រាជធានីភ្នំពេញ ៖ ក្រសួងពាណិជ្ជកម្មព្យាករថា ទំហំពាណិជ្ជកម្មឆ្នាំ២០១៦នេះ មានទឹកប្រាក់សរុបជាង២១.៩៣៨លានដុល្លារ ក្នុងនោះកម្ពុជានាំចេញជាង៩.៨៦៥លានដុល្លារ និងការនាំចូលជាង១២.០៧២លានដុល្លារ។ នេះបើតាមរបាយការណ៍បូកសរុបការងារពាណិជ្ជកម្មឆ្នាំ២០១៦ និងទិសដៅអនុវត្តការងារពាណិជ្ជកម្មឆ្នាំ២០១៧ ដែលត្រូវបានបង្ហាញកាលពីថ្ងៃទី២៦ ធ្នូ កន្លងមក នៅទីស្ដីការក្រសួងពាណិជ្ជកម្ម ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងថា ដោយសារការងើបឡើងវិញនូវសេដ្ឋកិច្ចនៅអឺរ៉ុប និងសហរដ្ឋអាមេរិក រួមទាំងសន្ទុះយ៉ាងឆាប់រហ័សនៃកំណើនសេដ្ឋកិច្ចក្នុងតំបន់អាស៊ី បានបង្កើតនូវទីផ្សារថ្មីៗដែលនឹងផ្តល់ក្តីសង្ឃឹមយ៉ាងច្រើនសម្រាប់ការនាំចេញ និងការបង្កើនប្រាក់ចំណូលដល់ប្រជាពលរដ្ឋកម្ពុជា ។
លោកបន្តថា ៖ « ការធ្វើពិពិធកម្មវិស័យពាណិជ្ជកម្ម តាមរយៈការប្រឹងប្រែងពង្រីកទីផ្សារក្នុងតំបន់ និងសកលលោក គឺជាកិច្ចការចម្បងដែលគ្រប់ក្រសួងស្ថាប័នពាក់ព័ន្ធទាំងអស់ត្រូវសហការគ្នាខិតខំអនុវត្តឲ្យទទួលបានលទ្ធផលកាន់តែប្រសើរ ដើម្បីធានាដល់ការបែងចែកនូវប្រយោជន៍នៃកំណើនសេដ្ឋកិច្ចសម្រាប់ប្រជាពលរដ្ឋប្រកបដោយសមភាព » ។
លោករដ្ឋមន្ត្រីក្រសួងពាណិជ្ជកម្ម មានប្រសាសន៍ថា ៖ « យើងបានបន្តសហការ និងជំរុញពាណិជ្ជកម្មជាមួយបណ្តាប្រទេសមួយចំនួនដូចជា អាមេរិក កាណាដា កូវ៉ែត បេឡារុស តួកគី កាហ្សាក់ស្ថាន កាតា ប៊ុលហ្គារី ប៉ាណាម៉ា ស៊ីលី និងប៉ារ៉ាហ្គាយ ជាដើម ដើម្បីធ្វើពិពិធកម្មការនាំចេញរបស់កម្ពុជា ឲ្យបានជាអតិបរមាដូចដែលយើងបានធ្វើនៅក្នុងក្របខ័ណ្ឌអាស៊ាន និងដៃគូ ។ លើសពីនេះ ក្រសួងក៏បានផ្តល់សច្ចាប័នលើកិច្ចសម្រួលពាណិជ្ជកម្ម និងចូលរួមអនុវត្តកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ និងកិច្ចព្រមព្រៀងពាណិជ្ជកម្មសេរីផ្សេងៗទៀត » ។
បច្ចុប្បន្ន ក្រសួងពាណិជ្ជកម្មបាននិងកំពុងធ្វើកិច្ចសហប្រតិបត្តិការដៃគូជាមួយបណ្តាប្រទេសជាមិត្តទាំងក្នុងក្របខ័ណ្ឌអាស៊ាន អនុតំបន់ និងទ្វេភាគី ។ ក្រសួងបានបង្កើតនាយកដ្ឋានថ្មីៗដូចជា នាយកដ្ឋានអាមេរិក និងនាយកដ្ឋានអឺរ៉ុប-មជ្ឈិមបូព៌៌ា-អាហ្រិ្វក ដែលកំពុងធ្វើការយ៉ាងសកម្មក្នុងការជំរុញប្រតិបត្តិការពាណិជ្ជកម្ម និងពង្រីកទីផ្សារថ្មីៗជាមួយបណ្តាប្រទេសនៅទ្វីបទាំងនោះ ។
ក្នុងឱកាសនោះ លោកឧបនាយករដ្ឋមន្ត្រី ហោ ណាំហុង បញ្ជាក់ថា ក្នុងនាមរាជរដ្ឋាភិបាលកម្ពុជា លោកពិតជាមានមោទនភាព ដែលបានឃើញទំហំពាណិជ្ជកម្មកម្ពុជាមានការកើនឡើងបែបនេះ។ ប៉ុន្តែកម្ពុជាគួរពិចារណាលើជញ្ជីងពាណិជ្ជកម្មផងថា តើយើងធ្វើការនាំចេញប៉ុន្មាន និងនាំចូលប៉ុន្មាន ? ដោយយើងប្រៀបធៀបជាមួយប្រទេសជិតខាង គឺការនាំចូលរបស់កម្ពុជាមានចំនួនច្រើនជាងការនាំចេញ ។
លោកបានស្នើឲ្យក្រសួងពាណិជ្ជកម្ម ត្រូវបន្តធ្វើសមាហរណកម្មជាមួយអាស៊ានឲ្យបានស៊ីជម្រៅ និងសម្រួលដល់ការចូលរួមរបស់វិស័យឯករាជ្យក្នុងការរៀបចំគោលនយោបាយអាស៊ាន ដើម្បីបើកទូលាយទីផ្សារ និងទាញយកផលចំណេញកាន់តែច្រើនពីតំបន់ពាណិជ្ជកម្មសេរីអាស៊ាន និងដៃគូ ។
លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា ថ្លែងថា បច្ចុប្បន្ន ទំហំនាំចូលពីប្រទេសជិតខាងមកកម្ពុជា បានកាត់បន្ថយជាបន្តបន្ទាប់។ ជាក់ស្តែង ការនាំចូលពីប្រទេសថៃមកកម្ពុជាកាលពីឆ្នាំ២០១៥ បានថយចុះក្នុងចន្លោះពី៧%ទៅ១០% និងឆ្នាំ២០១៦នេះ ការនាំចេញពីថៃមកកម្ពុជា បានកាត់បន្ថយរហូតដល់១៦% ។
លោកបន្តថា ៖ « ការកាត់បន្ថយការនាំចូលពីប្រទេសជិតខាង ដោយសារសហគ្រាសធុនតូច និងមធ្យមនៅកម្ពុជាបានបង្កើនការផលិត និងផលិតទំនិញមានគុណភាពជាងមុន។ ការកាត់បន្ថយការនាំចេញទំនិញពីបរទេស គឺជាយុទ្ធសាស្ត្រមួយក្នុងគោលនយោបាយចតុកោណរបស់រាជរដ្ឋាភិបាលដំណាក់កាលទី៣ » ៕
ចែករំលែកព័តមាននេះ