ប្អូនប្រុសទះកំផ្លៀង និងកាន់ឈើជ្រុងគំរាមវាយសម្លា.ប់បងស្រីបង្កើត
រាជធានីភ្នំពេញ ៖ យុវជនម្នាក់ត្រូវបានកម្លាំងនគរបាល ប៉ុស្ដិ៍ព្រៃសធ្វើការចាប់ខ្លួន ក្រោយពេលដែលជននោះ បានទះកំផ្លៀង វាយក្បាលបងស្រីបង្កើតខ្លួនឯង
រាជធានីភ្នំពេញ ៖ យុវជនម្នាក់ត្រូវបានកម្លាំងនគរបាល ប៉ុស្ដិ៍ព្រៃសធ្វើការចាប់ខ្លួន ក្រោយពេលដែលជននោះ បានទះកំផ្លៀង វាយក្បាលបងស្រីបង្កើតខ្លួនឯង មិនតែប៉ុណ្ណោះបានទាញដំបងឈើជ្រុងមួយ កំណាត់ កាន់ឈរគំរាមវាយសម្លាប់ចោលថែមទៀត ព្រោះតែរឿងទំនាស់បិទភ្លើង នៅខាងមុខផ្ទះបន្តិចបន្តួចសោះ ហើយដោយមានការភ័យខ្លាចប្អូនប្រុស វាយសម្លាប់ស្ត្រីជាបងបានរត់ទៅប្ដឹងឲ្យកម្លាំងនគរបាលប៉ុស្ដិ៍ព្រៃស ចាប់ខ្លួនប្អូនប្រុសចាត់ការតាមច្បាប់។
ហេតុការណ៍នោះ បានបង្កឲ្យមានការភ្ញាក់ផ្អើលឡើង កាលវេលាម៉ោង១០យប់ថ្ងៃទី២៦ ខែធ្នូ ឆ្នាំ២០១៦ ស្ថិតនៅក្នុងភូមិព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ។ ជនរងគ្រោះដែលជាបងស្រី ឈ្មោះ ស៊ុំ សុខលីដា ហៅផារី អាយុ៣៦ឆ្នាំ មុខរបរកម្មការិនីរោងចក្រកាត់ដេរ មានទីលំនៅក្នុងភូមិកើតហេតុខាងលើ។ ចំណែកប្អូនប្រុសដែលប៉ុនប៉ងវាយសម្លាប់បងស្រីបង្កើតខ្លួនឯងនោះឈ្មោះ ស៊ុំ សុខសីហា ភេទប្រុស អាយុ២៥ឆ្នាំ មុខរបរនៅផ្ទះស្នាក់នៅក្នុងផ្ទះកើតហេតុជាមួយគ្នា។
នៅមុនពេលកើតហេតុ ជនរងគ្រោះឈ្មោះ ស៊ុំ សុខលីដា ដែលជាបងស្រីបានរៀបចំហូបបាយ នៅក្នុងផ្ទះ ហើយដោយសារតែយប់ជ្រៅបន្តិចហើយ និងចង់សន្សំសំចៃភ្លើងផង ស្ត្រីរូបនោះក៏បានបិទភ្លើងនៅខាងមុខផ្ទះ ខណៈនោះជនដៃដល់ឈ្មោះ ស៊ុំ សុខសីហា ត្រូវជាប្អូនប្រុសបង្កើត មិនព្រមឲ្យបិទភ្លើងនោះឡើយ និងបានស្រែកជេរប្រមាថបងស្រី បន្ទាប់មកបានស្ទុះទៅទះកំផ្លៀង និងវ៉ៃក្បាលបងស្រីជាច្រើនដៃ។
ប៉ុណ្ណឹងហើយមិនអស់ចិត្តទេ ជននោះដូចកំរោលចូលខ្លួន និងហាក់មានគំនុំជាមួយបងស្រីប៉ុនមហាមេឃ បានស្ទុះទៅទាញយកដំបងឈើជ្រុង កាន់នៅក្នុងដៃរួចស្រែកគំរាមថា នឹងសម្លាប់ជនរងគ្រោះចោល ដែលជាហេតុធ្វើឲ្យបងស្រីមានការភិតភ័យ ក៏បានរត់គេចខ្លួនចេញពីផ្ទះទៅប្ដឹងនគរបាលប៉ុស្តិ៍ព្រៃស ឲ្យជួយអន្តរាគមន៍ និងឃាត់ខ្លួនប្អូនប្រុសនោះទាំងយប់ ដើម្បីធ្វើការសាកសួរ និងកសាងសំណុំរឿងចាត់ការតាមនីតិវិធីច្បាប់៕
ចែករំលែកព័តមាននេះ