ប្រទេសថៃ ៖ កំណើនសេដ្ឋកិច្ចថៃនៅឆ្នាំក្រោយនឹងមានភាគរយខ្ពស់ជាងពាក់កណ្តាលនៃការព្យាករបច្ចុប្បន្ន៣,៥%-៤% ប្រសិនបើគម្រោងរដ្ឋរបស់ប្រជាជន (Pracha Rath) បម្រុងទុកថវិកាបន្ថែម៨៣ប៊ីលានបាតដើម្បីជំរុញសេដ្ឋកិច្ចក្នុងមូលដ្ឋាន ។ នេះបើតាមសភាពាណិជ្ជកម្មថៃ (TCC) ។
លោក Vichai Assarasakorn ប្រធាន TCC ថ្លែងថា ៖ « ខណៈលោកជាសមាជិកនៃគណៈកម្មាធិការដឹកនាំគម្រោង Pracha Rath សភានេះនឹងស្នើឱ្យមានគម្រោងច្រើនជាង១.០០០ ក្នុងតម្លៃប្រមាណ៨៣ប៊ីលានបាតសម្រាប់អនុវត្តនៅឆ្នាំក្រោយ ។ ថវិកានេះនឹងត្រូវចំណាយដើម្បីជួយអភិវឌ្ឍន៍វិស័យគន្លឹះចំនួន៤ » ។
ថវិកាសរុបចំនួន៣២ប៊ីលានបាតនឹងត្រៀមទុកសម្រាប់គម្រោង៤០០ក្នុងវិស័យទេសចរណ៍ដូចជា ទេសចរណ៍ច្នៃប្រឌិត និងការដំឡើងកាមេរ៉ាត្រួតពិនិត្យគោលដៅទេសចរណ៍។ ចំណែកវិស័យកសិកម្ម មានថវិកាចំនួន២៥ប៊ីលានបាតសម្រាប់ដំណើរការគម្រោងជាង៤០០ដូចជា ការបង្កើនតម្លៃដំណាំ បង្កើតការប្រកួតប្រជែងទីផ្សារ កសាងនិងអភិវឌ្ឍន៍អាងស្តុកទឹកប្រព័ន្ធធារាសាស្ត្រ ។
ថវិកា១៨,២ប៊ីលានបាតនឹងត្រូវចំណាយលើគម្រោងចំនួន២៧ ដើម្បីអភិវឌ្ឍន៍ប្រព័ន្ធដឹកជញ្ជូន ។ រីឯ៧,៩ប៊ីលានបាតទៀតសម្រាប់គម្រោង១១៦ លើការអភិវឌ្ឍហេដ្ឋារចនាសម្ព័ន្ធ ការសម្រួលពាណិជ្ជកម្ម និងការវិនិយោគ ។
លោក Vichai បន្តថា ថវិកាបន្ថែមទៀតនឹងត្រូវត្រៀមទុកសម្រាប់ខេត្តចំនួន១៨ ដោយខេត្តនីមួយៗទទួលបាន៥ប៊ីលានបាតដើម្បីជំរុញសេដ្ឋកិច្ចក្នុងតំបន់ និងអភិវឌ្ឍតំបន់ឆ្ងាយពីក្រុងបាងកក ។ លោកថ្លែងថា ៖ « រដ្ឋាភិបាលបានដើរលើផ្លូវដ៏ត្រឹមត្រូវ ដោយបានលើកកម្ពស់សេដ្ឋកិច្ចក្នុងស្រុក ខណៈសេដ្ឋកិច្ចសកលកំពុងប្រឈមនឹងកំណើនមិនច្បាស់លាស់ » ។
TCC រំពឹងថា កំណើន GDP ក្នុងឆ្នាំនេះនឹងកើនឡើងពី៣,៣%-៣,៥% ។ ចំណែកឆ្នាំក្រោយ គេមើលឃើញពីការព្រួយបារម្ភជាច្រើនដូចជា គោលនយោបាយគ្រប់គ្រងសហរដ្ឋអាមេរិករបស់លោក Donald Trump, ផែនការបង្កើនការប្រាក់របស់ធនាគារកណ្ដាលអាមេរិក និងភាពមិនប្រាកដប្រជាផ្នែកនយោបាយក្នុងប្រទេស ។
លោក Dej Churdsuwanrak អគ្គលេខាធិការ TCC ឱ្យដឹងថា សមាជិកសភាជាង៨០% បានអំពាវនាវឱ្យរដ្ឋាភិបាលពន្យារពេល៦ខែ ក្នុងការលើកលែងពន្ធអាជីវកម្មសម្រាប់ការពង្រីកសហគ្រាស ឬជួសជុលរោងចក្របន្ទាប់ពីវិធានការនឹងបញ្ចប់នៅឆ្នាំនេះ ៕
ចែករំលែកព័តមាននេះ