ការជួលលំនៅឋានក្នុងតំបន់ដែលត្រូវការរស់នៅបណ្តោះអាសន្ន ចំណុចល្អនៃការជួល គឺមិនចាំបាច់ចំណាយប្រាក់ច្រើនទិញលំនៅឋាន និងមានសេរីភាពក្នុងការផ្លាស់ប្តូរទីកន្លែងរស់នៅផងដែរ ។ បច្ចុប្បន្ន មានជម្រើសជាច្រើនដែលអ្នកអាចជ្រើសរើសការជួលតាមតម្រូវការ។ ប៉ុន្តែក្នុងនាមជាអ្នកជួល គឺមិនមែនគ្រាន់តែចំណាយប្រាក់ដើម្បីរស់នៅនោះទេ តើមានអ្វីខ្លះដែលអ្នកជួលគួរធ្វើ និងមិនគួរធ្វើ ?
១-អានឱ្យលម្អិតនូវកិច្ចសន្យាជួល ៖
ត្រូវអានកិច្ចសន្យាជួល និងយល់ឱ្យបានច្បាស់លាស់ពីការចំណាយ រយៈពេលកំណត់បង់ប្រាក់ទៅម្ចាស់ផ្ទះជួល ទោះបីជាប្រើពេលវេលាយូរបន្តិចក្តី គឺសម្រាប់ប្រយោជន៍ដល់អ្នកជួលខ្លួនឯង និងសួរភ្លាមៗបើមានចំណុចណាសង្ស័យ ។
២-ថតស្ថានភាពអចលនទ្រព្យមុននឹងចូលរស់នៅ ៖
ការចងចាំ អ្នកអាចនឹងត្រូវបានគេបោកបញ្ឆោត ។ បើសិនជាជួលអចលនទ្រព្យនានា កុំភ្លេចថតរូបស្នាមដានដែលខូចខាតមុនពេលចូលរស់នៅដើម្បីការពារខ្លួនអ្នក និងប្រាក់កក់នៅពេលរើចេញ ព្រមទាំងទុកជាភស្តុតាងថា មានស្នាមបែបនេះមុនពេលមករស់នៅទៅទៀត ។
៣-រក្សាទុកភស្តុតាងការទូទាត់ប្រាក់ ៖
ដើម្បីជាប្រយោជន៍ មិនថាការចុះហត្ថលេខា ឈ្មោះ សាច់ប្រាក់ ឬប្រគល់ប្រាក់ គឺត្រូវរក្សាទុកភស្តុតាងទាំងអស់ ។ បើអ្នកមិនចូលចិត្តប្រមូលទុកនូវប័ណ្ណផ្ទេរប្រាក់ទេនោះ គឺអាចថតរូបទុកនៅពេលទូទាត់ជាមួយម្ចាស់ផ្ទះជួល ។
៤-ផ្តល់ដំណឹងទៅម្ចាស់ផ្ទះជាមុន ៖
យ៉ាងតិចណាស់១-២ខែ អ្នកត្រូវផ្តល់ដំណឹងទៅពួកគេនៅពេលដែលចង់ឈប់ជួល ដើម្បីផ្តល់ពេលវេលាដល់ម្ចាស់ផ្ទះក្នុងការស្វែងរកអតិថិជនថ្មីទៀត និងមិនត្រូវគេយកប្រាក់កក់ ។
៥-សុំព័ត៌មានលម្អិតរបស់ម្ចាស់ផ្ទះ និងអ្នកជិតខាង ៖
ប្រសិនបើអ្នកទើបតែរើផ្ទះមករស់នៅបរិវេណនេះ ការស្គាល់គ្នាជាមួយអ្នកជិតខាង គឺជារឿងល្អនៅពេលកើតហេតុការណ៍ ឬត្រូវការជំនួយ ។
៦-មិនគួរបង្កសំឡេងខ្លាំង ៖
មិនត្រូវធ្វើសកម្មភាពណាមួយដែលរំខានដល់អ្នកដទៃនៅក្បែរគ្នាខុសពេលវេលាទេ ចូរព្យាយាមកាត់បន្ថយសំឡេងទាំងនោះ ។
៧-មិនជួលបន្តទៀត ៖
អ្នកជួលមិនអាចយកអចលនទ្រព្យដែលកំពុងជួលនោះទៅជួលបន្តឱ្យបុគ្គលផ្សេងទៀតបានឡើយ លើកលែងតែមានការព្រមព្រៀងគ្នាជាមួយម្ចាស់ផ្ទះ ។ ដូច្នេះ ប្រសិនជាគ្មានការសរសេរនៅក្នុងកិច្ចសន្យាទេ អ្នកក៏មិនអាចធ្វើបែបនេះបានដែរ ។
៨-មិនលាក់បាំងគោលបំណងនៃការជួល ៖
បើសិនជាប្រាប់ម្ចាស់ផ្ទះជួលថា សុំជួលផ្ទះ ឬបន្ទប់សម្រាប់ស្នាក់នៅតែប៉ុណ្ណោះ ប៉ុន្តែជាក់ស្តែង អ្នកយកផ្ទះនោះមកប្រកបអាជីវកម្ម ការធ្វើបែបនេះ គឺខុសនឹងគោលបំណងនៃការជួល ហើយនៅពេលបានទទួលការដាស់តឿន ប៉ុន្តែអ្នកនៅតែប្រព្រឹត្តបន្តទៀត គឺអាចនឹងត្រូវបញ្ឈប់កិច្ចសន្យាជួលបាន ។
៩-មិនបង់ថ្លៃឈ្នួលយឺតយ៉ាវ ៖
ត្រូវបង់ថ្លៃឈ្នួលឱ្យទៀងទាត់ពេលវេលាដែលម្ចាស់ផ្ទះកំណត់ ។ វាជាការល្អដែលនឹងមិនធ្វើឱ្យប្រវត្តិការជួលរបស់អ្នកខូច និងជាការធ្វើឱ្យខ្លួនឯងមានវិន័យផងដែរ ។ ម្ចាស់ផ្ទះជួលតែងចង់បានមនុស្សដែលបង់ថ្លៃឈ្នួលទៀងទាត់ពេលវេលា ។ បច្ចុប្បន្ននេះ មានឧបករណ៍ទំនាក់ទំនងជាច្រើនដែលអាចដាស់តឿនបាន ។
១០-មិនគួរជួលទាំងមិនទាន់ឃើញអចលនទ្រព្យពិតប្រាកដ ៖
មិនថាបច្ចុប្បន្ននេះ ការស្វែងរកជួលអចលនទ្រព្យងាយស្រួលជាងសម័យមុន ព្រោះបន្ទប់ និងអាផាតមិនជាច្រើនបានប្រកាសរកអ្នកជួលក្នុងអុីនធើរណេត ដោយមានរូបបង្ហាញច្រើន និងអាចមើលដោយងាយ ។ ប៉ុន្តែទោះយ៉ាងណា អ្នកជួលមិនគួរព្រមព្រៀងជួល បង់ប្រាក់កក់ ឬថ្លៃឈ្នួលទាំងមិនបានឃើញពីទីតាំងពិតប្រាកដឡើយ ព្រោះក្រៅពីអ្នកអាចត្រូវបានគេកុហកឱ្យបង់ប្រាក់ទាំងគ្មានទីកន្លែងពិតប្រាកដ ឬបើមានពិតប្រាកដ ក៏អាចមិនដូចក្នុងរូបចុះផ្សាយ ឬបរិវេណជុំវិញអាចធ្វើឱ្យអ្នករស់នៅមិនសប្បាយចិត្ត ។ នេះជាហេតុផលដែលអ្នកជួលមិនគួរជួលមុននឹងឃើញផ្ទាល់ភ្នែកឡើយ ។
ប្រសិនបើអ្នកកំពុងជួល ឬស្វែងរកជួល កុំភ្លេចរឿងដែលគួរ និងមិនគួរធ្វើទាំងនេះដើម្បីឱ្យការជួលគ្មានបញ្ហាទៅថ្ងៃក្រោយ ៕
ចែករំលែកព័តមាននេះ