រាជធានីភ្នំពេញ ៖ ផ្សារទំនើបដ៏ធំមួយទៀតនៅរាជធានីភ្នំពេញ នឹងចាប់ផ្តើមបើកដំណើរការនៅត្រីមាសទី៣ឆ្នាំ២០១៧ខាងមុខ ខណៈបច្ចុប្បន្ន ក្រុមហ៊ុនវិនិយោគលើគម្រោងនេះកំពុងពន្លឿនការសាងសង់ ។
លោក ម៉េង ចំរើន ប្រធានគម្រោង Olympia Plaza បាននិយាយកាលពីថ្ងៃទី២២ ធ្នូថា ផ្សារទំនើបនេះនឹងបញ្ចប់ការសាងសង់ និងគ្រោងបើកដំណើរការទាន់ពេលវេលាតាមគម្រោង ព្រោះក្រុមហ៊ុនបាននិងកំពុងជំរុញការងារនេះឲ្យលឿនដើម្បីផ្តល់ឲ្យអ្នកស្នាក់នៅក្នុងគម្រោង Olympia City អាចរកចំណូលបាន និងធ្វើឲ្យពួកគេកាន់តែមានភាពងាយស្រួលក្នុងការរស់នៅ ។ រហូតមកទល់ពេលនេះ ការសាងសង់ផ្សារទំនើប Olympia Plaza បានឡើងដល់ជាន់ទី៥ហើយ ក្នុងគម្រោងសរុបកម្ពស់៨ជាន់ ។ លោកបន្តថា ៖ « ផ្សារនេះមានចំណតរថយន្តក្រោមដីចំនួន២ជាន់ និងមានដំបូលសម្រាប់ចតយានយន្តផងដែរ ដើម្បីធ្វើយ៉ាងណាឲ្យមានចំណតយានយន្តគ្រប់គ្រាន់ » ។
លោក ទូច សំណាង អគ្គនាយករងក្រុមហ៊ុនOCIC ជាក្រុមហ៊ុនវិនិយោគលើគម្រោងនេះថ្លែងថា ផ្សារទំនើបនេះមានទំហំទុនវិនិយោគរហូតដល់៨០លានដុល្លារអាមេរិក បូករួមបញ្ចូលទាំងថ្លៃដី និងអគាររបស់ផ្សារផងដែរ ។ លោកបន្តថា ដោយសារវាស្ថិតនៅតំបន់ពាណិជ្ជកម្មកណ្តាលក្រុង ផ្សារទំនើបនេះនឹងទទួលបាន ជោគជ័យ ។
យោងតាមការសិក្សារបស់ក្រុមហ៊ុន CBRE Cambodia ដែលបានបញ្ចប់កាលពីត្រីមាសទី២ឆ្នាំនេះរកឃើញថា តម្រូវការផ្សារទំនើបកំពុងកើនឡើងនៅកម្ពុជា ដោយសារការហូរចូលនូវផលិតផលថ្មីៗ ជាពិសេស សម្លៀកបំពាក់ ទំនិញប្រើប្រាស់ អាហារ និងភេសជ្ជៈ ។ ការសិក្សាក៏បានរកឃើញដែរថា តម្រូវការហាងលក់ទំនិញនៅតាមផ្ទះ តាមបណ្តោយមហាវិថីព្រះសីហនុ និងមហាវិថីមួយចំនួនទៀតក៏បានកើនឡើងដែរ ដោយសារហេតុផលដូចគ្នានេះ ។
នាយិកាក្រុមហ៊ុន CBRE Cambodia អ្នកនាង ធីតា អាន ថ្លែងថា តម្រូវការផ្សារទំនើបនៅរាជធានីភ្នំពេញ នឹងបន្តកើនឡើងបន្ថែមទៀត ដោយសារទំហំផ្សារទំនើបនៅរាជធានីភ្នំពេញ ធៀបនឹងមនុស្សម្នាក់មានចំនួនទាបនៅឡើយ ជាពិសេស កម្លាំងទិញក្នុងចំណោមប្រជាពលរដ្ឋកម្ពុជាបាននិងកំពុងកើនឡើង ដោយសារកម្រិតប្រាក់ចំណូលរបស់ពួកគាត់កាន់តែមានភាពល្អប្រសើរ ។
តាមគម្រោងនៅឆ្នាំ២០១៧ខាងមុខ ផ្សារទំនើបធំៗចំនួនពីរទៀតនឹងបើកដំណើរការផងដែរ ទី១ ផ្សារទំនើប Parkson Mall ស្ថិតនៅតាមមហាវិថីសហព័ន្ធរុស្ស៊ី និងផ្សារទំនើបក្នុងគម្រោង Exchange Square វិនិយោគដោយក្រុមហ៊ុន HongKong Land ៕
ចែករំលែកព័តមាននេះ