រាជធានីភ្នំពេញ ៖ សភាពាណិជ្ជកម្មអន្តរជាតិនៃកម្ពុជា គ្រោងនឹងរៀបចំវេទិកាធុរកិច្ចមួយក្នុងប្រទេសកម្ពុជា នៅអំឡុងខែកុម្ភៈ ឆ្នាំ២០១៧ខាងមុខ ដើម្បីកៀងគរវិនិយោគិន ធុរជនពីបណ្ដាប្រទេសនានាក្នុងតំបន់អាស៊ាន
រាជធានីភ្នំពេញ ៖ សភាពាណិជ្ជកម្មអន្តរជាតិនៃកម្ពុជា គ្រោងនឹងរៀបចំវេទិកាធុរកិច្ចមួយក្នុងប្រទេសកម្ពុជា នៅអំឡុងខែកុម្ភៈ ឆ្នាំ២០១៧ខាងមុខ ដើម្បីកៀងគរវិនិយោគិន ធុរជនពីបណ្ដាប្រទេសនានាក្នុងតំបន់អាស៊ាន និងក្រៅតំបន់អាស៊ានមកជួបជុំពិភាក្សាស្វែងរកដៃគូពាណិជ្ជកម្ម និងបោះទុនវិនិយោគនៅកម្ពុជា ។
ថ្លែងក្នុងសន្និសីទសារព័ត៌មានកាលពីព្រឹកថ្ងៃទី១៩ ធ្នូ នៅសណ្ឋាគារអាំងទែកុងទីណង់តាល់ លោក Bretton G. Sciaroni នាយកជាន់ខ្ពស់នៃសភាពាណិជ្ជកម្មអន្តរជាតិ ឱ្យដឹងថា គោលបំណងនៃការរៀបចំឲ្យមានវេទិកាធុរកិច្ចនៅដើមឆ្នាំក្រោយនេះ គឺដើម្បីទាក់ទាញវិនិយោគិនពីបណ្ដាប្រទេសនានាក្នុងនិងក្រៅតំបន់ចូលរួមជជែក និងពិនិត្យមើលស្ថានភាពជាក់ស្ដែងនៃការធ្វើអាជីវកម្ម ពាណិជ្ជកម្ម និងការវិនិយោគនៅកម្ពុជា ។ លោកថ្លែងថា ៖ « ក្នុងឱកាសនោះដែរ អ្នកចូលរួមទាំងអស់ក៏អាចមានឱកាសបង្កើតទំនាក់ទំនងធុរកិច្ចរវាងគ្នា ហើយក៏អាចបង្កើតអាជីវកម្មថ្មីជាមួយគ្នាទៀត។ មិនត្រឹមតែប៉ុណ្ណោះ អ្នកចូលរួមថែមទាំងមានពេលវេលាផ្លាស់ប្តូរមតិយោបល់ពីការធ្វើអាជីវកម្ម និងពាណិជ្ជកម្មទៅវិញទៅមកផងដែរ » ។
លោកបន្តថា នៅពេលនិយាយដល់កំណើនសេដ្ឋកិច្ចកម្ពុជាទទួលបានជោគជ័យក្នុងតំបន់អាស៊ីអាគ្នេយ៍ ព្រឹត្តិការណ៍ដូចជា កិច្ចប្រជុំកំពូលពាណិជ្ជកម្មអន្តរជាតិ និងវេទិកាសេដ្ឋកិច្ចពិភពលោក គឺជាសញ្ញាប្រាប់ថា កម្ពុជាបានបើកទ្វាររបស់ខ្លួនសម្រាប់អាជីវកម្មកម្រិតកំពូល។ លោកបន្តថា ៖ « អង្គជំនុំជម្រះពាណិជ្ជកម្មអន្តរជាតិនៃកម្ពុជាបានផ្ដល់ជូននូវឱកាសសម្រាប់ក្រុមហ៊ុនបរទេសមកទស្សនកិច្ចនៅក្នុងប្រទេស និងជួបជាមួយមេដឹកនាំនយោបាយ ដើម្បីស្វែងយល់ពីការអភិវឌ្ឍសេដ្ឋកិច្ចរបស់ប្រទេសមួយនេះ ព្រមទាំងអាចជួបជាមួយដៃគូសក្ដានុពល និងស្វែងរកការបណ្ដាក់ទុនដែលទទួលបានជោគជ័យរៀងៗខ្លួន » ។
លោក Pierre Tami ប្រធានគណៈកម្មការរៀបចំកិច្ចប្រជុំ ឲ្យដឹងថា ក្នុងអំឡុងកិច្ចប្រជុំកំពូលពាណិជ្ជកម្មអន្តរជាតិកម្ពុជាឆ្នាំក្រោយនេះ យើងមានគម្រោងបញ្ជាក់ពីជំហរតែមួយគត់របស់កម្ពុជានៃគោលដៅវិនិយោគក្នុងបេះដូងអាស៊ាន ។ លោកនិយាយថា ៖ «ព្រឹត្តិការណ៍នេះ នឹងផ្ដល់ជូននូវការយល់ដឹងដល់វិនិយោគិនអន្តរជាតិអំពីវិស័យជាច្រើន ដូចជា បដិសណ្ឋារកិច្ច, អាហារ និងភេសជ្ជៈ, ការអប់រំ, ការផលិត, បច្ចេកវិទ្យាឌីជីថល, ច្បាប់, ពន្ធនិងអភិបាលកិច្ច និយាយអំពីវិស័យកសិកម្ម និងការលូតលាស់នៅតំបន់អាស៊ានជាដើម » ។
លោកស្រី ឈុំ សុភ័ណ្ឌ នាយកប្រតិបត្តិនៃសភាពាណិជ្ជកម្មអន្តរជាតិនៃកម្ពុជា បានឲ្យដឹងដែរថា សព្វថ្ងៃនេះ សភាពាណិជ្ជកម្មអន្តរជាតិនៃកម្ពុជា មានសមាជិកជាង១២០ក្រុមហ៊ុននៅក្នុងវិស័យផ្សេងៗ ។ បេសកកម្មរបស់សភាពាណិជ្ជកម្មអន្តរជាតិនៃកម្ពុជា គឺដើម្បីលើកកម្ពស់ការអភិវឌ្ឍសេដ្ឋកិច្ចកម្ពុជា និងផ្ដល់នូវសមាជិករបស់ខ្លួនក្នុងវេទិកាផ្លាស់ប្តូរជាមួយរាជរដ្ឋាភិបាល ។
គួរបញ្ជាក់ថា បើតាមសេចក្តីប្រកាសព័ត៌មានរបស់សភាពាណិជ្ជកម្មអន្តរជាតិនៃកម្ពុជា កិច្ចប្រជុំកំពូលពាណិជ្ជកម្មអន្តរជាតិក្នុងប្រទេសកម្ពុជា នឹងធ្វើឡើងនៅសណ្ឋាគារអាំងទែកុងទីណង់តាល់ នៅថ្ងៃទី១៤ និង១៥ កុម្ភៈ ២០១៧ ដោយនឹងអញ្ជើញសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បើកជាផ្លូវការផងដែរ ។ នៅក្នុងព្រឹត្តិការណ៍នេះ នឹងមានអ្នកចូលរួមប្រមាណ៤០០នាក់ ទាំងមន្ត្រីរាជរដ្ឋាភិបាលថ្នាក់កំពូល និងមេដឹកនាំពាណិជ្ជកម្មមកពីក្រុមហ៊ុននានាទូទាំងពិភពលោក ៕
ចែករំលែកព័តមាននេះ