ជំនួបតំណាងបក្សទាំង2ចុងឆ្នាំស្រពេចស្រពិល
រាជធានីភ្នំពេញ ៖ ជំនួបថ្នាក់ដឹកនាំគណបក្សសង្គ្រោះជាតិ និងគណបក្សប្រជាជនកម្ពុជា ដើម្បីពិភាក្សាគ្នារឿង
រាជធានីភ្នំពេញ ៖ ជំនួបថ្នាក់ដឹកនាំគណបក្សសង្គ្រោះជាតិ និងគណបក្សប្រជាជនកម្ពុជា ដើម្បីពិភាក្សាគ្នារឿងស្ថានការណ៍នយោបាយចុងក្រោយដូចអ្វីដែលធ្លាប់លើកឡើងថា នឹងជួបគ្នានៅចុងខែធ្នូនេះ កំពុងស្ថិតក្នុងភាពស្រពេចស្រពិលនៅឡើយ ខណៈអ្នកសារព័ត៌មានចង់ដឹងពីកាលបរិច្ឆេទច្បាស់លាស់ពីជំនួបមួយនេះ ។
ពាក់ព័ន្ធបញ្ហានេះលោក ឡេង ប៉េងឡុង អ្នកនាំពាក្យរដ្ឋសភា និងអគ្គលេខាធិការដ្ឋានរដ្ឋសភា បានប្រាប់អ្នកសារព័ត៌មានក្រោយកិច្ចប្រជុំគណៈកម្មាធិការអចិន្ត្រៃយ៍រដ្ឋសភានៅថ្ងៃទី២២ធ្នូ ថា រហូតមកដល់ថ្ងៃនេះ មិនទាន់មានលិខិតណាមួយសម្រាប់កំណត់ថ្ងៃជួបគ្នារវាងតំណាងក្រុមសភាភាគតិចដែលដឹកនាំដោយលោក កឹម សុខា ប្រធានស្តីទីគណបក្សសង្គ្រោះជាតិ និងមានតួនាទីនិយាយផ្ទាល់ជាមួយសម្តេចតេជោ ហ៊ុន សែន នាយករដ្ឋមន្ត្រី និងតំណាងក្រុមសភាភាគច្រើនដែលដឹកនាំដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនោះទេ ។
ការអះអាងរបស់លោក ឡេង ប៉េងឡុង នេះគឺបន្ទាប់ពីលោក សុខ ឥសាន អ្នកនាំពាក្យគណបក្សប្រជាជនកម្ពុជា ធ្លាប់បានឱ្យអ្នកសារព័ត៌មានសួរនាំទៅកាន់អ្នកនាំពាក្យរដ្ឋសភារឿងជំនួបរវាងថ្នាក់ដឹកនាំភាគច្រើន និងភាគតិចរដ្ឋសភានាពេលកន្លងមក ។ ជាងនេះការអះអាងនេះធ្វើឡើងបន្ទាប់ពីកិច្ចជំនួបពិភាក្សារវាងថ្នាក់ដឹកនាំសភាភាគច្រើន និងភាគតិចនាពេលកន្លងមកត្រូវបានលោក ឡេង ប៉េងឡុង ជាអ្នកផ្សព្វផ្សាយជូនសាធារណជន ពិសេសនោះបណ្តាញសារព័ត៌មានក្នុងស្រុក និងក្រៅស្រុកជារឿយៗ ។
ទាក់ទិននឹងជំនួបរវាងថ្នាក់ដឹកនាំបក្សកាន់អំណាច និងបក្សប្រឆាំងដែលកំពុងស្ថិតក្នុងសភាពស្រពេចស្រពិលនេះ កោះសន្តិភាពមិនអាចទាក់ទងអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឬទ្ធិ ដើម្បីសុំការបញ្ជាក់ពីបញ្ហានេះបានទេ ដោយសារទូរស័ព្ទទៅលោកគ្មានអ្នកទទួល ។ ប៉ុន្តែតាមគេហទំព័រមួយដែលបានស្រង់សំដីលោក យ៉ែម បុញ្ញឬទ្ធិផ្សាយថា លោក កឹម សុខា និងសម្តេចក្រឡាហោម ស ខេង អាចនឹងជួបពិភាក្សាគ្នា នៅសប្តាហ៍ក្រោយ ប៉ុន្តែលោកមិនបញ្ជាក់ថ្ងៃណាមួយពិតប្រាកដនោះឡើយ ។
ចំពោះជំនួបដែលអាចនឹងកើតឡើងនៅចុងឆ្នាំ២០១៦ ដូចអ្វីដែលគណបក្សទាំងពីរធ្លាប់លើកឡើងនោះ បានធ្វើឱ្យអ្នកសង្កេតការណ៍កំពុងតាមដានយ៉ាងយកចិត្តទុកដាក់បំផុត ប៉ុន្តែក្រុមអ្នកវិភាគខ្លះថា ជំនួបគ្នាណាមួយទំនងជាមិនអាចកើតឡើងច្រើនជាង ។ ព្រោះបើគិតពីកម្មវិធីបុណ្យជាតិមានច្រើនសម្រាប់ថ្នាក់ដឹកនាំបក្សកាន់អំណាច និងករណីមួយទៀត គឺឃើញសមាជិកសភាបក្សប្រឆាំងបានកោះហៅរដ្ឋមន្ត្រីបក្សកាន់អំណាច សួរនាំច្រើនរូបដូចជាលោក ស៊ុយ សែម រដ្ឋមន្ត្រីក្រសួងរ៉ែ និងថាមពលជាដើម ។ មិនតែប៉ុណ្ណោះនៅត្រៀមកោះហៅលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បី
សាកសួរបញ្ហាដ៏រសើបមួយចំនួននៅថ្ងៃខាងមុខទៀតផង ។ ទង្វើទាំងអស់នេះអាចធ្វើឲ្យស្ថានការណ៍នយោបាយឡើងកំដៅវិញបាន ប្រសិនកើតមានការប្រទាំងប្រទើស
គ្នាជាយថាហេតុណាមួយ ។
បញ្ហានេះអ្នកវិភាគលើកឡើងថា សមាជិកសភាបក្សប្រឆាំងគួរតែទុកករណីកោះហៅរដ្ឋមន្ត្រីបក្សកាន់អំណាចមួយរយៈពេលសិន ដោយរង់ចាំស្ថានការណ៍នយោបាយល្អឡើងវិញ ពោលគឺចាំដោះស្រាយករណីមន្ត្រីសិទ្ធិមនុស្សចេញពីពន្ធនាគារវិញ ។
សូមបញ្ជាក់ថា គម្រោងជួបគ្នាជាថ្មីរវាងក្រុមតំណាងរាស្ត្របក្សទាំងពីរក្នុងសភា បានធ្វើឡើងបន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានជួបពិភាក្សាការងារជាមួយ លោក កឹម សុខា ប្រធានស្តីទីគណបក្សសង្គ្រោះជាតិ និងប្រធានក្រុមតំណាងរាស្ត្រមតិភាគតិច ជំនួសលោក សម រង្ស៊ី នៅរដ្ឋសភាកាលពីថ្ងៃទី៧ ខែធ្នូ ឆ្នាំ២០១៦ ហើយលោក កឹម សុខា ក៏បានជួបសម្តេចក្រឡាហោម ស ខេង ប្រធានក្រុមតំណាងរាស្ត្រមតិភាគច្រើនដាច់ដោយឡែកពីគ្នាផងដែរ ។ ការជួបគ្នានាពេលនោះបានឈានទៅដល់ការដោះលែងលោក ស៊ាង ចែត ជាមេឃុំស្រក ស្រុកកំពង់សៀម ខេត្តកំពង់ចាម កូតាមកពីគណបក្សសម រង្ស៊ី ។
លោក ស៊ាង ចែត ត្រូវបានសមត្ថកិច្ចនៃអង្គភាពប្រឆាំងអំពើពុករលួយឃាត់ខ្លួន កាលពីព្រឹកថ្ងៃទី២៤ មេសា ឆ្នាំ២០១៦ កន្លងមកតាមចម្លើយដែលអះអាង នៅក្នុងលិខិតចំហរបស់កញ្ញា ខុម ចាន់តារ៉ាទី ហៅ ស្រីមុំ ពាក់ព័ន្ធនឹងលុយសំណូក៥០០ដុល្លារ ៕
ចែករំលែកព័តមាននេះ