ប្រទេសថៃ ៖ ការនាំចេញដោយមិនគិតពន្ធរបស់ថៃបានកើនឡើងក្នុងខែវិច្ឆិកា ព្រោះតែមានការកើនឡើងនៃតម្រូវការពីទីផ្សារធំៗ ដោយនេះបង្ហាញពីមុខសញ្ញាសេដ្ឋកិច្ចពឹងផ្អែកលើការធ្វើពាណិជ្ជកម្ម ។
តាមទិន្នន័យរបស់ក្រសួងពាណិជ្ជកម្មបង្ហាញថា ការនាំចេញនាខែវិច្ឆិកា បានកើនឡើង១០,២% បើធៀបនឹងឆ្នាំមុន ។ ការកើនឡើងនេះ គឺជាអត្រាខ្ពស់ជាងគេតាំងពីខែកុម្ភៈមក ។ ការនាំចេញក្នុងខែវិច្ឆិកា សរុបស្មើ១៨,៩១ប៊ីលានដុល្លារ ខណៈការនាំចូលសរុបស្មើ១៧,៣៧ប៊ីលានដុល្លារ ។
មន្ត្រីម្នាក់និយាយថា ៖ « ការកើនឡើងនៃតម្លៃប្រេងទូទាំងពិភពលោក បានបង្កើនតម្រូវការផលិតផលថៃ ដែលទាក់ទិននឹងប្រេង ហើយការនាំចេញសរុបក្នុងឆ្នាំនេះអាចនឹងកើនឡើងផងដែរ » ។
ចំណែកការនាំចូលក្នុងខែវិច្ឆិកា បានកើនឡើង៣% បើធៀបនឹងឆ្នាំមុន ។ សេដ្ឋវិទូព្យាករថា វានឹងធ្លាក់ចុះ១,០៥% បន្ទាប់ពីកើន៦,៥%ក្នុងខែតុលា ។ ទិន្នន័យក្នុងខែវិច្ឆិកា បានបង្កើតផលលើសពាណិជ្ជកម្មដល់ទៅ១,៥៤ប៊ីលានដុល្លារ ។
ប្រទេសជប៉ុនបានក្លាយជាទីផ្សារដែលកើនឡើងខ្ពស់ជាងគេក្នុងខែវិច្ឆិកា គឺមានដល់ទៅ២២,៥%ឯណោះ ខណៈប្រទេសចិនជាប់លេខ២ កើនឡើង២២% និងប្រទេសទាំង១៥ក្នុងអឺរ៉ុបកើនឡើង១៣,៨% ផងដែរ ។
សម្រាប់រយៈពេល១១ខែមកនេះ ថៃបាននាំចេញសរុបប្រមាណ១៩៧.១៦២ប៊ីលានដុល្លារ ធ្លាក់ចុះ០,០៥% បើធៀបនឹងរយៈពេលដូចគ្នាកាលពីឆ្នាំ២០១៥ ។ រីឯការនាំចូលក្នុងរយៈពេលដូចគ្នានេះ ស្មើ១៧៧.៤៤១ប៊ីលានដុល្លារ ធ្លាក់ចុះ៥,១% មានផលលើសពាណិជ្ជកម្ម១៩,៧២ប៊ីលានដុល្លារ ៕
ចែករំលែកព័តមាននេះ