ប្រទេសថៃ ៖ ក្រុមការងារនៃរថភ្លើងរដ្ឋរបស់ប្រទេសថៃ (SRT) នឹងប្រជុំនៅថ្ងៃសុក្រ ដើម្បីលើកឡើងពីផែនការរយៈពេល៥ឆ្នាំ លើការអភិវឌ្ឍដីមិនមែនជាតំបន់ស្នូល ។
លោក Amnuay Preemonwong ប្រធានរបស់ SRT បានឱ្យដឹងកាលពីថ្ងៃពុធថា ការពិភាក្សានេះផ្តោតសំខាន់លើរបៀបដែលទីភ្នាក់ងាររដ្ឋនឹងទទួលបានអត្ថប្រយោជន៍ពីដីទាំងនេះ ដែលមានចំនួនសរុបប្រមាណ៣៩ពាន់រ៉ៃ (៦.២៤០ហិកតា) ចាប់ពីឆ្នាំក្រោយដល់ឆ្នាំ២០២១ ។
ក្នុងចំណោមដីសរុបទាំងអស់២៣ពាន់រ៉ៃជាដីទំនេរ, ១៦ពាន់រ៉ៃជាដី SRT ជួល និង២៥២រ៉ៃជាដីត្រូវបានគេទន្ទ្រានយក ។ SRT នឹងពិចារណាថា តើគួរតែបង្កើតក្រុមហ៊ុនបុត្រសម្ព័ន្ធដើម្បីគ្រប់គ្រងដីសម្រាប់ការអភិវឌ្ឍដែរឬទេ ។
លោក Amnuay លើកឡើងថា ៖ «កិច្ចប្រជុំនេះនឹងពិចារណាលើដីទំនេរណាអាចអភិវឌ្ឍន៍បាន និងតម្លៃជួល ក្នុងគោលបំណងបង្កើនប្រាក់ចំណូលដល់ទីភ្នាក់ងាររបស់រដ្ឋ » ។ SRT នឹងពិចារណាក្នុងការបង្កើនថ្លៃជួល មុនការផុតកំណត់រយៈពេលជួល៥ឆ្នាំផងដែរ ។
គម្រោងអភិវឌ្ឍន៍ដីមិនមែនតំបន់ស្នូល ជាផ្នែកមួយនៃផែនការរបស់ SRT ដើម្បីបង្កើនប្រាក់ចំណូល ស្របជាមួយការស្តារនីតិសម្បទាផងដែរ ។ ទីភ្នាក់ងាររដ្ឋនេះរកចំណូលបាន៣ប៊ីលានបាតក្នុង១ឆ្នាំ ពីទ្រព្យសកម្មសរុបរបស់ខ្លួនដែលមានបរិមាណទាប បើពិចារណាពីចំនួនដីដែលមាន ៕
ចែករំលែកព័តមាននេះ