រាជធានីភ្នំពេញ ៖ សពទារកដែលទើបនឹងកើតត្រូវបានគេច្រកក្នុងថង់យកទៅប្លុងចោលនៅមាត់ស្រះទឹកមួយកន្លែង ហើយត្រូវបានអ្នកដើររើសអេតចាយប្រទះឃើញក៏ប្រាប់អ្នកជិតខាងនាំគ្នាទៅចោមរោមមើលយ៉ាងច្រើនកុះករ មិនតែប៉ុណ្ណោះអ្នកដែលទៅមើលនោះបាននាំគ្នាដាក់ប្រាក់ខ្លះ៥០០រៀល ឬ១.០០០រៀល នៅលើខ្លួនសពទារក និងឧទ្ទិសទៅតាមជំនឿរៀងៗខ្លួនទៀតផង ។
ហេតុការណ៍នោះបានកើតឡើងកាលពីវេលាម៉ោង៧ព្រឹក ថ្ងៃទី២៧ មីនា ឆ្នាំ២០១១ នៅចំណុចមាត់ស្រះទឹកមុខរោងចក្រអគ្គិសនីភូមិដំណាក់ធំ សង្កាត់ស្ទឹងមានជ័យ ជាប់ព្រំប្រទល់ភូមិទួលពង្រ សង្កាត់ចោមចៅ ខណ្ឌដង្កោ រាជធានីភ្នំពេញ។ សពទារកនោះពុំត្រូវបានគេស្គាល់ឪពុកម្តាយឡើយមានទម្ងន់ប្រមាណជាង២គីឡូក្រាមប៉ុណ្ណោះ ត្រូវគេច្រកក្នុងថង់យួរពណ៌ខ្មៅជាមួយនឹងសុកផង យកទៅបោះចោលនៅត្រង់ចំណុចខាងលើ ហើយពុំមាននរណាម្នាក់បានដឹងថា អ្នកដែលយកសពទារកនោះទៅបោះចោលជានរណាឡើយ ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលមានការភ្ញាក់ផ្អើលខាងលើមានបុរសម្នាក់ដើររើសអេតចាយនៅត្រង់ចំណុចនោះ ហើយបានប្រទះឃើញថង់ពណ៌ខ្មៅ១ចងមាត់ជិត។ ពេលនោះបុរសអ្នករើសអេតចាយបានស្រាយមាត់ថង់មើល ស្រាប់តែឃើញរបស់គួរឱ្យភ្ញាក់ផ្អើលទៅវិញ គឺសុក និងទារកម្នាក់ដែលស្លាប់បាត់ទៅហើយ ។ ប្រភពដដែលបានបន្តទៀតថា ខណៈនោះអ្នកដើររើសអេតចាយបានរត់ទៅប្រាប់អ្នកជិតខាងឱ្យទៅមើលហើយបង្កឱ្យមានការភ្ញាក់ផ្អើលយ៉ាងខ្លាំង ដោយមានមនុស្សទៅចោមរោមមើលយ៉ាងកកកុញ មិនតែប៉ុណ្ណោះមានអ្នកខ្លះបានដាក់លុយ៥០០រៀល ខ្លះ១.០០០រៀល លើខ្លួនសាកសពទារក ជាការចូលបុណ្យមួយផងដែរ ។
ទាក់ទិនទៅនឹងហេតុការណ៍នោះគេពុំដឹងថា ឪពុកម្តាយទារកនោះជានរណានោះទេ ប៉ុន្តែមានការសន្និដ្ឋានខុសៗគ្នាដោយអ្នកខ្លះសង្ស័យថា ឪពុកម្តាយទារកនោះស្រឡាញ់គ្នាដោយលួចលាក់ ហើយទំនងខាងប្រុសបែកចិត្តទើបពេលដែលទារកនោះកើតមកស្ត្រីជាម្តាយមិនហ៊ានទុកខ្លាចខ្មាសគេក៏សម្លាប់ច្រកថង់យកទៅបោះចោលតែម្តង ។ ជាពិសេសស្ត្រីជាម្តាយរបស់ទារកនោះជាមនុស្សមិនស្តាប់ការទូន្មានរបស់ឪពុកម្តាយដើរលេងជាមួយសង្សាររហូតមានផ្ទៃពោះមិនហ៊ានទុកកូន ទើបពេលកើតមកសម្លាប់ចោលបែបនេះទៅ។
ចំណែកឯប្រភពខ្លះទៀតសន្និដ្ឋានថា ទារកនេះមិនមែនត្រូវគេរំលូតចោលនោះទេ គឺកើតមកត្រឹមត្រូវ ព្រោះមានរូបរាងពេញលក្ខណៈជាមនុស្សទាំងអស់មិនមានខ្វះចន្លោះត្រង់ណានោះទេ ហើយបើឪពុកម្តាយជាមនុស្សត្រឹមត្រូវមែន ពេលដែលកូនកើតមកទោះបីស្លាប់ ឬនៅរស់តែមានលក្ខណៈមិនគ្រប់គ្រាន់បែបណាក្តី ក៏គេមិនដាច់ចិត្តយកទៅបោះចោលបែបនេះដែរ ។
ទោះបីជាបែបណាពុំមានការអះអាងពីសមត្ថកិច្ចប៉ូលិសប៉ុស្តិ៍ស្ទឹងមានជ័យ ឬប៉ូលិសប៉ុស្តិ៍ចោមចៅថា តើទារកនោះត្រូវគេសម្លាប់យកទៅប្លុងចោល ឬក៏ស្លាប់ដោយខ្លួនឯងឡើយ។ ម្យ៉ាងទៀតក្រោយពេលមានហេតុការណ៍បែបនេះកើតឡើង ប៉ូលិសប៉ុស្តិ៍ទាំងពីរចែកភូមិសាស្ត្រគ្នាស្ទើរមិនចង់ដាច់ ដោយប៉ុស្តិ៍ចោមចៅថា ចំណុចកើតហេតុស្ថិតក្នុងសង្កាត់ស្ទឹងមានជ័យ ឯប៉ូលិសប៉ុស្តិ៍ស្ទឹងមានជ័យថា ស្ថិតក្នុងសង្កាត់ចោមចៅ។ ដោយមិនអាចទុកចោលយូរបានប្រជាពលរដ្ឋបាននាំគ្នាជីករណ្តៅកប់សពទារកនោះនៅកន្លែងកើតហេតុតែម្តង៕
ចែករំលែកព័តមាននេះ