ឮដំណឹង ម្តាយមកមើលទើបដឹងថាជាកូន
ខេត្តកណ្ដាល ៖ បុរសម្នាក់ខណៈកំពុងផឹកស្រាបានលោតចុះហែលទឹកទន្លេលេង២-៣លើក លុះលោតលើកចុងក្រោយហែលបានប្រហែល៥០ម៉ែត្រពីច្រាំងក៏លិចបាត់ទៅក្នុង …
ខេត្តកណ្ដាល ៖ បុរសម្នាក់ខណៈកំពុងផឹកស្រាបានលោតចុះហែលទឹកទន្លេលេង២-៣លើក លុះលោតលើកចុងក្រោយហែលបានប្រហែល៥០ម៉ែត្រពីច្រាំងក៏លិចបាត់ទៅក្នុងទឹកទោះខំរកយ៉ាងណាក៏មិនឃើញ លុះវេលាម៉ោងប្រហែល៧ព្រឹក ថ្ងៃទី២៧ ខែធ្នូ ឆ្នាំ២០១៦ ស្រាប់តែប្រទះឃើញសពអណ្ដែតមកទើរនៅច្រាំងទន្លេមុខវត្តព្រែកសំរោង ភូមិព្រែកសំរោង សង្កាត់តាខ្មៅ ក្រុងតាខ្មៅ ។
សាកសពជនរងគ្រោះត្រូវបានគេស្គាល់ឈ្មោះ អ៊ិន ធារ៉ា ហៅ ជា ភេទប្រុស អាយុ៣៦ឆ្នាំ មុខរបរជាងប៉ះកង់-ម៉ូតូ ទីលំនៅភូមិនិរោធ សង្កាត់និរោធ ខណ្ឌច្បារអំពៅ ។
តាមការបំភ្លឺរបស់សាក្សីបានឲ្យសមត្ថកិច្ចដឹងថា នៅវេលាម៉ោងប្រហែល៦ និង៣០នាទីព្រឹក ថ្ងៃទី២៥ ខែធ្នូ ឆ្នាំ២០១៦ នៅលើផែធ្វើអំពីដែក ជិតគល់ស្ពានច្បារអំពៅចាស់ត្រើយខាងកើត ស្ថិតក្នុងភូមិច្បារអំពៅ សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ ជនរងគ្រោះ និងគ្នីគ្នា៣នាក់ទៀត(ទាំងជនរងគ្រោះ៤នាក់)បានបបួលគ្នាផឹកស្រាថ្នាំអស់ចំនួន៣លីត្ររហូតស្រវឹងរៀងៗខ្លួន ពេលកំពុងផឹកជនរងគ្រោះបានលោតទឹកទន្លេហែលលេងចំនួន៣ដង លុះលើកចុងក្រោយពេលលោតហើយហែលបានប្រហែល៥០ម៉ែត្រពីច្រាំងទន្លេក៏បានលិចក្នុងទឹកបាត់ខ្លួនតែម្ដង ។
ប្រភពបានបន្តទៀតថា លុះដល់ព្រឹកថ្ងៃទី២៧ ខែធ្នូ ទើបគេប្រទះឃើញសាកសពអណ្តែតទឹកនៅចំណុចខាងលើ ពេលនោះ ដំណឹងបានឮដល់ម្តាយជនរងគ្រោះ គាត់ក៏បានមកមើល ទើបដឹងថាសាកសពអណ្តែតទឹកនោះ ជាសាកសពរបស់កូនគាត់ដែលបានបាត់ខ្លួនកាលពីថ្ងៃទី២៥ ធ្នូ ពិតប្រាកដមែន ។
តាមការពិនិត្យរបស់នគរបាលជំនាញបចេ្ចកទេសខេត្តកណ្តាល និងនគរបាលជំនាញបច្ចេកទេសក្រុងតាខ្មៅ ព្រមទាំងអាជ្ញាធរដែលពាក់ព័ន្ធ គឺនៅលើដងខ្លួនសាកសពមិនមានស្លាកស្នាមអ្វីគួរឲ្យកត់សំគាល់ឡើយ សពពិតជាបានស្លាប់ដោយសារលង់ទឹកប្រាកដមែន រួចក៏ប្រគល់សពជូនម្តាយជនរងគ្រោះដើម្បីយកទៅធើ្វបុណ្យតាមប្រពៃណី ៕
ចែករំលែកព័តមាននេះ