រាជធានីភ្នំពេញ ៖ នារីវ័យក្មេងម្នាក់និងគូស្នេហ៍ថ្មី ខណៈបម្រុងចេញពីផ្ទះសំណាក់ស្រាប់តែត្រូវប្តីស្ទាក់ចាប់ជាប់បង្កឲ្យមានការភ្ញាក់ផ្អើលកាលពីវេលាម៉ោង២ និង៣០នាទីរសៀល ថ្ងៃទី២៨ ខែធ្នូ ឆ្នាំ២០១៦ នៅចំណុចផ្ទះសំណាក់យីហោ «គីម ចោមចៅ» ក្នុងបុរី ប៊ុន ហួរ ស្ថិតក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានបានឲ្យដឹងថា បុរសដែលអះអាងថាប្តីឈ្មោះ សុវណ្ណ ពិសិដ្ឋ អាយុ២៩ឆ្នាំ មុខរបរអ្នកបើកបររថយន្ត មានទីលំនៅក្នុងសង្កាត់ផ្សារដេប៉ូ២ ខណ្ឌទួលគោក ចំណែកនារីដែលបែកចិត្តមានថ្មីឈ្មោះ ផន ចិន្ដា អាយុ២៤ឆ្នាំ មុខរបរជួយលក់សាំងអាងបងប្អូន មានទីលំនៅភូមិត្រាវអែម ឃុំពពេល ស្រុកត្រាំកក់ ខេត្តតាកែវ ដោយឡែកបុរសដែលជាប្រុសស្នេហ៍ក្រោយឈ្មោះ រស់ ពិសិដ្ឋ អាយុ២៧ឆ្នាំ ជាអ្នករកស៊ីនៅខេត្តមណ្ឌលគិរី ។
ប្រភពពីបុរសដែលអះអាងថាជាប្តីបានឲ្យដឹងថា ខ្លួននិងនារីម្នាក់នេះបានរស់នៅជាមួយគ្នាដូចប្តីប្រពន្ធរយៈពេល៨ឆ្នាំហើយ ហើយប្រពន្ធរបស់ខ្លួនក៏បានទៅជួយលក់សាច់អាំងបងប្អូននៅខេត្តមណ្ឌលគិរីរយៈពេល២ខែប៉ុណ្ណោះ ស្រាប់តែកាលពីម្សិលមិញនាងបានត្រឡប់មកពីខេត្តមណ្ឌលគិរីវិញដោយនាំទាំងប្រុសស្នេហ៍ថ្មីមកដេកនៅក្នុងផ្ទះសំណាក់ខាងលើទៀត ពេលនោះខ្លួនបានដឹងក៏ដាក់បណ្ដាញតាមឃ្លាំមើលរហូតដល់ម៉ោងកើតហេតុក៏ឃើញនាងប្រុងនាំគូស្នេហ៍ថ្មីចាកចេញពីផ្ទះសំណាក់ក៏ឃាត់សួរនាំតែម្តង ។
ប្រភពពីកន្លែងកើតហេតុបានឲ្យដឹងថា បុរសដែលអះអាងថាជាប្តីបានអង្វរលួមលោមនារីជាប្រពន្ធថា «សូមកុំដាច់អាល័យពីបងអី ហើយនិយាយទៀតថា មុង ភួយ ទូខោអាវនៅផ្ទះនៅរង់ចាំអូន» ។ មិនត្រឹមតែប៉ុណ្ណោះបុរសដែលអះអាងថាជាប្តីបានលួងលោមទៀតថា «ពីមុនអូនស្រឡាញ់បង អូនបែកពីបងទៅស្រឡាញ់គេ ឥឡូវអូនបែកពីគេមកស្រឡាញ់បងវិញមក» ។
ប្រភពបន្តទៀតថា ទោះបីជាបុរសដែលអះអាងថាជាប្តីអង្វរ និងលួងលោមយ៉ាងណាក៏ដោយ ក៏នារីជាប្រពន្ធមិនព្រមបកក្រោយវិញដែរ ដោយនាងនិយាយថា នាងសម្រេចចិត្តទៅជាមួយបុរសជាគូស្នេហ៍ក្រោយហើយ ។ នាងអះអាងថា ការរស់នៅជាមួយគ្នាដូចជាប្តីប្រពន្ធគឺមានរយៈពេលតែ៤ឆ្នាំប៉ុណ្ណោះ មិនមែន៨ឆ្នាំទេ ហើយការរស់នៅជាមួយគ្នាដូចប្តីប្រពន្ធនេះគឺនាងរស់នៅដោយរង់ចាំខាងប្រុសចូលស្តីដណ្ដឹងនាងតាមផ្លូវច្បាប់ តែខាងប្រុសចេះតែពន្យារពេល ម្តងថាថ្ងៃនេះ ម្តងថាថ្ងៃនោះ ឥឡូវនាងឈប់រង់ចាំហើយ នាងសម្រេចចិត្តថា ជ្រើសអ្នកថ្មីហើយ ។
ប្រភពបន្តទៀតថា បន្ទាប់ពីមានការអង្វរលួងលោមយ៉ាងណាក៏នាងនៅតែមិនព្រមក៏មានការប្រទាញប្រទង់គ្នារហូតមានការភ្ញាក់ផ្អើល បន្ទាប់មកសមត្ថកិច្ចមូលដ្ឋានក៏បានចុះមកអន្តរាគមន៍ និងនាំអ្នកទាំង៣នាក់ទៅកាន់ប៉ុស្តិ៍នគរបាលចោមចៅដើម្បីធ្វើការសាកសួរ ។
នគរបាលប៉ុស្តិ៍ចោមចៅបានឲ្យដឹងថា នៅពេលទៅដល់ប៉ុស្តិ៍ ភាគីនារីនៅតែអះអាងថានាងសម្រេចចិត្តទៅតាមបុរសជាគូស្នេហ៍ក្រោយទោះបីបុរសដែលអះអាងថាជាប្តីអង្វរនិងលួមលោមយ៉ាងណាក៏ដោយ បន្ទាប់មកបុរសដែលអះអាងថាជាប្តីនិងបុរសដែលជាគូស្នេហ៍ក្រោយបានសុំនិយាយគ្នាតែ២នាក់ប្រហែល១៥នាទី បុរសដែលអះអាងថាជាប្តីក៏សម្រេចចិត្តឲ្យនារីទៅជាមួយបុរសជាគូស្នេហ៍ក្រោយដោយឡើងជិះរថយន្តកាមរីឆ្លាម១គ្រឿង ពណ៌ខ្មៅ ពាក់ស្លាកលេខ ភ្នំពេញ 2I-4304 ទៅបាត់ ៕
ចែករំលែកព័តមាននេះ