រាជធានីភ្នំពេញ ៖ វិនិយោគិនបុរីថ្មីនានានៅតែមានសុទិដ្ឋិនិយមពីទីផ្សារបុរីនៅកម្ពុជា ខណៈការលក់លំនៅឋានក្នុងឆ្នាំនេះមានការថមថយល្បឿន បើធៀបជាមួយនឹងរយៈពេលដូចគ្នាកាលពីឆ្នាំមុន ។
រាជធានីភ្នំពេញ ៖ វិនិយោគិនបុរីថ្មីនានានៅតែមានសុទិដ្ឋិនិយមពីទីផ្សារបុរីនៅកម្ពុជា ខណៈការលក់លំនៅឋានក្នុងឆ្នាំនេះមានការថមថយល្បឿន បើធៀបជាមួយនឹងរយៈពេលដូចគ្នាកាលពីឆ្នាំមុន ។
លោក លី សែនលាភ អគ្គនាយកក្រុមហ៊ុនFURI Real Estate ជាអ្នកបោះទុនវិនិយោគលើបុរី WOODLAND បានថ្លែងឲ្យដឹងតាមទូរស័ព្ទកាលពីថ្ងៃទី១ ធ្នូ ថា ៖ « បុរីនេះនឹងចាប់ផ្តើមសាងសង់នៅដើមខែធ្នូ ហើយគម្រោងនេះនឹងបញ្ចប់ក្នុងរយៈពេលពីរឆ្នាំខាងមុខ ។ អ្វីដែលយើងធ្វើ គឺធ្វើតាមជំហាន ទាល់តែគម្រោងមួយជោគជ័យ ទើបយើងធ្វើជំហានថ្មីទៀត ។ ទស្សនទាននៃការអភិវឌ្ឍថ្មីរបស់យើង គឺជាយុទ្ធសាស្ត្រដែលយើងសម្លឹងវែងឆ្ងាយ ព្រោះក្រុមរបស់យើងបើធ្វើអ្វីជាការចម្លងពីគេ គឺយើងមិនធ្វើនោះទេ » ។
លោកបន្តថា គម្រោងនេះមានលក្ខណៈពិសេស ដូចជា WOODLAND ជាប្រភេទលំនៅឋានប្រណីត និងមានចម្ងាយ៤គីឡូម៉ែត្រពីផ្សារទំនើប AEON ប៉ុណ្ណោះ ។ វាជាគម្រោងដែលមានដើមឈើព័ទ្ធជុំវិញ និងមានភាពបៃតង។ ការឌីសាញលំនៅឋានក្នុងគម្រោងនេះធ្វើឡើងដោយក្រុមហ៊ុន Ong &Ong ជាក្រុមហ៊ុនដ៏ល្បីនៅប្រទេសសិង្ហបុរី ហើយការឌីសាញលំនៅឋានមិនធ្វើតាមអ្វីដែលអ្នកវិនិយោគចង់បាននោះទេ តែយោងតាមការស្រាវជ្រាវពីតម្រូវការ និងចំណង់ចំណូលចិត្តរបស់អតិថិជន ។
លោកបន្ថែមថា ម្ចាស់បុរីទាំងអស់ក្រោយពេលលក់ហើយ មិនមានអ្នកណាផ្តោតអារម្មណ៍លើសេវាកម្មជូនអតិថិជន ឬម្ចាស់លំនៅឋាន និងបានគិតគូរពីបរិស្ថានស្អាត អនាម័យ សន្តិសុខ និងពោរពេញដោយសេវាកម្មនោះទេ ប៉ុន្តែដោយសារយើងបានធ្វើជាមួយក្រុមការងារជំនាញគ្រប់គ្រងអចលនទ្រព្យ ដើម្បីផ្តល់សេវាចាំបាច់នានាសម្រាប់អតិថិជន ហើយលោកជឿថា នៅស្រុកខ្មែរសព្វថ្ងៃ មិនទាន់មានបុរីណាធ្វើដូចយើងនៅឡើយទេ ។ លោក លី សែនលាភ មានប្រសាសន៍ថា ៖ « ការឌីសាញរបស់ស្ថាបត្យករ គឺត្រូវឌីសាញតាមរយៈការស្តាប់បុគ្គលិកផ្នែកលក់ ដែលពួកគេបានស្តាប់ និងសិក្សាពីតម្រូវការរបស់អតិថិជន ជាលទ្ធផល អតិថិជន៩៥%បានពេញចិត្តនូវរចនាបថផ្ទះក្នុងគម្រោងនេះ » ។
យោងតាមការសិក្សារបស់ក្រុមហ៊ុនVTRUST Appraisal បានបង្ហាញពីទីផ្សារបុរីក្នុងខណ្ឌឫស្សីកែវ ឲ្យដឹងថា បុរីនៅក្នុងខណ្ឌនេះមានចំនួន១២ពាន់ល្វែងនៅដំណាច់ឆ្នាំ២០១៧ខាងមុខ ដោយសារមានសំណង់ផ្ទះល្វែង និងបុរីធំៗចំនួន៨ ដែលអភិវឌ្ឍន៍លើ៥០ទីតាំង បាននិងកំពុងលក់ដាច់អស់ប្រមាណ៨០%ហើយ ហើយគម្រោងមួយចំនួននៅតែបន្តសាងសង់ ព្រោះក្នុងគម្រោងលំនៅឋានប្រមាណ១២ពាន់ខ្នង មានតែ៨.០០០ផ្ទះប៉ុណ្ណោះបានបញ្ចប់ការសាងសង់ ។
លោក ច្រឹក សុខនីម អគ្គនាយកក្រុមហ៊ុនCentury21 Mekong បានថ្លែងឲ្យដឹងផងដែរថា ទីផ្សារបុរីនៅតែមានសភាពវិជ្ជមាន និងមានតម្រូវការខ្ពស់ ដោយសារមានការគាំទ្រពីធនាគារនានាលើការផ្តល់ឥណទានលំនៅឋាន ប្រជាពលរដ្ឋខ្មែររៀបការថ្មីៗច្រើនប្រចាំឆ្នាំ ប្រជាពលរដ្ឋចូលមករស់នៅទីក្រុងកាន់តែច្រើន និងការរីកចម្រើនសេដ្ឋកិច្ចសង្គម ក្រោមការដឹកនាំរបស់រាជរដ្ឋាភិបាល ក៏ជំរុញឲ្យមានកំណើនតម្រូវការលំនៅឋានថ្មីៗផងដែរ ។
អគ្គលេខាធិការសមាគមអ្នកអភិវឌ្ឍន៍លំនៅឋានកម្ពុជា លោក ហ៊ុយ វណ្ណា ថ្លែងថា ក្នុងអំឡុងត្រីមាសទី៤ឆ្នាំនេះ មានបុរីមួយចំនួនបានចាប់ផ្តើមគម្រោងថ្មី ហើយក៏មានវិនិយោគិនថ្មីៗចាប់ផ្តើមគម្រោងរបស់ខ្លួនផងដែរ ប៉ុន្តែក៏មានអ្នកអភិវឌ្ឍន៍បុរីមួយចំនួនរង់ចាំមើលស្ថានភាពនោះដែរ ដោយសារការលក់បុរីមួយរយៈពេលចុងក្រោយនេះមានកំណើនយឺតជាងឆ្នាំមុន ។ ប៉ុន្តែប្រសិនជាយើងពិនិត្យមើលពីតម្រូវការ លក្ខណៈប្រជាសាស្ត្រ និងកំណើនសេដ្ឋកិច្ចរបស់កម្ពុជា យើងអាចសន្និដ្ឋានថា ទីផ្សារបុរីនៅកម្ពុជានៅតែមានភាពល្អប្រសើរសម្រាប់ពេលអនាគត ។
មានបុរីតិចតួចប៉ុណ្ណោះបានចាប់ផ្តើមគម្រោងថ្មីរបស់ខ្លួននៅឆ្នាំនេះ ដូចជា បុរីអ័រគីដេ បុរីវិមានភ្នំពេញ បុរីពិភពថ្មី និងបុរីមួយចំនួនទៀត ៕
ចែករំលែកព័តមាននេះ