សហរដ្ឋអាមេរិក ៖ ក្រសួងពាណិជ្ជកម្មរបស់ប្រទេសនេះបានរាយការណ៍កាលពីថ្ងៃព្រហស្បតិ៍កន្លងមកថា សេដ្ឋកិច្ចអាមេរិកបានកើនឡើង៣,៥%ក្នុងត្រីមាសទី៣ឆ្នាំនេះ គឺពីខែកក្កដា ដល់ខែកញ្ញា ។
សហរដ្ឋអាមេរិក ៖ ក្រសួងពាណិជ្ជកម្មរបស់ប្រទេសនេះបានរាយការណ៍កាលពីថ្ងៃព្រហស្បតិ៍កន្លងមកថា សេដ្ឋកិច្ចអាមេរិកបានកើនឡើង៣,៥%ក្នុងត្រីមាសទី៣ឆ្នាំនេះ គឺពីខែកក្កដា ដល់ខែកញ្ញា ។
វាជាការកើនឡើងក្នុងមួយត្រីមាសដ៏ល្អជាងគេ ក្នុងរយៈពេល២ឆ្នាំកន្លងមកផងដែរ ។ ការព្យាករដំបូងដែលចេញក្នុងខែតុលា គឺគិតថា សេដ្ឋកិច្ចមានការលូតលាស់តែ២,៩%ប៉ុណ្ណោះសម្រាប់ត្រីមាសទី៣នេះ ។
វាក៏ជាភស្តុតាងចុងក្រោយបង្ហាញពីសកម្មភាពសេដ្ឋកិច្ចក្នុងរយៈពេលប៉ុន្មានខែមុនពេលបោះឆ្នោត ដោយលោកប្រធានាធិបតីជាប់ឆ្នោត Donald Trump និយាយថា សហរដ្ឋអាមេរិកមានការលូតលាស់យឺត ។ លើសពីនេះ ក៏នៅជិតអត្រា៤% ដែលលោក Trump បានសន្យាសម្រាប់សេដ្ឋកិច្ចផងដែរ ។
ប៉ុន្តែទោះជាការលូតលាស់សេដ្ឋកិច្ចបានកើនឡើងក្នុងអំឡុងពេលនោះក្តី វាក៏មិនអាចជួយឲ្យឆ្នាំ២០១៦ទាំងមូលល្អឡើងវិញច្រើនប៉ុន្មានដែរ ។ សេដ្ឋកិច្ចអាមេរិកនៅតែបន្តលូតលាស់ក្នុងល្បឿនដ៏យឺតនៅអំឡុងឆមាសទី១ ដែលជាមធ្យមស្មើតែ១,១%ប៉ុណ្ណោះ ហើយសេដ្ឋវិទូជាច្រើនព្យាករថា ការលូតលាស់ទាំងស្រុងក្នុងឆ្នាំនេះ គឺស្មើតែ២% ។
ធនាគារជាតិអាមេរិកក៏មើលឃើញថា សេដ្ឋកិច្ចលូតលាស់ក្នុងអត្រា២%ផងដែរសម្រាប់ប៉ុន្មានឆ្នាំខាងមុខទៀត ។ មូលហេតុដែលជំរុញដល់ការលូតលាស់ក្នុងត្រីមាសទី៣ គឺមកពីការនាំចេញសណ្តែកសៀងកើនឡើង ។
ប៉ុន្តែកត្តាផ្សេងៗក៏បានល្អឡើងវិញផងដែរដូចជា ការចំណាយក្នុងស្រុកកើនឡើង៣%។ ចំណែកការចំណាយផ្នែកអាជីវកម្មលើអគារ និងគម្រោងថ្មីៗមិនបានទាញទម្លាក់សេដ្ឋកិច្ចខ្លាំងដូចក្នុងត្រីមាសដទៃទេ ហើយរដ្ឋាភិបាលកណ្តាលក៏បានចំណាយបន្ថែមផងដែរ ៕
ចែករំលែកព័តមាននេះ