សកម្មភាពសម្រួលចរាចរណ៍ និងដឹកដៃសិស្សឆ្លងថ្នល់ត្រូវបានមហាជនលើកសរសើរ
ខេត្តកំពង់ឆ្នាំង ៖ ជារៀងរាល់ថ្ងៃ និងរាល់ម៉ោងចេញ ចូលរៀន របស់សិស្ស គេសង្កេតឃើញមាន មន្ត្រីនគរបាលក្រុងកំពង់ឆ្នាំង២-៣រូប ក្នុងឯកសណ្ឋាននគរបាលចរាចរណ៍
ខេត្តកំពង់ឆ្នាំង ៖ ជារៀងរាល់ថ្ងៃ និងរាល់ម៉ោងចេញ ចូលរៀន របស់សិស្ស គេសង្កេតឃើញមាន មន្ត្រីនគរបាលក្រុងកំពង់ឆ្នាំង២-៣រូប ក្នុងឯកសណ្ឋាននគរបាលចរាចរណ៍ តែងតែមកសម្រួលចរាចរណ៍ដល់សិស្សសាលាបឋមសិក្សា គំរូក្រុងកំពង់ឆ្នាំង ដែលនៅជិតវិមានឯករាជ្យ។ រាល់សកម្មភាពបែបនេះ ត្រូវបានមហាជនថតបង្ហោះពេញក្នុងបណ្តាញសង្គម និងបានការលើកទឹកចិត្តសរសើរ ដល់កម្លាំងសមត្ថកិច្ចចរាចរណ៍ទាំងនោះទៀតផង ពិសេសគឺរូបថត ដឹកដៃកូនសិស្សឆ្លងថ្នល់ ទៅ និងមកសាលារៀនជាដើម។
ទន្ទឹមគ្នានោះការគោរពភ្លេងជាតិ ក៏ត្រូវបានអនុវត្តយ៉ាងខ្ជាប់ខ្ជួនផងដែរ នៅត្រង់រវង់មូលវិមានឯករាជ្យ និងសួនច្បារ មុខបញ្ជាការកងរាជអាវុធហត្ថខេត្ត។ លោក ម៉ុយ អ៊ីម ប្រធានផ្នែកចរាចរណ៍ ក្រុងកំពង់ឆ្នាំង បានឲ្យដឹងថា ដោយទទួលបានបញ្ជា ពីលោកឧត្តមសេនីយ ឡុច សុវណ្ណារ៉ា ស្នងការនគរបាលខេត្ត ក៏ដូចជាលោកវរៈសេនីយ៍ទោ ឆាយ ខេមរ័ត្ន អធិការនគរបាលក្រុងកំពង់ឆ្នាំង រូបលោក និងមន្ត្រីនគរបាល របស់លោកតែងតែមកសម្រួលចរាចរណ៍ដល់សិស្សតូចៗ រាល់ម៉ោងចូលនិងចេញពីសាលារៀន គំរូក្រុងនេះ។
លោកបានបញ្ជាក់ថា សមត្ថកិច្ចរបស់លោកបានបែងចែកជា៣ផ្នែក ក្នុងការសម្រួលចរាចរណ៍នេះ គឺទី១នៅមុខវិទ្យាល័យព្រះបាទសុរាម្រិត ទី២ នៅវិមានឯករាជ្យ ជាប់នឹងសាលាបឋមសិក្សាគំរូក្រុងនេះ និងទី៣ នៅវិទ្យាល័យក្រុង កំពង់ឆ្នាំង។ ក្នុងការសម្រួលចរាចរណ៍ដល់សិក្សានុសិស្សនេះ គឺគោលបំណងបញ្ចៀស ករណីគ្រោះថ្នាក់ចរាចរណ៍ កើតឡើងជាយថាហេតុ ព្រោះនៅចំណុចទាំងអស់នេះបើគ្មានការសម្រួលចរាចរណ៍ទេ ពិតជាលំបាកណាស់ ព្រោះសិស្សមានចំនួនច្រើន តែការបើកបររបស់ម្ចាស់យានយន្តទាំងឡាយនៅមានកម្រិត។
ជាចុងក្រោយ លោកក៏សូមអំពាវនាវដល់អ្នកបើកបរយានយន្តទាំងអស់ សូមមេត្តា បើកបរគោរពច្បាប់ចរាចរណ៍ សូមប្រុងប្រយ័ត្ននៅទីប្រជុំជន និងជាពិសេសនៅចំណុចសាលារៀន មានសិស្សឆ្លងកាត់។ សកម្មភាពរបស់នគរបាលចរាចរណ៍ ក្រុងកំពង់ឆ្នាំង ខាងលើ ត្រូវបានក្រុមអាណាព្យាបាល និងមាតាបិតាសិស្ស ពេញចិត្តជាខ្លាំង និងថ្លែងអំណរគុណផងដែរ។ ចំណែកកុមារតូចៗ មុនពេលឆ្លងថ្នល់តែងរត់រកលោកពូ នគរបាលទាំងនោះ ដឹកដៃឲ្យទើបហ៊ានឆ្លងថ្នល់។ ទាំងនេះអាចថា ជាសកម្មភាពគំរូមួយដល់សង្គមជាតិផងដែរ៕
ចែករំលែកព័តមាននេះ