ខេត្តព្រះសីហនុ ៖ ក្នុងរយៈពេល១១ខែឆ្នាំ២០១៦ បរិមាណកុងតឺន័រឆ្លងកាត់កំពង់ផែក្រុងព្រះសីហនុ មានចំនួន៣៦៣.៧៥១កុងតឺន័រ ដែលមានកំណើនតិចតួច បើធៀបនឹងឆ្នាំ២០១៥កន្លងមក ។ ក្នុងនោះចំនួនកុងតឺន័រនាំចូលមាន១៨០.៧៧៥ និងកុងតឺន័រនាំចេញមាន១៨២.៩៧៦ ។ នេះបើតាមប្រសាសន៍របស់លោក ថៃ រិទ្ធី អគ្គនាយករងផ្នែកអាជីវកម្មនៃកំពង់ផែស្វយ័តក្រុងព្រះសីហនុ ។
លោកឲ្យដឹងទៀតថា បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ នៅក្នុងឆ្នាំ២០១៦ មានកំណើនតិចតួចទេ ។ លោកនិយាយថា ៖ « រហូតមកដល់ពេលនេះ នឹងជិតដាច់ឆ្នាំទៅហើយ បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ អាចមានកំណើនត្រឹម២%ទៅ៣%ប៉ុណ្ណោះ បើធៀបនឹងឆ្នាំ២០១៥កន្លងមក ដោយក្នុងដំណាច់ឆ្នាំ២០១៦ យើងសង្ឃឹមថា នឹងទទួលបានកុងតឺន័រឆ្លងកាត់ចំនួន៤០០ពាន់ ខណៈឆ្នាំ២០១៥កន្លងទៅ យើងទទួលបាន៣៩០ពាន់កុងតឺន័រ » ។
លោកបន្តថា ខណៈចំនួនកុងតឺន័រ និងនាវាចូលចតនៅកំពង់ផែស្វយ័តក្រុងព្រះសីហនុ កាន់តែច្រើនពីមួយឆ្នាំទៅមួយឆ្នាំ ទើបកំពង់ផែបានស្នើសុំទៅក្រសួងសាធារណការ ដើម្បីទិញ និងនាំយកម៉ាស៊ីនលើកដាក់ទំនិញបន្ថែមទៀតសម្រាប់ពន្លឿនការលើកដាក់ទំនិញពីកប៉ាល់ដែលចូលចតនៅកំពង់ផែ ។ ជាក់ស្ដែង ថ្មីៗនេះ កំពង់ផែស្វយ័តក្រុងព្រះសីហនុ បាននាំយកគ្រឿងចក្រលើកដាក់ទំនិញចំនួន៤គ្រឿង ហើយនៅពេលខាងមុខ នឹងមានការនាំចូលម៉ាស៊ីនលើកដាក់ទំនិញបន្ថែមទៀតដើម្បីឆ្លើយតបនឹងតម្រូវការ កំណើននៃកុងតឺន័រ និងនាវាឆ្លងកាត់ ។ លោកថា ៖ « ពេលនេះ យើងបានប្រើមធ្យោបាយលើកដាក់ទំនើបៗដូចជា QC (Quay Gantry Crane) ចំនួន២គ្រឿងដាក់នៅខ្លោងទ្វារសម្រាប់លើកដាក់ទំនិញ និងមានម៉ាស៊ីន RTG (Rubber Tyred Gantry Cranes) នៅលើទីលានចំនួន៧គ្រឿង ដែល៤គ្រឿងទើបមកដល់ ហើយអាចនឹងនាំចូលជាបន្តបន្ទាប់នៅពេលក្រោយទៀតសម្រាប់ពន្លឿនការលើកដាក់ឲ្យបានឆាប់រហ័ស » ។
លោកបន្ថែមថា កត្តាដែលកំពង់ផែស្វយ័តក្រុងព្រះសីហនុ នឹងនាំចូលគ្រឿងចក្រ និងឧបករណ៍លើកដាក់មកបន្ថែមទៀតដើម្បីឲ្យកប៉ាល់ដែលចូលចតឆាប់បានចេញទៅវិញ ហើយទទួលកប៉ាល់ថ្មីៗចូលចតបន្ត ព្រមទាំងធ្វើឲ្យភាគីខាងកប៉ាល់មានការសប្បាយចិត្ត ព្រោះចតមិនយូរដូចពេលមុនៗ និងអាចធ្វើដំណើរទៅកំពង់ផែផ្សេងទៀត ។
លោកបញ្ជាក់ថា សព្វថ្ងៃនេះ កំពង់ផែស្វយ័តក្រុងព្រះសីហនុ មានក្រុមហ៊ុននាវាចំនួន១០ សម្រាប់ភ្ជាប់ការធ្វើដំណើរពីកំពង់ផែមួយទៅកំពង់ផែមួយដើម្បីផ្ទេរផ្ទុកលើកដាក់ទំនិញ។ លោកនិយាយថា ៖ « ជាមធ្យម នាវាដែលចេញចូលកំពង់ផែក្នុងមួយសប្ដាហ៍មានចំនួន១៣ ហើយសប្ដាហ៍ខ្លះមាននាវាចេញចូល១៤ឯណោះ។ សម្រាប់កំពង់ផែដែលមានទំនាក់ទំនងជាមួយកំពង់ផែស្វយ័តក្រុងព្រះសីហនុយើងនេះ ស្ទើរតែគ្រប់កំពង់ផែក្នុងតំបន់អាស៊ីប៉ាស៊ីហ្វិក មានន័យថា នាវាចេញពីយើងមានទៅកំពង់ផែរបស់ចិន កូរ៉េ ហ្វ៊ីលីពីន ម៉ាឡេស៊ី សិង្ហបុរី និងហុងកុងជាដើម ហើយកាលពីមុន នាវាចេញពីយើងទៅមិនបានត្រង់ៗនោះទេ គឺមានការផ្ទេរដូចជើងហោះហើរអីចឹងដែរ » ។
គួរបញ្ជាក់ថា នៅក្នុងប្រទេសកម្ពុជា ការដឹកជញ្ជូនសំខាន់ៗមាន ផ្លូវថ្នល់ ផ្លូវដែក និងផ្លូវទឹក សម្រាប់ផ្លូវអាកាសភាគច្រើនដឹកអ្នកដំណើរ និងមានទំនិញតិចតួច ។ ប៉ុន្តែបើការដឹកទំនិញឆ្លងប្រទេសឬឆ្លងតំបន់ ភាគច្រើនតាមផ្លូវទឹក។ ដូចនេះ ទើបកំពង់ផែស្វយ័តក្រុងព្រះសីហនុ ជាច្រកអន្តរជាតិដ៏សំខាន់បាននិងកំពុងពង្រីកវិសាលភាពបន្ថែមទៀតដើម្បីឲ្យទំនិញឆ្លងកាត់បានច្រើន ៕
ចែករំលែកព័តមាននេះ