រាជធានីភ្នំពេញ ៖ ការចុះផ្សាយព័ត៌មានរបស់កោះសន្តិភាពស្តីពីគ្រួសារអតីតយុទ្ធជនពិការ ដែលស្លាប់រង់ចាំប្រាក់គោលនយោបាយ ហើយបានទទួលការធានារបស់មន្ត្រីមន្ទីរសង្គមកិច្ចថា នឹងដោះស្រាយនៅសប្តាហ៍ក្រោយត្រូវបានសម្តេចតេជោនាយករដ្ឋមន្ត្រីបានដាក់បទបញ្ជាជាបន្ទាន់មួយនារសៀលថ្ងៃទី២៥ មីនា ឱ្យលោកមុត ខៀវ រដ្ឋលេខាធិការក្រសួងសង្គមកិច្ចត្រួតពិនិត្យពីបញ្ហានេះ ។
លោករដ្ឋលេខាធិការមានប្រសាសន៍ថា បន្ទាប់ពីមានបទបញ្ជាដ៏ខ្ពង់ខ្ពស់ពីសម្តេចតេជោហ៊ុន សែន និងឆ្លងតាមការសិក្សាបន្ទាន់មួយលោកក៏បានសុំគោលការណ៍ពីលោករដ្ឋមន្ត្រីអ៊ិត សំហេង ហើយលោកក៏បានឱ្យចាត់វិធានការជាបន្ទាន់មួយក្នុងការជួយដល់គ្រួសារយោធិននេះ។ លោកមុត ខៀវ មានប្រសាសន៍ថា សម្តេចតេជោលោកយកចិត្តទុកដាក់ខ្ពស់ណាស់ចំពោះយុទ្ធជន ឬអតីតយុទ្ធជន ឬក្រុមគ្រួសាររបស់ពួកគេ និងបន្ទាប់ពីបានដឹងថា ពួកគេកំពុង ត្រូវការឱ្យជួយនោះសម្តេចក៏បានដាក់បញ្ជា ភ្លាមៗ ។
លោកមុត ខៀវ មានប្រសាសន៍ថា បន្ទាប់ពីសុំគោលការណ៍ឯកភាពពីលោករដ្ឋមន្ត្រីរួចមកនៅថ្ងៃទី២៦ មីនា នេះ មន្ត្រីក្រសួងរួមជាមួយមន្ត្រីមន្ទីរសង្គមកិច្ចនឹងនាំប្រាក់ឧបត្ថម្ភ ក្នុងនោះប្រាក់មរណៈសង្គ្រោះចំនួន៤លានរៀល និងប្រាក់ពលីចំនួន២.៨៦៥.១២០រៀល ទៅផ្តល់ដល់ក្រុមគ្រួសារយោធិនសរុបទាំងអស់ថវិកាដែលត្រូវប្រគល់មាន៦.៨៦៥.១២០រៀល ។ ចំពោះព័ត៌មានបន្ថែមនឹងផ្សាយជូនបន្តទៀត ៕
ចែករំលែកព័តមាននេះ