រាជធានីភ្នំពេញ ៖ នៅទីស្ដីការក្រសួងអប់រំយុវជន និងកីឡា កាលពីថ្ងៃទី២២ ធ្នូ កន្លងមកនេះ មានរៀបចំពិធីសំណេះសំណាល និងបំពាក់មេដាយកិត្តិយសអាស៊ានដល់វីរកីឡាការិនីតេក្វាន់ដូ ស៊ន សៀវម៉ី ។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា មេដាយដែលបំពាក់ជូនដល់វីរកីឡាការិនីស៊ន សៀវម៉ី នៅក្នុងឱកាសនេះ គឺជាគំនិតផ្ដួចផ្ដើមឡើងពីបណ្ដាប្រទេសជាសមាជិកអាស៊ានទាំង១០ ដើម្បីលើកទឹកចិត្តដល់អត្តពលិកដែលដណ្ដើមបានមេដាយពីការប្រកួតកីឡាអូឡាំពិកនៅទីក្រុង RIO ប្រទេសប្រេស៊ីល នាពេលកន្លងទៅនេះ ក្នុងនោះមានទាំងកីឡាប៉ារ៉ាឡាំពិកផងដែរ ។ ប៉ុន្តែវីរកីឡាការិនី ស៊ន សៀវម៉ី បើទោះជាមិនដណ្ដើមបានមេដាយពីការប្រកួតកីឡាអូឡាំពិកក៏ពិតមែន តែកញ្ញាគឺជាអត្តពលិកតែម្នាក់គត់ដែលបានឆ្លងផុតពីវគ្គជម្រុះដណ្តើមសិទ្ធិទៅចូលរួមប្រកួតកីឡាអូឡាំពិកនៅប្រេស៊ីល ។ ហេតុដូច្នេះហើយ ទើបអគ្គលេខាធិការសមាគមអាស៊ានសម្រេចផ្ដល់មេដាយកិត្តិយស ដល់នាង ។
លោករដ្ឋមន្ត្រីបានកោតសរសើរយ៉ាងខ្លាំងដល់វីរកីឡាការិនី ស៊ន សៀវម៉ី ដែលមានសមត្ថភាពគ្រប់គ្រាន់ក្នុងការប្រកួតដណ្ដើមមេដាយមាសកម្រិតអាស៊ីលើប្រភេទកីឡាតេក្វាន់ដូ ។ លោកបានសង្កត់ធ្ងន់ថា សម្រាប់ប្រទេសគេ អ្នកដែលអាចប្រកួតដណ្ដើមមេដាយមាសនៅក្នុងព្រឹត្តិការណ៍ធំបែបនេះ ត្រូវចំណាយពេលហ្វឹកហាត់ចាប់ពី១០ឆ្នាំឡើងទៅ ។ ប៉ុន្តែស៊ន សៀវម៉ី ទើបតែហ្វឹកហាត់បាន៦ឆ្នាំប៉ុណ្ណោះក៏អាចដណ្ដើមមេដាយកម្រិតអាស៊ីបាន គឺជារឿងមិនធម្មតានោះទេ ។ ជាមួយគ្នានេះ លោកបានសំណូមពរដល់កីឡាការិនី ស៊ន សៀវម៉ី ត្រូវតែបន្តខិតខំប្រឹងប្រែងហ្វឹតហាត់ថែមទៀត ព្រោះថាឱកាសនៅមានច្រើនលើកលែងតែនាងចូលរោងការទើបអ្វីៗត្រូវបញ្ចប់ ។
ជាការឆ្លើយតប វីរកីឡាការិនីស៊ន សៀវម៉ី បានសន្យាថា នាងនឹងខិតខំហ្វឹកហាត់ជាបន្តទៀត ព្រោះថា សព្វថ្ងៃនាងនៅតែស្រឡាញ់វិស័យកីឡាតេក្វាន់ដូ ហើយនាងក៏បានបង្ហាញពីការសោកស្ដាយដែលមិនអាចដណ្តើមបានមេដាយជូនជាតិពេលទទួលបានឱកាសចូលរួមប្រកួតកីឡាអូឡាំពិកនៅប្រេស៊ីលនាពេលកន្លងមក ៕
ចែករំលែកព័តមាននេះ