តែម ម៉ឺន រិះគន់រឿងកីឡាករក្រោយល្បីធ្លាក់ដៃ
រាជធានីភ្នំពេញ ៖ មានការលើកឡើងជាច្រើនថា កីឡាករល្បីឈ្មោះឱ្យតែបានឡើងកូដមួយឆាវ គឺរមែងធ្លាក់ដៃ និងប្រែប្រួលសមត្ថភាព ។ បើទោះជាកីឡាករទាំងនោះបានអះអាងថា ហេតុផលចម្បងគឺបណ្ដាលមកពី
រាជធានីភ្នំពេញ ៖ មានការលើកឡើងជាច្រើនថា កីឡាករល្បីឈ្មោះឱ្យតែបានឡើងកូដមួយឆាវ គឺរមែងធ្លាក់ដៃ និងប្រែប្រួលសមត្ថភាព ។ បើទោះជាកីឡាករទាំងនោះបានអះអាងថា ហេតុផលចម្បងគឺបណ្ដាលមកពីតម្លៃខ្លួនតិចធ្វើឱ្យទឹកចិត្តមិនស្រឡះ និងបណ្ដាលមកពីការហូបចុកបំប៉នមិនគ្រប់គ្រាន់ ក៏មន្ត្រីសហព័ន្ធប្រដាល់បានលើកឡើងថា គឺបណ្ដាលមកពីមូលហេតុផ្សេង ។ មន្ត្រីដដែលបានទាំងលើកឡើងថា នោះជាអ្វីដែលក្រុមកីឡាករត្រូវទទួលខុសត្រូវនោះផង ។
លោក តែម ម៉ឺន ប្រធានសហព័ន្ធកីឡាប្រដាល់កម្ពុជា បាននិយាយថា កីឡាករគ្រប់រូបលោកកត់សម្គាល់ថាឱ្យតែបានល្បីឈ្មោះ និងមានការគាំទ្រ គឺសមត្ថភាពខ្លាំងក្លារបស់កីឡាករទាំងនោះរក្សាមិនបានយូរឡើយ ជាពិសេសចំពោះកីឡាករដែលចាប់ផ្ដើមឈានឡើងគូឯក។
លោកថា កីឡាករទាំងអស់មិនមានច្រើនទេដែលនៅតែខ្លាំងក្រោយពេលល្បីឈ្មោះ ដោយលោកពន្យល់ថា ហេតុផលដែលនាំឱ្យពួកគេកើតមានស្ថានភាពទាំងនោះ គឺការមើលស្រាល។
ក្នុងពិធីសំណេះសំណាលជាមួយកីឡាកររាល់ពេលបើកសម្ពោធព្រឹត្តិការណ៍ប្រដាល់នីមួយៗ លោកតែងសង្កត់ធ្ងន់ថា កីឡាករតែងអះអាងថា ខ្លួនបានទទួលកម្រៃទាបបើធៀបនឹងកីឡាករប្រទេសជិតខាង ប៉ុន្តែលោកថានោះគ្រាន់តែជាលេសរបស់អ្នកខ្ជិល និងអ្នកដែលមើលស្រាលតួនាទីប៉ុណ្ណោះ ។ លោកសួរច្រាសមកវិញថា កីឡាករល្បីឈ្មោះថ្ងូរថាចំណូលតិចទើបខ្លួនធ្លាក់ដៃ ចុះពេលមិនទាន់ល្បីហេតុអ្វីក៏កីឡាករទាំងនោះអាចពង្រឹងខ្លួនឱ្យមានឈ្មោះបោះសំឡេងទៅបាន ។ លោកថា មុនពេលល្បីឈ្មោះ មិនមានកីឡាករណាមួយធ្វេសប្រហែសពីការហ្វឹកហាត់នោះទេ ដោយម្នាក់ៗប្រឹងហាត់មិនស្គាល់យប់ថ្ងៃ រហូតបានវិវត្តខ្លួនក្លាយជាកីឡាករដែលត្រូវបានមហាជនទទួលស្គាល់ ។ អ្នកខ្លះហ្វឹកហាត់តាំងពីមួយខែមុនប្រកួតម្ដងៗប៉ុន្តែផ្ទុយទៅវិញក្រោយពេលល្បីឈ្មោះលោកថា កីឡាករមួយចំនួនមិនបានប្រកាន់ខ្ជាប់ដូចអ្វីដែលពួកគេបានធ្វើនោះទេ គឺអ្នកខ្លះបែរជាខ្ជីខ្ជាលើសដើម ។
លោកនិយាយថា៖«សហព័ន្ធទទួលស្គាល់ថាតម្លៃខ្លួននៅមានកម្រិតជាអ្វីដែលធ្វើឱ្យកីឡាករមិនសូវល្អ ប៉ុន្តែបើតាមខ្ញុំសម្គាល់ ម្នាក់ៗកាលពីមិនទាន់ល្បីតម្លៃខ្លួនដូចទាបជាងហ្នឹងផង ចុះហេតុអ្វីគាត់ប្រឹងហ្វឹកហាត់រហូតបានក្លាយជាកីឡាករខ្លាំងបាន អីុចឹងបានខ្ញុំអត់យល់ពេលគាត់ថាក្រោយពេលគាត់ល្បីលុយប៉ុណ្ណឹងគាត់ហ្វឹកហាត់អត់បាន!» ។ លោកថា តម្លៃខ្លួនកីឡាករមិនទាន់ឡើងគូឯក និងពេលឡើងគូឯកមិនដូចគ្នានោះទេ ហើយបើឈានដល់កីឡាករដែលមានឱកាសឡើងវ៉ៃលើសង្វៀនអន្តរជាតិ ឬវ៉ៃខ្សែក្រវាត់ទៀត គឺរឹតតែបានតម្លៃល្អ អ៊ីចឹងហើយទើបមិនយល់ថាអ្វីដែលក្រុមកីឡាករបកស្រាយជារឿងមិនអាចទទួលបាន ។ លោកថា កីឡាករមិនសំខាន់លើតម្លៃខ្លួននោះទេ ដោយសារតែមុនពេលដាក់ខ្លួនចូលប្រដាល់ គឺកីឡាករម្នាក់ៗសុទ្ធតែបានទទួលយករួចហើយចំពោះតម្លៃ និងហាងឆេងរបស់កីឡាករប្រដាល់ ។ លោកថា ហេតុផលនៃការធ្លាក់ដៃ ទី១គឺកីឡាករខ្លួនឯងនឿយណាយលែងចង់វ៉ៃ លុះចង់ឡើងប្រកួតយកលុយម្ដងៗ ក៏លើកហេតុផលថាមកពីប្រកួតបានតម្លៃតិចទើបសម្រេចចិត្តទៅធ្វើការងារនេះការងារនោះ ឬមិនសូវបានបំប៉នថែទាំសុខភាព ។ លោកថាកីឡាករខ្លះក្រោយពេលបានល្បីគឺផឹកមិនខ្លាចប៉ះពាល់សុខភាព ដោយមុនពេលល្បីឈ្មោះមិនសូវពូកែផឹក និងដើរលេងនោះទេ ប៉ុន្តែដល់ពេលឡើងកូដគឺផឹកលិចថ្លើម ទើបបណ្ដាលឱ្យគុណភាពក្នុងការឡើងប្រកួតមិនដូចមុន ។ លោកថា កុំបន្ទោសរឿងតម្លៃខ្លួនទើបធ្លាក់ដៃ ការពិតត្រូវបន្ទោសខ្លួនឯងដែលខ្វះការទទួលខុសត្រូវទៅវិញទេ ព្រោះបើធ្លាក់ដៃមែនគួរតែត្រូវកើតឡើងមុនពេលល្បីឈ្មោះ មិនមែនមុនល្បីថ្វីដៃលេចធ្លោដល់ពេលឡើងកូដក៏ចាប់ផ្ដើមប្រែប្រួលបែបនេះទេ ។
លោកចាត់ទុកថាកីឡាករធ្លាក់ដៃបណ្ដាលមកពីយកការប្រដាល់ធ្វើឈ្នាន់ លុះពេលបានលុយហើយមានឱកាសក៏ទៅចាប់ការងារផ្សេងរួចមិនសូវហ្វឹកហាត់ ហើយក្នុងពេលទទួលប្រដាល់ម្ដងៗ ដើម្បីកុំឱ្យភ្លេចឈ្មោះ ក៏ចោទទៅរឿងតម្លៃខ្លួន ។ លោកថា តម្លៃការប្រដាល់នាពេលចុងក្រោយល្អជាងមុនឆ្ងាយណាស់ គឺមិនគួរចោទថានៅទាបហើយធ្វើឱ្យការប្រកួតយកជាការមិនបាននោះទេ ។ លោកទទូចឱ្យកែប្រែទស្សនៈ ដោយសារតែការលើកឡើងនេះ វាហាក់មានទម្ងន់ធ្វើឱ្យប៉ះពាល់ដល់អ្នកប្រដាល់ជំនាន់ក្រោយ ។
លោក តែម ម៉ឺន បន្តថា អ្នកប្រដាល់មួយចំនួននៅតែបន្តចាត់ទុកអាជីពប្រដាល់ជាឆ្នាំងបាយ ប៉ុន្តែដោយសារតែការមើលស្រាលក៏ជាមូលហេតុដូចគ្នាផងដែរ ។ ជាក់ស្ដែងលោកឮច្រើនមកហើយដែលកីឡាករល្បីឈ្មោះយល់ថាខ្លួនឯងមានបទពិសោធន៍ និងមានថ្វីដៃ ហើយចាត់ទុកការហ្វឹកហាត់ជារឿងធម្មតាទោះបីរយាលក៏នៅតែឈ្នះ ។ ក្នុងពេលឡើងប្រកួតមិនប៉ះកីឡាករខ្លាំងៗ លោកថាស្ថានភាពខ្ជីខ្ជាទាំងនេះអាចបិទបាំងបាន ប៉ុន្តែដល់ប៉ះអ្នកខ្លាំងក៏រងការអាម៉ាស់ ហើយមានពាក្យតែមួយម៉ាត់បន្ទោសថាមកពីខ្វះលុយកាក់បំប៉នសុខភាពទើបហ្វឹកហាត់មិនដល់កម្រិត ។ លោកថា បើកីឡាករគ្រប់រូបមានការទទួលខុសត្រូវ ហើយស្រឡាញ់កិត្តិយសក្នុងពេលនៅប្រដាល់ នោះស្ថានភាពធ្លាក់ដៃមិនអាចកើតមាននោះទេ ។ យ៉ាងណាមិញ លោកក៏ទទួលស្គាល់ថាស្ថានភាពមិនល្អដែលជះឥទ្ធិពលចំពោះកីឡាករ ដូចជាការផ្គូផ្គងមានភាពស៊ីសំណូក(អ្នកមានខ្សែបានប្រកួតច្រើន) និងបញ្ហាកាត់លុយកីឡាករដែលទទួលបានពីការប្រកួតម្ដងៗពីសំណាក់គ្រូបង្វឹក និងក្លិបមួយចំនួនផង ទើបធ្វើឱ្យកីឡាករនឿយណាយហើយចង់ដកខ្លួន៕
ចែករំលែកព័តមាននេះ