ប្រទេសបារាំង ៖ កាលពីពេលថ្មីៗនេះ បារាំងបានសម្ពោធផ្លូវហាយវ៉េពន្លឺព្រះអាទិត្យដំបូងគេរបស់ពិភពលោក ។ ផ្លូវនេះត្រូវបានក្រាលដោយបន្ទះស្រូបពន្លឺគ្រប់គ្រាន់សម្រាប់ផ្តល់ថាមពលភ្លើងនៅតាមដងផ្លូវក្នុងក្រុង Tourouvre ។
ផ្លូវដែលមានចម្ងាយ១គីឡូម៉ែត្រនេះឈ្មោះថា Wattway ត្រូវបានគ្របដណ្តប់ដោយបន្ទះស្រូបពន្លឺព្រះអាទិត្យប្រមាណ២.៨០០ម៉ែត្រការ៉េ តភ្ជាប់នឹងប្រព័ន្ធចរន្តថាមពលក្នុងតំបន់ ។
លោក Segolene Royal រដ្ឋមន្ត្រីក្រសួងបរិស្ថានបារាំង បានថ្លែងក្នុងសេចក្តីថ្លែងការណ៍ថា ៖ « ថាមពលពន្លឺព្រះអាទិត្យថ្មីនេះទាញអត្ថប្រយោជន៍ចេញពីហេដ្ឋារចនាសម្ព័ន្ធ ដែលកំពុងត្រូវបានប្រើប្រាស់ដើម្បីផលិតអគ្គិសនី ដោយមិនចាំបាច់មានការសាងសង់ផ្សេងទៀត»។
លោកក៏បានប្រកាសពីគម្រោងរយៈពេល៤ឆ្នាំ សម្រាប់់ដំណើរការផ្លូវហាយវ៉េពន្លឺព្រះអាទិត្យទូទាំងប្រទេសផងដែរ ដែលគម្រោងដំបូងគឺ Brittany នៅខាងជើង និង Marseille នៅខាងត្បូងប្រទេស ។
គំនិតនេះកំពុងនៅក្រោមការពិសោធក្នុងប្រទេសអាល្លឺម៉ង់ ហូឡង់ និងសហរដ្ឋអាមេរិក ទៅលើផ្លូវថ្នល់ដែលមានរថយន្តបើកបរប្រមាណ២០% ដើម្បីបង្កើតជាកន្លែងស្រូបពន្លឺព្រះអាទិត្យ ។
មនុស្សជាច្រើននៅមិនទាន់ជឿជាក់លើផ្លូវថ្នល់នេះទាំងស្រុងទេ ហើយកំពុងរង់ចាំមើលថា តើបន្ទះស្រូបពន្លឺនេះអាចធន់នឹងពេលវេលានិងអាកាសធាតុ ឬត្រូវខូចខាតដោយសាររថយន្តធំៗបើកបរពីលើឬទេ ។
គួរបញ្ជាក់ថា គម្រោង Wattway ទទួលឧបត្ថម្ភធនពីរដ្ឋប្រមាណ៥,២លានដុល្លារ បានចាប់ផ្តើមមាននៅចំណតរថយន្ត ឬនៅពីមុខអគារសាធារណៈ ដែលមានទំហំតូចរវាង៥០ ទៅ១០០ម៉ែត្រ ។
គុណវិបត្តិមួយរបស់ប្រព័ន្ធនេះ គឺបន្ទះស្រូបពន្លឺទាំងនោះមានប្រសិទ្ធភាព លុះត្រាតែដាក់បែរទៅកាន់ព្រះអាទិត្យ ឬដាក់នៅលើដំបូលផ្ទះ គឺល្អជាងការដាក់រាបនឹងដី ៕
ចែករំលែកព័តមាននេះ