មហាសេដ្ឋីឥណ្ឌា មិនរៀបចំពិធីមង្គលការកូនស្រីបែបខ្ជះខ្ជាយដូចមនុស្សមួយចំនួនបានប្រតិបត្ដិនាពេលកន្លងមកទេ ប៉ុន្ដែបានយកប្រាក់ទៅសង់ផ្ទះឱ្យជនក្រីក្រ ។ ទោះជាយ៉ាងណាក្ដីកូនស្រីចាត់ទុកថា អ្វីដែលឪពុកប្រតិបត្ដិ គឺជារង្វាន់នៃអាពាហ៍ពិពាហ៍ដ៏មានតម្លៃសម្រាប់ខ្លួននាង ។
លោកAjay Munot រស់នៅរដ្ឋMaharashtra ប្រទេសឥណ្ឌាជាអ្នកជំនួញមានប្រាក់មហាសាល ។ ពិធីមង្គលការកូនស្រីរបស់លោកគួរតែរៀបចំក្នុងលក្ខណៈអធិកអធម ប៉ុន្ដែបែរជាជ្រើសរើសលក្ខណៈសប្បុរសធម៌ដោយចំណាយប្រាក់សង់ផ្ទះជាង១០០ល្វែង ជូនដល់ជនក្រីក្រវិញ ។
ទឹកចិត្ដសប្បុរសធម៌របស់លោកAjay Munot ត្រូវទីសារព័ត៌ «អូឌីសុីទីសង់ត្រាល់» កាលពីពេល ថ្មីៗកន្លងមកផ្សាយថា លោកមានគម្រោងជួលសណ្ឋាគារដ៏ស្រស់ស្អាតដើម្បីទទួលភ្ញៀវក្នុងពេលរៀបការកូនស្រី ប៉ុន្ដែនៅពេលបានពិគ្រោះជាមួយអាជ្ញាធរក្នុងស្រុក ទើបដឹងថាមានពលរដ្ឋមានភាពក្រីក្រច្រើន ដូច្នេះគួរផ្ដល់ជំនួយដល់ពួកគេ ។ នៅពេលឮដូច្នេះលោកAjay សម្រេចចិត្ដប្ដូរផែនការ ដោយពិភាក្សាជាមួយក្រុមគ្រួសារ ដើម្បីជួយដល់អ្នកក្រីក្រ ។ ការពិភាក្សាសម្រេចថា គួរអភិវឌ្ឍតំបន់អនាធិបតេយ្យនៅក្នុងទីក្រុង ដោយសង់ផ្ទះចំនួន១០៨ល្វែង ឱ្យពលរដ្ឋក្រីក្រស្នាក់នៅ ។ ក្នុងថ្ងៃរៀបការមកដល់ ផ្ទះទាំងនោះសង់រួចរាល់ ហើយឱ្យពលរដ្ឋចូលស្នាក់នៅតែម្ដង ។
ផ្ទះមួយល្វែងមានទទឹង៣,៦ម៉ែត្រ និងបណ្ដោយ៦ម៉ែត្រ ទោះបីជាមានទំហំតូច ប៉ុន្ដែមានភ្លើង និងទឹកប្រើប្រាស់គ្រប់គ្រាន់ ។ ចំពោះអ្នកដែលមានសិទ្ធិចូលរស់នៅក្នុងផ្ទះនោះ គឺជាអ្នកក្រីក្រពិត និងគ្មានបញ្ហានៅក្នុងខ្លួន ដូចជាញៀនល្បែង ឬថ្នាំញៀន ។
នាងShreya កូនរបស់លោកAjay មានសេចក្ដីត្រេកអរយ៉ាងក្រៃលែង ចំពោះទឹកចិត្ដសប្បុរសធម៌របស់ឪពុកដោយបញ្ជាក់ថា «នេះជារង្វាន់នៃពិធីរៀបការដ៏មានតម្លៃបំផុតរបស់នាង» ។ ចំណែកលោកAjay ថ្លែងថា «ចង់ឱ្យក្រុមគ្រួសារមានទ្រព្យសម្បត្ដិស្ដុកស្ដមផ្សេងទៀតប្រតិបត្ដិដូចខ្ញុំ ជាជាងយកប្រាក់ទៅចាយវាយខ្ជះខ្ជាយលើការរៀបការកូន» ៕
ចែករំលែកព័តមាននេះ