ប៉ូលិសខណ្ឌដង្កោបង្ក្រាបទីតាំងលួចផលិតឯកសារក្លែងក្លាយ
រាជធានីភ្នំពេញ ៖ កម្លាំងនគរបាលខណ្ឌដង្កោ ដឹកនាំដោយលោកវរសេនីយ៍ទោ ជឹម ស៊ីថា អធិការនគរបាលខណ្ឌ បានចាប់ខ្លួនជនសង្ស័យម្នាក់
រាជធានីភ្នំពេញ ៖ កម្លាំងនគរបាលខណ្ឌដង្កោ ដឹកនាំដោយលោកវរសេនីយ៍ទោ ជឹម ស៊ីថា អធិការនគរបាលខណ្ឌ បានចាប់ខ្លួនជនសង្ស័យម្នាក់ ដែលបានឃុបឃិតគ្នាជាមួយបក្សពួកដទៃទៀត បើកទីតាំងផលិត និងបោះពុម្ពក្លែងក្លាយឯកសារពន្ធ កាតគ្រី ក្រដាសឆៀក សលាកប័ត្រ ព្រមទាំងប័ណ្ណបើកបររថយន្តនិងម៉ូតូក្លែងក្លាយមួយកន្លែង ។
ការចាប់ខ្លួនខាងលើនោះ បន្ទាប់ពីកម្លាំងធ្វើការស្រាវជ្រាវអស់រយៈពេល៣ខែកន្លងមកហើយ ខណៈពេលដែលទីតាំងខាងលើនោះ មានមនុស្សចេញ-ចូលៗមិនដែលដាច់ធ្វើឲ្យមានការសង្ស័យ។
ការចាប់ខ្លួនជនសង្ស័យត្រូវបានធ្វើឡើង កាលពីវេលាម៉ោង៥ល្ងាច ថ្ងៃទី២៣ ធ្នូ ចំណុចផ្លូវជិតបឹងតាម៉ាត ស្ថិតនៅក្នុងភូមិសំបួរ សង្កាត់ដង្កោ ខណ្ឌដង្កោ ។ ក្រោយពេលចាប់ខ្លួន កម្លាំងនគរបាលខាងលើ បាននាំទៅសាកសួរនៅអធិការដ្ឋាន បានដឹងសាច់រឿងទើបនៅវេលាល្ងាចថ្ងៃដដែលនោះ លោកអធិការនគរបាលខណ្ឌ បានដាក់កម្លាំងធ្វើការឡោមព័ទ្ធទីតាំងសង្ស័យ តាមការចង្អុលបង្ហាញពីជននោះ គឺស្ថិតនៅចំណុច ផ្ទះលេខ ៧១A ផ្លូវលេខ៩ បុរីពិភពថ្មី ក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ ។ បន្ទាប់មកលោកអធិការរូបនោះ បានរាយការណ៍ជូនលោកស្នងការ និងសុំគោលការណ៍លោកព្រះរាជអាជ្ញាអមសាលាដំបូងរាជធានីភ្នំពេញ ដើម្បីធ្វើការឆែកឆេរទីតាំងនោះ ដោយបានរាយការណ៍សុំការសហការពីមន្ត្រីមន្ទីរសាធារណការ និងដឹកជញ្ជូនរាជធានីភ្នំពេញ មន្ត្រីគយ មន្ត្រីពន្ធដារ និងបានចុះទៅឆែកឆេរទីតាំងខាងលើនោះ នាវេលាម៉ោង៨និង២០នាទីព្រឹក ថ្ងៃទី២៤ ធ្នូ ។
យុវជនដែលជាអ្នកផលិតនិងបោះពុម្ភឯកសារពន្ធរថយន្តនិងម៉ូតូក្លែងក្លាយ ហើយត្រូវបានកម្លាំងនគរបាលខណ្ឌដង្កោ ឃាត់ខ្លូនបាននោះឈ្មោះ ហ៊ត ចិន អាយុ២១ឆ្នាំ ស្នាក់នៅចំណុចផ្ទះដែលត្រូវឆែក ឆេរខាងលើនោះ ។ ចំណែកបក្សពួកមួយចំនួនទៀត បានរត់គេចខ្លួនទៅបាត់ស្រមោល ព្រោះនៅក្នុងខណៈពេលដែលកម្លាំងចុះទៅធ្វើការឡោមព័ទ្ធនោះ ជនខាងលើបានទូរស័ព្ទឲ្យបក្សពួករត់គេចខ្លួនបាត់អស់ មុនពេលនគរបាលទៅដល់ ។
លោកវរសេនីយ៍ទោ ជឹម ស៊ីថា អធិការនគរបាលខណ្ឌដង្កោ បានឲ្យដឹងថា នៅក្នុងប្រតិបត្តិការបង្ក្រាបសម្បុកផលិត និងបោះពុម្ពប័ណ្ណយានយន្តក្លែងក្លាយខាងលើនោះ កម្លាំងដកហូតបានឯកសារក្លែងក្លាយ ពាក់ព័ន្ធជាមួយស្ថាប័នគយមាន ពុម្ពធ្វើសាលកប័ត្ររថយន្តចំនួន១៣បន្ទះធ្វើពីដែក, សាលាកប័ត្ររថយន្ត ធុនដឹកជញ្ជូន, រថយន្តទេសចរណ៍, រថយន្តផ្សេងៗទៀតជាច្រើនសន្លឹក ។ ឧបករណ៍សម្រាប់ផលិតមានដូចជា ម៉ាស៊ីនសង្កត់ពណ៌២គ្រឿង, ម៉ាស៊ីនម៉ាក Mimaki ពណ៌សចំនួន១គ្រឿង, ឯកសារមួយចំនួន, ម៉ាស៊ីនព្រីន២គ្រឿង, ម៉ាស៊ីនអ៊ុតកាត ពណ៌សបូកខ្មៅ១គ្រឿង, CPUកុំព្យូទ័រ២គ្រឿង, ម៉ាស៊ីនព្រីនកាត១គ្រឿង, ពុម្ពនិងត្រាចំនួន២០, តុ១, កង្ហារ១គ្រឿង, កេសដាក់ឯកសារចំនួន៣, កន្ត្រៃកាត់ចំនួន២០, ខ្សែភ្លើងមួយចំនួន។ លោកអធិការបានបន្តថា ដោយឡែកសម្ភារពាក់ព័ន្ធជាមួយអង្គភាពពន្ធដារមានដូចជា តែមសារពើពន្ធចំនួន៩៨១សន្លឹក (ប្រភេទ៥០០រៀល), ប័ណ្ណបង់ពន្ធ លើមធ្យោបាយដឹកជញ្ជូនចំនួន១.០៤២សន្លឹក, ត្រាសាខាពន្ធដារ ខណ្ឌចំការមន, ខណ្ឌសែនសុខ, ខណ្ឌឫស្សីកែវ, ខណ្ឌមានជ័យ ,ពុម្ពសម្រាប់បិទក្នុងប័ណ្ណចំនួន៧៦៥សន្លឹក ។
ចំណែកឯកសារពាក់ព័ន្ធ និងអង្គភាពសាធារណការ និងជញ្ជូន រួមមាន ប័ណ្ណសម្គាល់យានយន្តបោះពុម្ពរួច រាជធានីភ្នំពេញចំនួន៨០សន្លឹក, បណ្តាខេត្តចំនួន១៩សន្លឹក, ប័ណ្ណសម្គាល់ទោចក្រយានយន្ត បោះពុម្ពរួចរាជធានីភ្នំពេញចំនួន៤៥សន្លឹក, បណ្តាខេត្តចំនួន៣៤សន្លឹក, ប័ណ្ណបើកបររាជធានីភ្នំពេញ ចំនួន៣០សន្លឹក, អគ្គនាយកដ្ឋានដឹកជញ្ជូនចំនួន៣៦សន្លឹក, ប័ណ្ណបើកបរត្រឹមត្រូវច្បាប់ដើម១សន្លឹក, ប័ណ្ណមិនទាន់បោះពុម្ព និងបោះពុម្ពខុសចំនួន៩០សន្លឹក, ប័ណ្ណសម្គាល់យានយន្តមិនទាន់បោះពុម្ពចំនួន២៤២សន្លឹក, ប័ណ្ណបើកបរ មិនទាន់បោះពុម្ពចំនួន៨៣សន្លឹក, វិញ្ញាបនប័ត្រត្រួតពិនិត្យលក្ខណៈបច្ចេកទេសយានយន្ត ចំនួន៤១០សន្លឹក, លិខិតអនុញ្ញាតអាជីវកម្មយានយន្ត ចំនួន៥៩៨សន្លឹក, ឯកសារពិនិត្យបច្ចេកទេសយានយន្តចំនួន២៥សន្លឹក, ស្ទីកឃ័របិទលើកញ្ចក់រថយន្ត ចំនួន១២៦១សន្លឹក, ឡូហ្គោព្រះនរាយណ៍តូចចំនួន២៣០៣សន្លឹក, ឡូហ្គោព្រះនរាយធំចំនួន១៣៧៦សន្លឹក ។
លោកអធិការបានបន្តទៀតថា ការបង្កើតផលិតនិងបោះពុម្ពក្លែងកក្លាយរាល់ឯកសារយានយន្តខាងលើគឺជាទង្វើខុសច្បាប់ ព្រោះបានធ្វើឲ្យខាតបង់ថវិកាជាតិ ហើយមានប្រជាពលរដ្ឋបាននាំគ្នាទៅទិញយ៉ាងច្រើន ព្រោះក្រុមជន សង្ស័យលក់ក្នុងតម្លៃថោកៗ ប៉ុន្តែអ្នកដែលទៅទិញប្រើនោះ មិនបានគិតថាជាទង្វើខុសច្បាប់នោះឡើយ ។ នៅមិនទាន់ដឹងថា អ្នកដែលទៅទិញយកប្រើប្រាស់នោះមានចំនួនប៉ុន្មាននៅឡើយទេ ព្រោះកំពុងស្ថិតក្នុងការស្រាវជ្រាវ និងសួរនាំជនសង្ស័យខាងលើនោះនៅឡើយ ៕
ចែករំលែកព័តមាននេះ