តីតតារាសម្តែងអ្នកនាង គឹម លីហ្សា បានទម្លាយរឿងរ៉ាវពិតពីការរស់នៅដោយភាពឯកាបំផុតរបស់ខ្លួនរយៈពេល៤ឆ្នាំ នៅក្នុងប្រទេសអូស្ត្រាលី ទីដែលនាងបានកសាងជីវិតថ្មីជាមួយ
រាជធានីភ្នំពេញ ៖ អតីតតារាសម្តែងអ្នកនាង គឹម លីហ្សា បានទម្លាយរឿងរ៉ាវពិតពីការរស់នៅដោយភាពឯកាបំផុតរបស់ខ្លួនរយៈពេល៤ឆ្នាំ នៅក្នុងប្រទេសអូស្ត្រាលី ទីដែលនាងបានកសាងជីវិតថ្មីជាមួយស្វាមី បន្ទាប់ពីបានសម្រេចចិត្តចូលរោងការជាមួយបុរសអាណិកជនកាលពីអំឡុងឆ្នាំ២០១៣។
និយាយទាំងអួលដើម.កនៅក្នុងកម្មវិធីមួយ នៅទូរទស្សន៍ក្នុងស្រុកកាលពីពេលថ្មីៗនេះ គឹម លីហ្សា បានលើកឡើងថា នៅប្រទេសអូស្ត្រាលី ពេលដែលនាងកំពុងពពោះ គឺនាងនៅតែម្នាក់ឯងប៉ុណ្ណោះ ដោយសារស្វាមីរបស់នាងទៅធ្វើការឆ្ងាយពីផ្ទះ។ នាងថា យើងទម្ងន់នៅផ្ទះម្នាក់ឯង វាមិនស្រួលដូចនៅស្រុកយើងទេ ហើយ៤ឆ្នាំដែលខ្ញុំនៅប្រទេសអូស្ត្រាលី គឺខ្ញុំនៅតែម្នាក់ឯង អញ្ចឹងធ្វើឲ្យខ្ញុំចេះគ្រប់មុខ ហើយខ្ញុំចង់ញ៉ាំអីខ្ញុំចេះធ្វើគ្រប់មុខ ដោយសារខ្ញុំមើលយូធូប ខណៈពេលស្វាមីខ្ញុំមួយខែទើបគាត់មកផ្ទះម្តង។
នាងបញ្ជាក់ថា ខ្មែរយើងនៅប្រទេសអូស្ត្រាលី គាត់សរសើរយើងថា ផ្ទះមួយយើងអាចនៅម្នាក់ឯងបានទាំងដែលយើងជាមនុស្សម្នាក់ដែលខ្លាចខ្មោចបំផុត ហើយពេលទៅពេទ្យពិនិត្យផ្ទៃពោះម្តងៗ គឺយើងទៅដោយខ្លួនឯង ទាំងដែលភាសាអង់គ្លេសបែបបច្ចេកទេសនាងមិនអាចស្តាប់។
នាងបន្ថែមថា ជាធម្មតា នាងមានជំងឺហឺត ហេតុនេះពេលដែលកំពុងពពោះនោះ នាងមានបញ្ហាសុខភាពយ៉ាងខ្លាំង ប៉ុន្តែនាងមិនមានអ្នកជួយមើលឡើយ ដោយពេលខ្លះបន្ទាន់ខ្លាំង នាងក៏ត្រូវហៅឡានពេទ្យដោយខ្លួនឯង និងទៅពេទ្យតែម្នាក់ឯង។
គឹម លីហ្សា បានអះអាងបន្ថែមថា ភាពឯកា ជាមួយនឹងការពពោះកូននៅក្នុងផ្ទៃទៀតនោះបានធ្វើឲ្យអារម្មណ៍របស់នាងមានការព្រួយបារម្ភ និងភិតភ័យយ៉ាងខ្លាំង ជាពិសេសគឺនៅពេលសម្រាល ដោយនាងបានបើករថយន្តទៅសម្រាលកូននៅមន្ទីរពេទ្យតែម្នាក់ឯង ព្រោះស្វាមីរបស់នាងមកមិនទាន់ឡើយ។
នាងថា ក្រោយពេលសម្រាលកូនដោយវះកាត់នោះ នាងក៏នៅមន្ទីរពេទ្យតែម្នាក់ឯងប៉ុណ្ណោះ ហើយអំឡុងពេលនោះ នាងមានការអាឡែកហ្ស៊ីជាមួយនឹងថ្នាំផ្សះដែលធ្វើឲ្យនាងហើមមុខ ដូច្នេះនាងត្រូវនិយាយជាមួយពេទ្យដោយខ្លួនឯង ប៉ុន្តែពេលនោះ នាងក៏ទទួលបានការលើកទឹកចិត្តពីក្រុមគ្រូពេទ្យផងដែរ។
នាងបញ្ជាក់ថា ក្រោយសម្រាលនោះ ស្វាមីរបស់នាងអាចនៅកំដរមើលថែនាងបានត្រឹមមួយសប្តាហ៍តែប៉ុណ្ណោះ ហេតុក្រោយនាងសម្រាលកូនដោយវះកាត់មួយសប្តាហ៍ក្រោយមក គឺនាងត្រូវនៅម្នាក់ឯងទៀត។
យ៉ាងណា បើតាមអ្នកនាង គឹម លីហ្សា ថា នាងមិននឹកស្មានថាជីវិតនៅស្រុកក្រៅរបស់នាងជួបរឿងពិបាកបែបនេះឡើយ បើទោះបីជានាងមិនពិបាករឿងលុយកាក់ ប៉ុន្តែមានលុយក៏នាងមិនអាចជួលអ្នកណាមកជួយមើលថែយើង និងកូនបានឡើយ ផ្ទុយពីនៅស្រុកខ្មែរដែលមានម្តាយ និងបងប្អូនអាចជួយមើលយើងបាន។
គឹម លីហ្សា បានលើកឡើងថា អ្វីដែលនាងនិយាយខាងលើនេះ មិនមែនមានន័យថានាងកំសត់ជាងគេទេ ពោលក៏មានអ្នកដទៃទៀតក៏ជួបបញ្ហាដូចជាយើងដែរ ប៉ុន្តែអ្វីដែលនាងតូចចិត្តនោះ គឺដោយសារជីវិតរបស់នាងនៅពេលនោះ វាបានផ្លាស់ប្តូរលឿនពេក ស្ទើរទទួលយកមិន ខណៈពេលដែលនាងធ្លាប់រស់នៅជាមួយគ្រួសារនាងមិនដែលជួបរឿងបែបនេះឡើយ។
ជាការកត់សម្គាល់អ្នកនាង គឹម លីហ្សា បានសម្រេចចូលរោងការជាមួយបុរសខ្មែរអាណិជនអូស្ត្រាលីឈ្មោះ គាវ វុទ្ធី កាលពីថ្ងៃទី១៨ ខែធ្នូ ឆ្នាំ២០១៣ បន្ទាប់ពីអ្នកទាំងពីរ បានកសាងចំណងស្នេហ៍ជាមួយគ្នាអស់រយៈពេលប្រមាណជា៣ឆ្នាំ ខណៈពេលបច្ចុប្បន្ននាងទទួលបានកូនប្រុសម្នាក់ជាចំណងដៃរួចហើយ។ ហើយបច្ចុប្បន្ន តារាស្រីរូបនេះក៏កំពុងរស់នៅប្រទេសកម្ពុជា ជាមួយកូនប្រុសរបស់នាង ដោយក្នុងនោះនាងកំពុងចាប់មុខរបររស៊ីផ្ទាល់ខ្លួនមួយចំនួននៅក្នុងដៃផងដែរ៕
ចែករំលែកព័តមាននេះ