ADផ្ទាំងផ្សព្វផ្សាយពាណិជ្ជកម្ម

Picture

ល្មមឈប់ជឿហើយ ! ខ្សែ​អំបោះ​ខ្សែ​សីមា​មិន​អាច​ជួយ​អ្នក​ ឬ​កូន​អ្នក​បាន​ទេ

3 អាទិត្យ មុន

ព្រោះតែ​ជំនឿ​ប្រាសចាក​បញ្ញា បាន​ធ្វើ​ឱ្យ​មនុស្ស​មួយ​ចំនួន​ជឿ​លើ​ជំនឿ​បែប​អរូបី លើ​រឿងហេតុ និង​លើ​បាតុភូត​ផ្សេង​ៗ ដែល​ប្រាសចាក​ពី​ទ្រឹស្តី​ព្រះពុទ្ធ​សាសនា​ស្រឡះ និង​ជា​ជំនឿ​គ្មាន​ការណ៍​ពិត​ដែល​ជំនឿ​ទាំងនោះ​មិន​ត្រឹមតែ​មិន​បាន​ផល​អ្វី​នោះ​ទេ តែ​ថែម​ទាំង​នាំ​ឱ្យ​ខូចប្រយោជន៍​ប៉ះពាល់​ទាំង​សុខភាព​ទៀត​ផង ។ ជាក់ស្តែង​មនុស្ស​មួយ​ចំនួន​ហាក់ដូចជា ផ្ញើ​វាសនា…

ព្រោះតែ​ជំនឿ​ប្រាសចាក​បញ្ញា បាន​ធ្វើ​ឱ្យ​មនុស្ស​មួយ​ចំនួន​ជឿ​លើ​ជំនឿ​បែប​អរូបី លើ​រឿងហេតុ និង​លើ​បាតុភូត​ផ្សេង​ៗ ដែល​ប្រាសចាក​ពី​ទ្រឹស្តី​ព្រះពុទ្ធ​សាសនា​ស្រឡះ និង​ជា​ជំនឿ​គ្មាន​ការណ៍​ពិត​ដែល​ជំនឿ​ទាំងនោះ​មិន​ត្រឹមតែ​មិន​បាន​ផល​អ្វី​នោះ​ទេ តែ​ថែម​ទាំង​នាំ​ឱ្យ​ខូចប្រយោជន៍​ប៉ះពាល់​ទាំង​សុខភាព​ទៀត​ផង ។

Picture

ជាក់ស្តែង​មនុស្ស​មួយ​ចំនួន​ហាក់ដូចជា ផ្ញើ​វាសនា ផ្ញើ​សុខទុក្ខ​របស់​ខ្លួន ទៅ​នឹង​ខ្សែ​អំបោះ ឬ​ខ្សែ​សីមា​ថា បើកាលណា​បាន​ពាក់​ខ្សែ​អំបោះ​ទាំងនោះ​នៅ​លើកដៃ កជើង ឬ​នៅ​នឹង​ក ខ្សែ​អំបោះ​ទាំងនោះ​នឹង​ជួយ​ពួក​គេ​ឱ្យ​បាន​សុខ​សប្បាយ មាន​លាភ​មានសំណាង ទៅ​ណា​មក​ណា​មាន​គេ​ស្រឡាញ់​រាប់អាន ។

តែ​ផ្ទុយ​ទៅ​វិញខ្សែ​អំបោះ​ដែល​ពាក់​នៅ​លើ​.​ក មិន​ត្រឹមតែ​មិន​បាន​ផ្តល់​ប្រយោជន៍​នោះ​ទេ តែ​ខ្សែ​អំបោះ​ទាំងនោះ​ថែម​ទាំង​ផ្តល់​ហានិភ័យ​ខ្ពស់​ដល់​អ្នក​ពាក់​វា​ទៀត​ផង ព្រោះ​នៅ​តាម​សរសៃ​ខ្សែ​អំបោះ​នោះ​បណ្តុំ​ទៅ​ដោយ​មេរោគ​ច្រើន​បែប ច្រើន​ប្រភេទ​ណាស់ ។ មេរោគ​នេះ​ហើយ ដែល​ឆ្លង​ចូល​ទៅ​ក្នុង​រាង​កាយ​របស់​យើង​បង្ក​ទៅ​ជា​ជំងឺ​ផ្សេង​ៗ​មាន រលាក​ផ្លូវដង្ហើម រលាក​បំពង់ក រលាក​ក្រពះ​ពោះវៀន​ជាដើម ។

Picture

សូម​មើល​ការ​ពន្យល់​របស់​លោក​វេជ្ជបណ្ឌិត​មួយ​រូប​ដូច​តទៅ ៖
កុមារ​ដែល​មាន​ចងខ្សែ​អំបោះ​ខ្សែ​សីមា​ពាក់​ជាប់​កដៃ កជើង និង​ក ដែល​ខ្សែ​ទាំងនោះ គឺជា​បណ្តុំ​ផ្ទុកមេរោគ​រាប់​សិប​មុខ ក្មេង​ដែល​ខ្ញុំ​ជួប​១០០​នាក់ មាន​ប្រហែល​៩០​នាក់ ហើយ​សុទ្ធតែ​មាន​ខ្សែ​អំបោះ​ខ្សែ​សីមា​ពាក់​ជាប់​នឹង​ដៃ ជើង និង​ក ដែល​ខ្សែ​ទាំងនេះ​ជា​បណ្តុំ​ផ្ទុកមេរោគ​រាប់​សិប​មុខ និង​មាន​ចំនួន​រាប់រយ​លាន​មេរោគ ហើយ​គាប់​ជួន​នឹង​ប្រព័ន្ធ​ការពារ​ក្មេង​នៅ​ខ្សោយ​ផង ដែល​ជា​ហេតុ​នាំ​ឱ្យ​ក្មេង​ងាយ​ឈឺ​ងាយ​ឆ្លង​បំផុត ។

Picture

ព្រោះ​វា​ឆ្លង​តាម​ការ​ចាប់​កាន់ និង​បៀម និង​ជា​ញឹកញាប់​បំផុត​ធ្វើ​ឱ្យ​ក្មេង​មាន​ជំងឺ រលាក​បំពង់ក រលាក​ផ្លូវដង្ហើម រលាក​ក្រពះ​ពោះវៀន ដោយ​មេរោគ ដែល​ជំងឺ​ទាំង​អស់នេះ​អាច​នាំ​ឱ្យ​មាន​ផលវិបាក​ខូច​ដល់​តម្រងនោម ប្រឹស​បេះដូង និង​សន្លាក់​កូន​ក្មេង ។

ការ​ចិញ្ចឹម​ក្មេង​របស់​ឪពុក​ម្តាយ​ស្រុក​ខ្មែរ​មានការ​យល់​ដឹង​ទាប​ខ្លាំង​មែនទែន រឹតតែ​យ៉ាប់​អ្នក​ដែល​នៅ​តាម​ជនបទ​ស្រុកស្រែ​ចម្ការ ។ បញ្ហា​អនាម័យ ជំនឿ​ផ្តេសផ្តាស ទម្លាប់​ផ្តេសផ្តាស បញ្ហា​អាហារូបត្ថម្ភ ការ​បង្រៀន​កូន ការ​ផ្តល់​គំនិត​ខុសឆ្គង សរុប​មក​ការ​ថែទាំ​ទាំង​ផ្នែក​រាង​កាយ និង​ការ​ផ្តល់​គំនិត​បញ្ញា​គឺ​មានការ​ខ្វះខាត​ច្រើន​ពោល​គឺ​នៅ​មាន​កម្រិត​នៅឡើយ ។

Picture

ភាគរយ​កុមារ​កម្ពុជា​ច្រើន​ណាស់​ដែល​មាន​បញ្ហា​កង្វះ​អាហារូបត្ថម្ភ ដែល​ភាគច្រើន​មិនមែន​ដោយសារ​ខ្វះ​អាហារ​ហូប​នោះ​ទេ តែ​ដោយសារ​ការ​យល់​ដឹង​របស់​ឪពុក​ម្តាយ​នៅ​ទាប ។ ក្មេង​ជា​ទំពាំង​ស្នង​ឫស្សី ចុះបើ​ក្មេង​ស្រុក​យើង​ភាគច្រើន​ខ្សោយ​រាង​កាយ បញ្ញា ស្មារតី​ទៅ​ហើយ​តើ​ប្រទេស​យើង​នឹង​រីក​ចម្រើន​ទៅ​ថ្ងៃមុន​យ៉ាងម៉េច​នឹង​កើត​ទៅ​! ។

រឿង​ជឿ​លើ​ជំនឿ​ផ្សេង​ៗ វា​ជា​សិទ្ធិ​សេរីភាព​របស់​អ្នក​ជឿ​មែនហើយ តែ​ការ​ជឿ​ត្រូវ​មាន​ហេតុផល ហើយ​ត្រូវ​ប្រកបដោយ​បញ្ញា​ពិចារណា​ផង​ព្រោះ​ជំនឿ​ខ្លះ​មិនមែន​ត្រឹមតែ​មិន​ផ្តល់​ផលប្រយោជន៍​ដល់​អ្នក​ជឿ​នោះ​ទេ តែ​ថែម​ទាំង​ធ្វើ​ឱ្យ​ខូចប្រយោជន៍ ខាត​ពេលវេលា ខូច​ទាំង​សុខភាព បាត់បង់​ទាំង​ទ្រព្យសម្បត្តិ​ទៀត​ផង ៕