ស្រាវជ្រាវ » បច្ចេកវិទ្យា

ក្រុមហ៊ុន Nokia ប្រកាស​ប្តឹង​ក្រុមហ៊ុន Apple

ដោយ ៖ សហការី   

ថ្ងៃសុក្រ ទី២៣ ខែធ្នូ ឆ្នាំ២០១៦ ម៉ោង ០៩:១៥   (23-12-2016 09:15)

ក្រុមហ៊ុន Nokia បាន​ចេញ​សេចក្តី​ប្រកាស​ប្តឹង​ក្រុមហ៊ុន Apple នៅ​ក្នុង​ប្រទេស​អា​ល្លឺ​ម៉​ង់ និង​សហរដ្ឋអាមេរិក​ទៅ​តុលាការ​ចោទ​ពី​បទ​រំលោភ​ប័ណ្ណ​ប៉ាតង់ (Patent infringement) ដោយ​បាន​អះអាង​ថា ក្រុមហ៊ុន Apple បាន​ប្រើប្រាស់​បច្ចេកវិទ្យា​របស់​ក្រុមហ៊ុន Nokia នៅលើ​ផលិតផល​ជា​ច្រើន​របស់​ខ្លួន​ដោយ​មិន​បាន​បង់ប្រាក់ ។

ក្រុមហ៊ុន​ហ្វាំ​ង​ឡង់ Nokia ដែល​ធ្លាប់​ជា​ក្រុមហ៊ុន​ឈានមុខ​នៅ​ទីផ្សារ​ទូរស័ព្ទ​បាន​និយាយ​ថា ក្រុមហ៊ុន​ទាំង​ពីរ​បាន​ចុះហត្ថលេខា​លើ​កិច្ចព្រមព្រៀង​ផ្តល់​អាជ្ញា​ប័ន​នៅ​ឆ្នាំ​២០១១ ហើយ​បន្ទាប់​មក​ក្រុមហ៊ុន Apple បាន​បដិសេធ​ការ​ផ្តល់​ជា​ពិសេស​ដែល​ធ្វើ​ឡើង​ដោយ​ក្រុមហ៊ុន Nokia ក្នុង​ការ​ផ្តល់​អាជ្ញា​ប័ន ផ្សេង​ៗ​ទៀត​ក្នុង​ការ​ប្រើប្រាស់​នូវ​បច្ចេកវិទ្យា​ថ្មី​របស់​ក្រុមហ៊ុន Nokia ដែល​ត្រូវ​បាន​យក​មក​ប្រើប្រាស់​ដោយ​ក្រុមហ៊ុន Apple នៅ​លើ​ផលិត Apple ជា​ច្រើន ។

លោក Ilkka Rahnasto ប្រធាន​ពាណិជ្ជកម្ម​ប៉ាតង់​ក្រុមហ៊ុន Nokia បាន​ចេញ​សេចក្តី​ប្រកាស​ព័ត៌មាន​ថា បន្ទាប់​ពី​មានការ​ចរចា​អស់​ជា​ច្រើន​ឆ្នាំ​ដើម្បី​អាច​ឈាន​ដល់​ការ​សម្រេច​កិច្ច​ព្រម ព្រៀង​ទៅ​លើ​ការ​ប្រើប្រាស់​ប័ណ្ណ​ប៉ាតង់ ផ្សេង​ៗ​ដែល​ក្រុមហ៊ុន Apple បាន​យក​មក​ប្រើប្រាស់ ។

ពាក្យបណ្តឹង​របស់​ក្រុមហ៊ុន Nokia ដែល​បាន​ប្តឹង​នោះ​ទាក់​ទង់​នឹង​ប័ណ្ណ​ប៉ាតង់​ចំនួន​៣២ ដែល​ទាក់​ទង់​នឹង​ការ​បង្ហាញ​នៅ​លើ​អេ​ក្រង់ (Display), ចំណុច​ប្រទាក់​អ្នក​ប្រើប្រាស់​, Software, Chipset, លេខ​កូដ​វី​ដេ​អូ​, និង​អង់​តែ​ន​ជាដើម ។ ក្រុមហ៊ុន Nokia បន្ត​ថា ខ្លួន​កំពុង​បន្ត​រៀបចំ​ឯកសារ​ផ្លូវច្បាប់ ផ្សេង​ៗ​ទៀត​ដើម្បី​ប្តឹង​នៅ​ទីតាំង ឯទៀត​ៗ ។

Nokia ជា​ក្រុមហ៊ុន​ល្បីល្បាញ​ឈានមុខ​ក្នុង​ទីផ្សារ​ទូរស័ព្ទ​នៅ​អំឡុង​ពី​ឆ្នាំ​១៩៩៨​ដល់​ឆ្នាំ​២០១១ ។ ក្រុមហ៊ុន​នេះ​ក៏​ត្រូវ​ក្រុមហ៊ុន Microsoft ទិញ​យក ។ នៅ​ក្នុង​កិច្ចព្រមព្រៀង​ផ្តល់​អាជ្ញា​ប័ន​ឆ្នាំ​២០១១​នោះ​ក៏​មាន​រឿងរ៉ាវ​ចម្រូងចម្រាស​ច្រើន​ណាស់​ដែរ ដោយសារ​ក្រុមហ៊ុន​សាំ​ស៊ុ​ង​បាន​ប្តឹង​ថា បាន​លួច​បច្ចេកវិទ្យា​របស់​គេ​ដែរ ។ នៅ​ពេល​នោះ​ក្រុមហ៊ុន Apple បាន​លុប​កិច្ចព្រមព្រៀង​ចំនួន​៤៦ ផ្សេង​ៗ​គ្នា​ដោយ​អះអាង​ថា ក្រុមហ៊ុន Nokia បាន​រំលោភ​លើ​កម្មសិទ្ធិបញ្ញា ៕