ខេត្តសៀមរាប ៖ ប្រជាជននៅខេត្តសៀមរាបភាគច្រើនទទួលស្គាល់ថាជាដំណាំចេកល័ក្ខ ជាដំណាំហូបផ្លែ មានអត្តសញ្ញាណនៅលើខ្នងភ្នំគូលែន ។ ចេកមាន ផ្លែធំៗ ហើយនៅពេលទុំមានពណ៌ក្រមៅ លាយក្រហមស្រាល…
ខេត្តសៀមរាប ៖ ប្រជាជននៅខេត្តសៀមរាបភាគច្រើនទទួលស្គាល់ថាជាដំណាំចេកល័ក្ខ ជាដំណាំហូបផ្លែ មានអត្តសញ្ញាណនៅលើខ្នងភ្នំគូលែន ។ ចេកមាន ផ្លែធំៗ ហើយនៅពេលទុំមានពណ៌ក្រមៅ លាយក្រហមស្រាល និងមានរសជាតិផ្អែមឈ្ងុយឆ្ងាញ់គួរចង់បរិភោគ ។ នេះបើយោងតាមក្រសួងបរិស្ថានបានផ្សាយនាព្រឹកថ្ងៃទី២៣ ខែកក្កដានេះ ។
ក្រសួងបរិស្ថានបានបន្តថា ទេសចរទាំងឡាយនៅពេលឡើងទៅកម្សាន្តលើភ្នំគូលែននៃឧទ្យានជាតិព្រះជ័យវរ្ម័ន-នរោត្តម ភ្នំគូលែន ប្រាកដជាស្គាល់ដើមចេកល័ក្ខ ។ ផ្លែរបស់វា បានដាក់លក់ជាហូរហែ តាមដងផ្លូវទៅ កាន់តំបន់ខ្នងភ្នំ ។
លោក ផាន់ ផុន ប្រធានសហគមន៍ព្រៃធំអន្លង់ធំ ដែលស្ថិតនៅលើខ្នងភ្នំគូលែននេះបានឱ្យដឹងថា ចេកប្រភេទនេះ គឺជាប្រភេទដំណាំប្រពៃរបស់អ្នកស្រុកច្រើនតំណមកហើយ ។ បច្ចុប្បន្ន ប្រជាពលរដ្ឋលើភ្នំគូលែននិយមដាំចេកល័ក្ខ ព្រោះអាចលក់បានតម្លៃខ្ពស់ ។
លោក ផាន់ ផុន បានឱ្យដឹងបន្ថែមទៀតថា«ចេកល័ក្ខផ្លែវាពេលទុំមានរសជាតិផ្អែម និងក្លិនក្រអូប ។ គេអាចបរិភោគវាបានពេលទុំ ហើយវាមានរសជាតិផ្អែមឆ្ងាញ់ខុសពីចេកដទៃ ។
តម្លៃចេកល័ក្ខមានតម្លៃថ្លៃជាងចេកផ្សេងទៀត ។ នៅតាមផ្លូវឡើងភ្នំគូលែន អ្នកភូមិលក់ចេកល័ក្ខមួយស្ទង ចាប់ពី២៥.០០០ ដល់៣០.០០០រៀល ។ បើទិញជាស្និតវិញ តម្លៃមួយស្និត ៤.០០០-៧.០០០ រៀលទៅតាមទំហំតូចតាមធំ ។
សូមបញ្ជាក់ថា ដោយសារកត្តាភូមិសាស្ត្រអំណោយផលសម្រាប់ដំណាំចេកនេះផង ប្រជាពលរដ្ឋរស់នៅខ្នងភ្នំគូលែនជាច្រើនគ្រួសារ និយមដាំចេកល័ក្ខ និងម្យ៉ាងទៀតដំណាំនេះបានដុះនៅលើខ្នង ភ្នំគូលែន តាំងតែពីយូរលង់មកហើយដែរ ៕
ចែករំលែកព័តមាននេះ