុងព្រះសីហនុ ក្នុងរយៈពេល១១ខែឆ្នាំ២០១៦ បរិមាណកុងតឺន័រឆ្លងកាត់កំពង់ផែក្រុងព្រះសីហនុ មានចំនួន៣៦៣.៧៥១កុងតឺន័រ ដែលមានកំណើនតិចតួច បើធៀបនឹងឆ្នាំ២០១៥កន្លងមក ។ ក្នុងនោះចំនួនកុងតឺន័រនាំចូលមាន១៨០.៧៧៥ និងកុងតឺន័រនាំចេញមាន១៨២.៩៧៦ ។
លោកបញ្ជាក់ថា សព្វថ្ងៃនេះ កំពង់ផែស្វយ័តក្រុងព្រះសីហនុ មានក្រុមហ៊ុននាវាចំនួន១០ សម្រាប់ភ្ជាប់ការធ្វើដំណើរពីកំពង់ផែមួយទៅកំពង់ផែមួយដើម្បីផ្ទេរផ្ទុកលើកដាក់ទំនិញ។ លោកនិយាយថា ៖ « ជាមធ្យម នាវាដែលចេញចូលកំពង់ផែក្នុងមួយសប្ដាហ៍មានចំនួន១៣ ហើយសប្ដាហ៍ខ្លះមាននាវាចេញចូល១៤ឯណោះ។ សម្រាប់កំពង់ផែដែលមានទំនាក់ទំនងជាមួយកំពង់ផែស្វយ័តក្រុងព្រះសីហនុយើងនេះ ស្ទើរតែគ្រប់កំពង់ផែក្នុងតំបន់អាស៊ីប៉ាស៊ីហ្វិក មានន័យថា នាវាចេញពីយើងមានទៅកំពង់ផែរបស់ចិន កូរ៉េ ហ្វ៊ីលីពីន ម៉ាឡេស៊ី សិង្ហបុរី និងហុងកុងជាដើម ហើយកាលពីមុន នាវាចេញពីយើងទៅមិនបានត្រង់ៗនោះទេ គឺមានការផ្ទេរដូចជើងហោះហើរអីចឹងដែរ » ។
គួរបញ្ជាក់ថា នៅក្នុងប្រទេសកម្ពុជា ការដឹកជញ្ជូនសំខាន់ៗមាន ផ្លូវថ្នល់ ផ្លូវដែក និងផ្លូវទឹក សម្រាប់ផ្លូវអាកាសភាគច្រើនដឹកអ្នកដំណើរ និងមានទំនិញតិចតួច ។ ប៉ុន្តែបើការដឹកទំនិញឆ្លងប្រទេសឬឆ្លងតំបន់ ភាគច្រើនតាមផ្លូវទឹក។ ដូចនេះ ទើបកំពង់ផែស្វយ័តក្រុងព្រះសីហនុ ជាច្រកអន្តរជាតិដ៏សំខាន់បាននិងកំពុងពង្រីកវិសាលភាពបន្ថែមទៀតដើម្បីឲ្យទំនិញឆ្លងកាត់បានច្រើន ៕
ចែករំលែកព័តមាននេះ