រុស្ស៊ី ៖ ប្រភពព័ត៌មានពី Russia Beyong The Headline បានឱ្យដឹងថា កាលព្រឹកថ្ងៃទី២៥ ធ្នូ ដែលចំនឹងថ្ងៃបុណ្យណូអែល នោះ មានយន្តហោះរបស់ក្រសួងការពារជាតិរុស្ស៊ី Tu-154 ដែលធ្វើដំណើរពីរុស្ស៊ីទៅប្រទេសស៊ីរី បានធ្លាក់ចូលក្នុងសមុទ្រខ្មៅ។
តាមរបាយការណ៍ស្តីពីចំនួនអ្នកដំណើរនៅក្នុងយន្តហោះ មានលក្ខណៈខុសគ្នាពីមួយទៅមួយ ។ មកដល់ពេលនេះគេដឹងថា អ្នកធ្វើដំណើរទាំងអស់មានចំនួន៩២នាក់ ដែលក្នុងនោះមាន៦៨នាក់ជាសមាជិកក្រុមលេងភ្លេងកងទ័ព Alexandrov, ៩នាក់ជាអ្នកកាសែត និង៨នាក់ ជាសមាជិកធ្វើការលើយន្តហោះ ។
តាមប្រសាសន៍របស់ប្រធានគណៈកម្មាធិការក្រុមប្រឹក្សាសហព័ន្ធការពារជាតិ និងសន្តិសុខ លោក Viktor Ozerov ឱ្យដឹងថា ការធ្លាក់យន្តហោះនេះ អាចបណ្តាលមកពីបញ្ហាបច្ចេកទេស ឬអាចមកពីបញ្ហាអ្នកបើកយន្តហោះ ។ គេនៅមិនទាន់ដឹងច្បាស់នៅឡើយ ។ លោកបន្តថា ការធ្លាក់នេះ មិនពាក់ព័ន្ធជាមួយនឹងអំពើភេវរកម្មទេ ។
តាមការរាយការណ៍ពីប្រព័ន្ធផ្សព្វផ្សាយរុស្ស៊ីក៏បានឱ្យដឹងដែរថា ហេតុការណ៍បានកើតឡើង ស្របពេលជាមួយនឹងអ្នកបញ្ជាយន្តហោះជ្រើសរើសរយៈកម្ពស់ក្នុងការហោះ។ តែពេលនោះ ពួកគេមិនបានបញ្ជូនព័ត៌មានអ្វីមកកាន់ខាងក្រោមទេ ។ កម្ទេចកម្ទីរយន្តហោះ ត្រូវគេរកឃើញនៅចម្ងាយ១ម៉ាយ ពីឆ្នេរ Sochi ។
អ្នកជំនាញមកពីក្រសួងសង្គ្រោះបន្ទាន់ និងគណៈកម្មាធិការស៊ើបអង្កេតកំពុងតែធ្វើការលើរឿងនេះ ។ ពួកគេបានប្រមូលឯកសារដែលពាក់ព័ន្ធទៅនឹងការហោះហើរ ហើយពេលនេះ ពួកគេកំពុងតែបើកការសួរនាំទៅកាន់បុគ្គលិកពាក់ព័ន្ធនៅព្រលានយន្តហោះ៕
ចែករំលែកព័តមាននេះ