រសើបណាស់បង…
រឿងដោះដូរទីតាំងរបស់មន្ទីរ អង្គភាពរដ្ឋ…ទោះបីរឿងចាស់យូរឆ្នាំដែលបានជោគជ័យក៏ដោយ…វានៅតែជារឿង«រសើបណាស់បង»ដដែល…
រឿងដោះដូរទីតាំងរបស់មន្ទីរ អង្គភាពរដ្ឋ…ទោះបីរឿងចាស់យូរឆ្នាំដែលបានជោគជ័យក៏ដោយ…វានៅតែជារឿង«រសើបណាស់បង»ដដែល…។ ឱ្យវារសើបទៅចុះ…ព្រោះអត់មានអ្នកណាទប់ឈ្នះឡើយ…ព្រោះ«ខ្លាញ់គោ» ។
វាគួរឱ្យកត់សម្គាល់…នៅតែមានការ«ដោះដូរ»ជាបន្តបន្ទាប់…។ ខ្លះដោះដូរច្រើនឆ្នាំមកហើយ…ចែកគ្នាស៊ីសាច់…ស៊ីគ្រឿងក្នុងចង់អស់ទៅហើយ…នៅតែមិនទាន់ចប់…នៅសល់ស្បែកជះក្លិនអសោច…។
កន្លែងខ្លះ…ទោះបីរសើបខ្លាំង…រសើបណាស់បង យ៉ាងណាក៏ដោយ…ត្រូវតែទ្រាំ…បើចិត្តមិនដាច់បោះមេមិនបាន…ទៅ ! ត្រូវតែរើចេញ…។ នោះគឺការដោះដូរទីតាំងប៉ូលិសខេត្តកំពង់ឆ្នាំង…។ មេចាស់ស៊ីជុះចោល…មេថ្មីមកដល់ជួយលាង…
កន្លែងខ្លះទៀត…នៅកល់ទុកសិន កុំអាលជ្រួល ! ដោះដូរយូរឆ្នាំហើយ…តគ្នាច្រើនជុំមកហើយ…លើកដាក់តគ្នាដោយស្ងប់ស្ងាត់…ធ្លាក់ដល់ម្ចាស់ចុងក្រោយ…បង្ខំឱ្យចេញឆាប់…ឱ្យបានមុនចូលឆ្នាំ២០១៧ ។
រៀបចំជើងព្រួល…រៀបចំតូបឱ្យសំណាក់ធម៌បណ្តោះអាសន្នទៅហើយ…ស្រាប់តែរឿង «រសើប»នោះវារើឡើងវិញ…«រសើបណាស់បងអើយ…» ។
មេចាស់ចែកគ្នាស៊ីម៉ដ្ឋ…មេថ្មីមកដល់ជួយលាង…ជួយទប់ជើងគ្រែ…ទីបំផុត ! ឈប់សិនវ៉ឺយ…ប្រញាប់ប្រកាច់ទៅណា ? អ្នកណានៅទីណា នៅសិនទៅ !
ទ្រាំតាមកម្ម…សម្ងំសិនវ៉ឺយ…«រសើបណាស់បងអើយ»…ជិតបោះឆ្នោតផង…
នោះគឺរឿងដោះដូរទីតាំងខណ្ឌដូនពេញ…ដីឯងធំពេក…ឯងយកប៉ុនបង្គន់ផ្សារថ្មីបានហើយ…សល់ប៉ុន្មានទុកឱ្យអញថៅកែឡាន…ទុកដាក់តាំងហាងឡាន ៕
អាឡេវ
ចែករំលែកព័តមាននេះ