រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ ថ្លែងថា ការប្រមូលផលស្រូវឆ្នាំនេះ នឹងសម្រេចបានចំនួន១០,៥លានតោន កើនឡើង១១% បើធៀបនឹងរយៈពេលដូចគ្នាកាលពីឆ្នាំមុន
រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ ថ្លែងថា ការប្រមូលផលស្រូវឆ្នាំនេះ នឹងសម្រេចបានចំនួន១០,៥លានតោន កើនឡើង១១% បើធៀបនឹងរយៈពេលដូចគ្នាកាលពីឆ្នាំមុន ខណៈការប្រមូលផលរហូតមកទល់ពេលនេះសម្រេចបានប្រមាណ៦០% ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងកាលពីថ្ងៃទី២៤ ធ្នូ កន្លងមកថា រហូតមកទល់ពេលនេះ ការប្រមូលផលស្រូវសម្រេចបានជាង៦០%ហើយ ដោយក្រសួងរំពឹងថា ទិន្នផលស្រូវប្រមូលបាននៅឆ្នាំនេះ នឹងមានកំណើនរហូតដល់១១% ខណៈរយៈពេល១០ឆ្នាំមកនេះ ទិន្នផលស្រូវកើនឡើងត្រឹមតែ៤,៥%ប្រចាំឆ្នាំប៉ុណ្ណោះ។ ចំពោះតម្លៃស្រូវឆ្នាំនេះ មិនមានបញ្ហាទេ ដោយតម្លៃស្រូវក្រអូបមានតម្លៃ៩៩១រៀល និងស្រូវសរីរាង្គដែលសហគមន៍កសិករបានចុះកិច្ចសន្យាជាមួយក្រុមហ៊ុន មានតម្លៃ១.២០០ទៅ១.៣០០រៀលក្នុង១គីឡូក្រាម ។
លោកមានប្រសាសន៍ថា ៖ « អ្វីជាការលំបាករបស់ប្រជាកសិករសព្វថ្ងៃនេះ គឺទិន្នផលស្រូវមានកំណើនទាប ដោយដី១ហិកតាប្រមូលផលបានតែ៣ទៅ៤តោន ។ ទិន្នផលបែបនេះមិនអាចជួយកសិកររកប្រាក់ចំណេញបានទេ។ ក្រសួងកំពុងគិតគូរធ្វើយ៉ាងណាឲ្យទិន្នផលកើនឡើងចន្លោះពី៦ទៅ៧តោនក្នុង១ហិកតា ទើបកសិករអាចរកប្រាក់ចំណេញបាន » ។
លោក វេង សាខុន បន្តថា ក្រសួងបាននិងកំពុងជំរុញឲ្យក្រសួងធនធានទឹក ជួយកែសម្រួលធ្វើយ៉ាងណាឲ្យប្រព័ន្ធប្រឡាយអាចបង្ហូរទឹកចូលស្រែបានដោយផ្ទាល់ ជាជាងប្រើប្រាស់ម៉ាស៊ីនបូមទឹក ដែលធ្វើឲ្យការចំណាយកើនឡើងខ្ពស់ ។ ក្រសួងក៏បាននិងកំពុងជំរុញឲ្យមានការចងក្រងសហគមន៍កសិករដើម្បីធ្វើស្រែសរីរាង្គ និងចុះកិច្ចសន្យាជាមួយក្រុមហ៊ុនប្រមូលទិញ ដើម្បីធានាតម្លៃស្រូវប្រកបដោយស្ថិរភាព និងអាចជួយកសិករបាន ។
លោកបន្តទៀតថា វិស័យកសិកម្មកាលពីមុនរួមចំណែកប្រមាណ៨០% នៃផលទុនជាតិសរុប ប៉ុន្តែបច្ចុប្បន្ន ការរួមចំណែករបស់វិស័យនេះ បានធ្លាក់មកនៅក្នុងរង្វង់២៨% នៃផលិតផលក្នុងស្រុកសរុបប៉ុណ្ណោះ ។
ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ ដែលបានឃ្លាំមើលដំណើរវិវត្តន៍វិស័យនេះជាយូរមកហើយថ្លែងថា ការធ្វើស្រែមិនសូវចំណេញច្រើនទេ ហើយទំហំនៃការធ្វើស្រែក៏មានច្រើនផងដែរ។ ហេតុនេះ ក្រសួងគួរតែគិតគូរពីផែនការច្បាស់លាស់ដើម្បីផ្តល់ជម្រើសដល់កសិករដាំដំណាំរួមផ្សំដទៃទៀត ដោយធ្វើពិពិធកម្មផលិតផលកសិកម្មឲ្យមានភាពល្អប្រសើរ និងឆ្លើយតបតម្រូវការទីផ្សារពិតប្រាកដ ។
លោកបន្តថា ៖ « ការស្វែងរកទីផ្សារជាមុន មុនធ្វើការផលិតជាការសំខាន់ណាស់ ដែលត្រូវធ្វើដើម្បីឲ្យប្រាកដថា ផលិតផលកសិកម្មដែលផលិតបានមានទីផ្សារពិតប្រាកដ មិនមែនផលិតបានហើយ ទើបរកទីផ្សារនោះទេ ។ វិស័យកសិកម្មបានស្ថិតក្នុងសភាពទ្រឹង ដូច្នេះទាមទារឲ្យមានផែនការមេច្បាស់លាស់ ដើម្បីលើកស្ទួយវិស័យនេះឲ្យមានកំណើនឡើងវិញ» ៕
ចែករំលែកព័តមាននេះ