រាជធានីភ្នំពេញ ៖ នៅរសៀលថ្ងៃសៅរ៍ ទី២៤ ធ្នូ ខានស្អែកនេះ ប្រដាល់អន្តរជាតិរបស់ក្រុមហ៊ុនខារ៉ាបាវរដូវកាលទី២នឹងចាប់ផ្ដើមប្រកួតសន្សំពិន្ទុឈានទៅដណ្ដើមខ្សែក្រវាត់រវាងកីឡាករកម្ពុជា និងបរទេសក្នុងពេលបន្តបន្ទាប់ ។
ព្រឹត្តិការណ៍នេះត្រូវបានមហាជនភាគច្រើនផ្ដោតការចាប់អារម្មណ៍ ខណៈដែលសប្ដាហ៍នេះសមាសភាពកីឡាករកម្ពុជាសុទ្ធតែជាជើងខ្លាំង និងល្បីឈ្មោះតែម្ដងគឺកីឡាករ អ៊ុំ ចំរើន និង ឡុង សុវណ្ណឌឿន ដោយម្នាក់ប្រកួតជាមួយកីឡាករឡាវ និងម្នាក់ទៀតប្រកួតជាមួយកីឡាករថៃ ។
ព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់របស់ក្រុមហ៊ុនភេសជ្ជៈខារ៉ាបាវវគ្គ២នេះ មានការរំពឹងខ្ពស់យ៉ាងខ្លាំងថា នឹងមានការគាំទ្រដាច់ឆ្ងាយជាងការប្រកួតអន្តរជាតិកាលពីវគ្គ១ ដោយសារតែសមាសភាពកីឡាករសុទ្ធតែល្អៗ និងល្បីឈ្មោះ ។ កីឡាករកម្ពុជា២រូបគឺ អ៊ុំ ចំរើន និង ឡុង សុវណ្ណឌឿន គឺជាគូប្រកួតស៊ីសាច់ហុតឈាមជាមួយកីឡាករឡាវ និងថៃនៅរសៀលថ្ងៃសៅរ៍នោះ ដែលការប្រកួតរបស់ពួកគេសុទ្ធតែមិនចង់ចាញ់ ។ អ្នករៀបចំការប្រកួតបានអះអាងថា កីឡាករទាំង៤ត្រូវបានចាប់ឆ្នោត ហើយត្រូវប៉ះគ្នាក្នុងសប្ដាហ៍ទី២នេះសម្រាប់ព្រឹត្តិការណ៍អន្តរជាតិខារ៉ាបាវដោយអ្នកឈ្នះនឹងទទួលបាន៣ពិន្ទុ ហើយអ្នកចាញ់ទទួលបាន១ពិន្ទុដូចគ្នានឹងការប្រកួតសន្សំពិន្ទុមួយចំនួននោះដែរ ។ កីឡាករកម្ពុជាត្រូវបានអះអាងថា សម្ងំហ្វឹកហាត់មិនខុសគ្នានោះទេ ដោយសារតែចង់គ្រងតំណែងជាម្ចាស់ខ្សែក្រវាត់អន្តរជាតិរបស់ខារ៉ាបាវ និងទទួលបានប្រាក់លានអមដោយកិត្តិយសមុខមាត់នោះផង ។
យ៉ាងណាមិញ គេមិនទាន់ដឹងថា កីឡាករណាមួយនឹងមានលទ្ធភាពយកបាន៣ពិន្ទុនៅសប្ដាហ៍ទី២នេះនោះទេ ដោយសារតែភាគីទាំងសងខាងសុទ្ធតែបានត្រៀមទុកពីចម្ងាយពាក់ព័ន្ធនឹងការហ្វឹកហាត់ដូចគ្នា ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករជើងខ្លាំងកម្ពុជា២រូបខាងលើ លោកថា កីឡាករ អ៊ុំ ចំរើន មកពីក្លិបតាឡីដំរីមានឫទ្ធិ ប៉ះប្រកួតជាមួយកីឡាករឡាវឈ្មោះ ថា អ៊ូឡាន ក្នុងនាមជាគូបើកឆាកអន្តរជាតិដណ្ដើមពិន្ទុនៅក្នុងព្រឹត្តិការណ៍នេះ ដោយជំនួបរវាងពួកគេគឺបានកើតឡើងដោយសារតែការចាប់ឆ្នោត និងការរៀបចំរូបមន្តប្រកួតដែលចាត់ចែងឡើងដោយក្រុមគណៈកម្មការបច្ចេកទេស ។ លោកថា កីឡាករ អ៊ុំ ចំរើន ចាត់ទុកថា ជាជើងខ្លាំងម្នាក់នៅលើសង្វៀនប្រដាល់អន្តរជាតិនាពេលកន្លងមក ទើបការប៉ះប្រកួតក្នុងសប្ដាហ៍ទី២នៅលើសង្វៀនខារ៉ាបាវលោកថា កីឡាកររូបនេះនឹងធ្វើឱ្យអ្នកគាំទ្រអស់ចិត្ត ហើយជាប់ចិត្តនឹងការប្រកួតដែលប្រកាសធ្វើឡើង ។ លោកថា ព្រឹត្តិការណ៍ដែលបានទទួលជោគជ័យក្រោយការបញ្ចប់ការប្រកួតដណ្ដើមខ្សែក្រវាត់នៅរដូវកាលទី១នេះ កាន់តែមានសន្ទុះចាប់អារម្មណ៍ទ្វេដងទើបក្រុមការងាររៀបចំការប្រកួតសម្រេចដាក់កីឡាករកម្ពុជា៤រូប និងថៃ៤រូបសុទ្ធតែខ្លាំង និងមានសមត្ថភាពតែម្ដងឱ្យបើកការប្រកួតដណ្ដើមខ្សែក្រវាត់គ្នាក្នុងរដូវកាលទី២ ។
លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជា អ៊ុំ ចំរើន បើទោះជាគេទើបនឹងរៀបការភរិយាដែលមានអ្នកខ្លះថា អាចប៉ះពាល់ដល់កម្លាំងប្រកួត ។ យ៉ាងណាមិញ លោកមិនហ៊ានប៉ាន់ស្មានថា ការប្រកួតរបស់គេនៅល្ងាចថ្ងៃសៅរ៍នេះ អ្នកណានឹងទទួលបាន៣ពិន្ទុនោះទេ ដោយសារតែកីឡាករឡាវក៏ជាជើងខ្លាំង ហើយកីឡាករកម្ពុជាក៏ខ្លាំង ។ លោករំពឹងយ៉ាងខ្លាំងថា ការប្រកួតបើកឆាករបស់គូអន្តរជាតិទី១រវាង អ៊ុំ ចំរើន និងកីឡាករឡាវនឹងទាក់ទាញចំណាប់អារម្មណ៍ខ្លាំងក្លា ក្នុងពេលដែលម្នាក់ៗក៏ត្រូវលោកជឿថា នឹងប្រឹងប្រកួតអស់ពីសមត្ថភាពរៀងខ្លួន ។ កីឡាករឡាវ ថា អ៊ូឡាន លោកថា ធ្លាប់ប្រកួត៦៣លើក ឈ្នះ៥៣លើក និងចាញ់១០លើក ក្នុងពេលដែលកីឡាករកម្ពុជាឆ្លងកាត់ការប្រកួតដល់១០០លើក ឈ្នះ៧០លើក និងចាញ់៣០លើកនៅលើសង្វៀន ។
សម្រាប់កីឡាករ ឡុង សុវណ្ណឌឿន លោកញាណ សុធី បញ្ជាក់ថា គេក៏ជាគូដណ្ដើមខ្សែក្រវាត់នៅក្នុងព្រឹត្តិការណ៍អន្តរជាតិខារ៉ាបាវមួយនេះផងដែរ ដោយត្រូវប្រកួតជាមួយកីឡាករថៃឈ្មោះ សាំង យ៊ុត ។ លោកថា ការប្រកួតរបស់គូនេះនៅមិនទាន់ដឹងថា អ្នកណារកបាន៣ពិន្ទុនាំមុខនោះទេក្នុងពេលដែលកីឡាករកម្ពុជាក៏ល្អ ហើយកីឡាករថៃក៏មានកេរ្តិ៍ឈ្មោះមិនធម្មតា ។
បើទោះជាប្រវត្តិ និងបទពិសោធន៍ថៃរាងស្ទើរជាង ប៉ុន្តែបើនិយាយពីកម្លាំងស៊ុហ្វ និងបច្ចេកទេសគឺគេល្អនៅលើសង្វៀន ។ កីឡាករថៃលោកថា ធ្លាប់ប្រកួតបាន៧៣លើក ឈ្នះ៦០លើក ចាញ់១២លើក និងស្មើ១លើក ក្នុងពេលកីឡាករកម្ពុជាធ្លាប់ប្រកួតបាន៩៥លើក ឈ្នះ៨១លើក ចាញ់៩លើក និងស្មើ៤លើក ៕
ចែករំលែកព័តមាននេះ