សហរដ្ឋអាមេរិក ៖ លោកប្រធានាធិបតី Brack Obama ត្រូវបានគេគិតថា នឹងហាមឃាត់ជាអចិន្ត្រៃយ៍សម្រាប់ការជីកយកប្រេង ដើម្បីជំរុញឲ្យមានការការពារបរិស្ថាន មុនពេលលោកចាកចេញពីតំណែង ។
តាមប្រភពឲ្យដឹងទៀតថា លោក Obama មានគម្រោងប្រកាសពីដំណឹងនេះក្នុងថ្ងៃអង្គារ។ ប៉ុន្តែ White House បានបដិសេធមិនធ្វើអត្ថាធិប្បាយឡើយ ។
ការហាមឃាត់នេះជួយសម្រេចគោលបំណងផ្នែកបរិស្ថានរបស់លោក Obama ខណៈលោកប្រធានាធិបតីជាប់ឆ្នោត Donald Trump អះអាងថា នឹងបើកទូលាយលើតំបន់ប្រេង និងឧស្ម័នក្នុងប្រទេស ។ វានឹងក្លាយជាការបង្វែរគោលនយោបាយរបស់រដ្ឋាភិបាល ដែលបានពិចារណាក្នុងការបើកតំបន់ដ៏ធំនៅឆ្នេរអាត្លង់ទិកសម្រាប់ជីកយកប្រេង ប៉ុន្តែក៏បានដកថយពីគំនិតនេះវិញ ។
កាលពីដើមឆ្នាំ រដ្ឋាភិបាលក៏បានដកសិទ្ធិជីកយកប្រេងក្នុងតំបន់អាត្លង់ទិកផងដែរ ។ ប៉ុន្តែការហាមឃាត់នេះសម្រាប់តែ៥ឆ្នាំប៉ុណ្ណោះ ដែលនឹងចាប់ផ្តើមក្នុងឆ្នាំ២០១៧ ហើយក៏អាចត្រូវបានដកចេញយ៉ាងងាយស្រួលដោយលោក Trump ។
ទោះជាយ៉ាងណា រដ្ឋនៅតាមមាត់សមុទ្រអាត្លង់ទិកមានការឆ្លើយតបខុសៗគ្នាពីលទ្ធភាពជីកប្រេងនេះ ។ រដ្ឋ Florida លោក Rick Scott បានលើកឡើងពីភាពព្រួយបារម្ភលើផលប៉ះពាល់ដែលអាចកើតឡើងដល់ឆ្នេរសមុទ្រ និងវិស័យនេសាទ ហើយប្រជាជនក្នុងឆ្នេរខាងក្រៅរបស់ North Carolina ក៏បានប្រឆាំងនឹងការជីកប្រេងផងដែរ ។ ប៉ុន្តែមន្ត្រីក្នុង South Carolina និង Virginia បានបង្ហាញពីការគាំទ្រដល់ផលប្រយោជន៍សេដ្ឋកិច្ច ដែលបានពីការងារផ្នែកប្រេងថ្មីៗ ។
គួរបញ្ជាក់ថា ក្រុមអ្នកការពារបរិស្ថាន ក៏បានស្នើឲ្យមានការហាមឃាត់ជាអចិន្ត្រៃយ៍ផងដែរ តាំងពីមុនការបោះឆ្នោតជ្រើសរើសប្រធានាធិបតីទៅទៀត ប៉ុន្តែជ័យជម្នះរបស់លោក Trump បានធ្វើឲ្យពួកគេ និងអាជីវកម្មដែលពឹងផ្អែកលើផ្នែកទេសចរណ៍ និងនេសាទកាន់តែប្រញាប់ឡើង ។ លោក Trump និយាយថា លោកមានបំណងប្រើប្រាស់រាល់តំបន់ប្រេងដែលនៅសល់សម្រាប់ផ្គត់ផ្គង់ថាមពល ហើយពេលនេះគឺអាចបើកផ្លូវឲ្យមានការជីកប្រេងហើយ ។
ក្រុមឧស្សាហកម្មគិតថា ការហាមឃាត់នេះនឹងមិនអាចរក្សាបានទេ ហើយលោក Trump អាចនឹងដកចេញនូវការប្រកាសថ្មីមួយទៀត ដើម្បីអនុញ្ញាតឲ្យមានការជីកប្រេង និងឧស្ម័នក្នុងតំបន់អាត្លង់ទិក បន្ទាប់ពីលោកឡើងកាន់តំណែង ។
ប៉ុន្តែលោក Niel Lawrence ឧត្តមរដ្ឋអាជ្ញានៃក្រុមប្រឹក្សាការពារធនធានធម្មជាតិ និយាយថា លទ្ធផលនៃការប្រកាសរបស់លោក Trump មិនទាន់ច្បាស់លាស់នៅឡើយទេ។
ប្រសិនបើលោក Trump ពិតជាចេញបញ្ជាមួយផ្ទុយនឹងការប្រកាសរបស់លោក Obama មែននោះ ក្រុមអ្នកការពារបរិស្ថាន និងអ្នកដទៃទៀតមានសិទ្ធិប្រឆាំងនឹងការសម្រេចចិត្តរបស់លោកក្នុងតុលាការ ៕
ចែករំលែកព័តមាននេះ